Sa umalabot nga mga bulan ug tuig, katungdanan sa kalihukang nasudnon-demokratiko nga kusganong iasdang ang kalihukang propaganda ug pag-organisa sa masa. Kinahanglang gamiton ang tibuok kusog aron abton ang minilyong katawhan sa mga pabrika, komunidad, kampus, upisina, ug uban pa. Kinahanglan labaw pang iasdang ang ilang mga pakigbisog ilabina batok sa pagsaka sa presyo, alang sa dugang suhulan ug sweldo, trabaho ug panginabuhian, ug batok sa nagkakusog nga interbensyong militar sa US ug ang pagpangandam ug pagpanghagit niini og gubat.

Pahimuslan ang maayo kaayong sitwasyon aron labaw pang pukawon, organisahon ug palihukon ang tanang demokratikong sektor sa katawhanng Pilipino, ilabina ang mga mamumuo, mag-uuma, ug halapad nga masang naghago.

Hiusahon ang grabeng kasuko sa katawhang Pilipino sa mapahimuslanon, pasista, ug papet nga rehimeng US-Marcos nga nagdala kanila sa labaw pang pagpahimulos, kakabus, ug pag-antus. Sa milabayng duha ka tuig ubos ni Marcos, mitiurok ang ekonomiya ug panginabuhi sa katawhan, migrabe ang terorismo sa estado ug pagpanumpo sa mga demokratikong katungod, migrabe ang korapsyon ug kahakog, ug labaw pang migrabe ang pagtugot sa papet nga rehimen sa interbensyong militar ug pulitika sa imperyalismong US.

Tungod sa kontra-katawhan, kontra-kabus, ug maki-langyaw nga mga palisiya ni Ferdinand Marcos Jr, labaw pang mitiurok ang gibilin kaniadto ni Duterte nga nahugnong ekonomiya ug panginabuhian sa kadaghanan sa katawhan. Sukad naghari si Marcos, walay hunong ang pagsaka sa presyo sa bugas ug uban pang nag-unang palaliton ug serbisyo. Sa laraw nga madani ang langyawng pamuhunan, gilansang ni Marcos ang minimum nga suhulan sa mga mamumuo ug sweldo sa mga ordinaryong empleyado, nga karon katunga na lang sa bili sa inadlaw nga panginahanglan nila ug sa ilang mga pamilya.

Napakyas si Marcos nga sulbaron ang grabeng problema sa kawad-on sa trabaho, ilabina sa kabatan-onan. Mas grabe pa, gihatagag dalan ni Marcos ang dagkung langyawng kapitalista ug ilang mga kakunsabong dagkung burgesya nga ilugon ang yuta, pangisdaanan, balayan ug panginabuhian sa masang kabus ug bisan sa mga petiburgesya sa kabanikanhan ug kasyudaran. Minilyong Pilipino ang walay panginabuhian, tarong nga trabaho o igo nga kita. Labaw pang gipakusog ni Marcos ang liberalisasyon sa importasyon nga labawng nagapatay sa lokal nga produksyon ug nagapahuyang ug nagapabangkarote sa ekonomiya. Labaw pang mibug-at ang utang sa mga Pilipino tungod sa patuyang nga pagpangutang ni Marcos. Bakak ug walay unod ang gipasigarbo ni Marcos nga “paglambo” nga takuban lamang sa makanunayong paggrabe sa kahimtang sa halapad nga masa sa katawhan.

Gibuhian ni Marcos ang iyang mga irong-buang nga pasistang ahente sa militar ug pulis aron walay hunong nga gukdon ang katawhang gigutom ug nasuko. Sa gatusan ka barangay sa kabukiran, naghari-hari ang militar sa takuban sa operasyong “community service” ug “barangay development.” Sa kasyudaran, ginasubaybayan ang mga unyon sa mga pabrika ug upisina, mga kahugpungan sa kabus nga komunidad, mga organisasyon sa kampus, mga asosasyon sa kababayen-an, tawong-simbahan, tigpanalipud sa tawhanong katungod, kinaiyahan ug uban pa. Gihadlok ang katawhan nga “mosurender” o “mobalik-sa-gubyerno” sa pagsulay nga sila pahilumon, bungkagon ang ilang panaghiusa, ug sumpuon ang ilang pagsukol.

Gigamit ni Marcos ang kaluha nga balaod nga Anti-Terror Law ug Anti-Terrorism Financing Law, aron ipatuman ang walay hunong nga pag-aresto, pagpasaka og hinimo-himong kaso, ug pagpriso. Ilabina sa kabukiran, walay hunong ang mga kaso sa pag-abuso sa tawhanong katungod, mga pagpatay ug pagmasaker sa mga sibilyan, ug uban pang mga paglapas sa internasyunal nga makitawhanong balaod. Walay pugong usab ang teroristang pagpamomba gikan sa kahanginan, pagpangistraping ug pagpanganyon aron itisok ang kahadlok sa dughan sa katawhan.

Ubos ni Marcos, labaw pang nabutyag ang tagos-sa-bukog nga kadunot sa nagaharing sistema. Sukad nga subling nakalingkod sa Malacañang, sunod-sunod nga gipabasura ni Marcos ang mga kaso batok sa ilang pamilya kalabot sa gatusan ka bilyong pisog bahandi nga gikawat sa panahon sa iyang amahang diktador. Timaan sa krisis sa nagharing sistema, walay katagbawan ang kahakog ni Marcos sa burukratikong benepisyo ug pribilehiyo. Ang gatusan ka bilyong pisong Maharlika Investment Fund kontrolado ni Marcos aron paburan ang iyang mga kroni ug paboritong upisyal.

Kontrolado karon ni Marcos ang ismagling sa bugas, asukar ug uban pang mga kontrabandong pang-agrikultura. Giilog ni Marcos gikan sa kamot sa mga Duterte ang pipila ka dagkung kontrata sa gubyerno sama sa proyekto sa riles sa Mindanao, ug uban pang dagkung proyekto sa imprastruktura. Usa kini sa mga hinungdan sa hingpit nga pagkabungkag sa ilang kunuhay “panaghiusa” ug sa nagkakusog nga away sa nagbanging mga pundok sa nagaharing hut-ong.

Kung kaniadto miluhod si Duterte sa China ug nagpakaitoy sa US, hingpit karong gitugyan ni Marcos ang kagawasan ug kaugalingnan sa Pilipinas sa imperyalismong US. Bugti sa ayudang militar, pulitikanhong suporta ug mga saad sa pamuhunan, gipatukoran ni Marcos ang US og dugang mga base ug pasilidad militar sa lain-laing bahin sa nasud aron ipwesto ang mga langyawng tropa ug armas. Gipagamit ni Marcos sa US ang Pilipinas isip lunsaranan sa mga operasyong militar subay sa estratehiyang heyopulitikal niini batok sa imperyalistang karibal nga China. Walay adlaw nga milabay nga wala gigamit sa US ang yuta ug kadagatan sa Pilipinas alang sa mga pagbansay ug pagpangandam og gubat. Sa takuban sa pagdepensa sa West Philippine Sea, gipagamit ni Marcos sa US ang AFP ug Philippine Coast Guard aron maglunsad og mga operasyon para hagiton ang China ug hatagag rason ang posibleng paggamit sa Mutual Defense Treaty sa panahon nga gusto sa US.

Ngitngit ang kaugmaon sa tibuok nasud ug siguradong labaw pang mograbe ang kahimtang sa katawhang Pilipino ilalum sa rehimeng US-Marcos ug dunot nga estado sa mga nagaharing hut-ong. Labaw ng gikinahanglang mobarog ug hiniusang molihok ang tibuok katawhan aron panalipdan ang ilang nasudnon ug demokratikong interes. Si Marcos karon ang numero unong pabug-at sa masa sa katawhan, numero unong terorista, numero unong korap, numero unong itoy sa imperyalismong US ug numero unong traydor sa kagawasan ug seguridad sa nasud. Ang rehimeng US-Marcos ang numero unong ginasingil, ginasaway ug ginasuklan sa katawhang Pilipino.

Padayong sagubangon ang tanang natad sa pakigbisog. Gikan sa pag-alsa sa mga pabrika, rali sa mga eskwelahan, upisina, komunidad ug mga kadalanan, paghagit sa reaksyunaryong eleksyon, hangtud sa armadong pakigbisog sa kabukiran, kinahanglang ipakita sa halapad nga masa ang ilang kasuko ug kasilag kang Marcos, ug isalikway ug tay-ogon ang iyang paghari.