Pipila man ka henerasyon ang milabay, wala sukad mihubas ang pagsuporta sa masang mag-uuma sa Western Samar sa Bagong Hukbong Bayan (BHB). Kini ang mensahe sa rebolusyonaryong masa sa prubinsya dihang nagkahigayon nga subling makasandurot ang BHB human ang pipila ka panahon nga pagkaputol sa linya.

“Gipadaku mi sa among mga ginikanan nga taas ang pagrespeto sa mga kauban,” saysay ni Ka Amboy sa usa ka simple apan undanon nga pagsaulog sa ika-55 nga anibersaryo sa BHB niadtong Marso 29. Bisan og wala siya kaila sa kadaghanan sa bag-ong manggugubat nga miabot, wala siya nataha ug dali niyang nakasuud ang mga kauban. “Nahinumduman nako ang gisulti sa akong amahan, nga bisan asa mi makaabot ug makakita mi og NPA, ato na, tungod kay ang ilang ginapakigbisugan para sa sama natong kabus.”

Kanunay ginapahinumduman ni Ka Amboy ang iyang mga silingan nga nakab-ot nila ang mga kadaugan sa panginabuhian ug mumhong hinabang gikan sa gubyerno tungod sa rebolusyonaryong kalihukan. Masaligon nilang gisulti nga daghan pa gihapon ang nagpangga, nagmahal ug nagsuporta sa BHB sa ilang baryo tungod dinhi.

Nagpasalamat usab ang usa pa ka mag-uuma sa mga manggugubat, nga kadaghanan mga batan-on. “Inyong gipadayon ang pakigbisog nga gikamatyan sa akong igsoon,” saysay ni Ka Ambon. Namartir sa usa ka panagsangka ang iyang igsoon niadtong 1987. Gusto usab unta niyang magpultaym apan gagmay pa ang iyang mga anak kaniadto. “Karon, dili na pud nako kaya tungod kay tigulang na ko ug naa nay rayuma,” matud niya. “Nagpasalamat ko kaninyo sa inyong pagpadayon. Dili man ko makauban sa inyo, binsa sa unsang oras nga kinahanglan ko ninyo, motabang ko ug ang akong pamilya.” Andam usab siyang suportahan kung mosampa sa hukbong bayan ang kinsaman sa iyang mga apo.

Gipaabot sa tagabaryo ang ilang pasalamat sa pagtabang sa BHB sa ilang mga umahan. “Bisan wala mi didto, bisan wala mi kahibalo, padayon mi ninyong ginatabangan sa umahan,” matud ni Ka Huling. “Salamat gyud sa inyo. Sa tinuod lang, sa inyo nako nabati ang tinuud nga kalipay sa pag-alagad. Maong malipayon kaayo ko kung kauban mo. Gimahal namo kamo.”

Paambit sa masa, hapit na silang napatoo sa militar nga wala nay hukbong bayan sa ilang lugar tungod sa dugay-dugay nga panahong wala sila naadtuan sa yunit sa BHB. “Maong dihang among nabalitaan nga adunay mga kauban, nadasig mi,” saysay ni Ka Bining, usa sa mga misalmot sa panagtapok. Apan saysay niya, nag-amping usab sila basin mga nagpakunokuno lamang nga mga bag-ong salta nga Pulang manggugubat. Nakampante ra siya human mahimamat ang mga manggugubat.

“Husto ko nga dili kanus-a man pwedeng mawala ang NPA hangtud dili pa kita modaug,” matud niya.

Iyang gisaysay nga wala niya kanus-a man giluiban ang mga kauban. “Wala ko nagbag-o, bisan og nagdugay dinhi ang kaaway, wala ko nagsurender,” matud niya. “Ang akong nahibaloan, sa ako lang, hangtud karon nagpabilin kining sikreto.”

Gawas sa mahinuklugong mga estorya, naghalad og kanta ug uban pang kulturanhong pasundayag ang masa, nga gikalipay kaayo ug nakapataas sa moral sa mga kauban. Nagpasalamat usab ang mga kauban sa madasigon ug mainitong pagdawat kanila sa mga residente ug ang pagsikreto sa ilang presensya ug lihok sa mata sa militar. Samtang nagtapok-tapok ang masa ug hukbo sa maong lugar, dili moubos sa 40 ka kolum ang nag-operasyon sa mga barangay nga sakop sa mga lungsod sa San Jose de Buan, Gandara, San Jorge, Catbalogan, Motiong, Jiabong ug Paranas sa Samar ug sa mga baryo sa Can-avid ug Dolores sa Eastern Samar. Anaa sa 80 ka baryo ang nakapailalum sa mga operasyong RCSP.

Sa maong panagtapok, kolektibong gipalig-on sa mga Pulang kumander, manggugubat ug rebolusyonaryong masa ang ilang dedikasyon ug determinasyon nga iasdang ang rebolusyonaryong pakiggubat. Armado sa mga pagtuon sa miagi, determinado silang patigbabawan ang napunting nga mga kahuyangan ug himuon ang tanang paningkamot aron tubagon ang panawagang padilaabon ang armadong pakigbisog ug moabante nga adunay dugang kusog.