4 ka tawo, gipatay sa AFP
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2023/09/20230907.human-rights-violations-1024x791.jpeg )
Tulo ka hors de combat ug usa ka tigulang nga mag-uuma nga walay ikasukol ang gipatay sa militar sa miaging mga semana. Walo usab ang giaresto ug gipasakahan og mga hinimo-himong kasong kriminal.
Sa Negros Occidental, gidagit sa 15th IB ang 69-anyos nga mag-uumang si Ramon Enseniales, gidala sa kakahuyan, ug tinuyong gipatay niadtong Hulyo 29 sa Sityo Pasto, Barangay Basak, Cauayan.
Duha ka hors de combat nga manggugubat sa Bagong Hukbong Bayan (BHB)-Southwest Negros ang gipatay usab sa 15th IB sa Barangay Camindangan, Sipalay City sa maong prubinsya. Niadtong Hulyo 29, gidakop sa 15th IB ang 23-anyos nga Pulang mandirigma nga si Reggie Fundador (Ka Tata) sa Sityo Badyang. Sa sunod adlaw, nakita na lamang ang iyang patayng lawas sa dalan sa Crossing Magtanday, Barangay Camindangan. Makita sa iyang patayng lawas ang mga timaan sa tortyur. Niadtong Agosto 1, gipatay sa 15th IB ang hors de combat nga si Alvin Lumagsao Sinsano (Ka Zian) sa Sityo Cambuguiot sa parehas nga barangay.
Sa Rizal, tinuyong gipatay human madakpan sa 80th IB si Wally Agudes (Ka KM) niadtong Hulyo 18 sa Barangay Burgos, Rodriguez. Si Ka KM adunay grabeng trangkaso nga hinungdan sa iyang pagpabilin sa komunidad.
Pag-aresto. Iligal nga gikuha ug gitortyur sa mga pwersa sa estado ang upat ka mga organisador sa mga mag-uuma nga silang Maria Theresa Buscayno, Desiree Jaranilla Patuñ-og, Andres Ely, ug Oliver Millo niadtong Hulyo 29 sa gabii. Gidagit sila samtang nagbyahe sa Jose Abad Santos Avenue sa Mexico, Pampanga.
Gipasakaan sila og mga kasong illegal possession of firearms and explosives. Gipagawas nga nakumpiska kanila ang lain-laing mga armas ug granada. Nakapriso sila karon sa San Fernando, Pampanga.
Niadtong Hulyo 11, giaresto sa 203rd IBde ang lider sa Sityo Lukban, Barangay Panaytayan, Mansalay sa Oriental Mindoro nga si G. Itaw Ramunyan. Gilambigit siya sa nahitabong engkwentro sa usa ka yunit sa 203rd IBde ug BHB sa maong sityo sa buntag niadtong adlawa.
Pipila ka adlaw human niini, giaresto ug gipriso sa mga sundalo ang duha ka Mangyan-Hanunuo uban ang duha nilang pasahero samtang nagbyahe sa Sityo Tambangan, San Roque, Bulalacao.
Sa Rizal, giaresto usab niadtong Hulyo si Laila Ramos, usa ka organisador sa katutubong Dumagat-Remontado.
Demolisyon. Bangis nga gidemolis sa mga ginsakpan sa kumpanyang Megaland Prime Estate Corporation ang gitawag nga Donald Compound sa FB Harrison St sa Pasay City niadtong Agosto 1. Giguba sa demolition team ang 40 ka mga balay kung asa nagpuyo ang 500 ka residente.
Gidagit sa mga pulis niadtong Agosto 3 ang aktibistang si Benedict Macabenta nga anaa sa lugar aron mosuporta sa mga residente. Gitapakan siya sa mga pulis ug gisumbag sa nawong.
Sa Quezon City, dili moubos sa tulo ka kababayen-ang residente sa King Christian St, Barangay Bagbag, Novaliches ang nasamdan niadtong Hulyo 28 sa ilang pagkontra sa iligal nga pagkoral ug demolisyon sa ilang komunidad. Adunay 30 ka mga trabahante ug maton ni Roberto Collantes, nga nangilog og yuta, ang gimandoan nga bungkagon ang mga balay sa lugar.
Pagpamig-ot. Gipasakahan og kasong pagpatay ug giakusahang myembro sa BHB ang tulo ka kagawad sa midya ug usa ka upisyal sa impormasyon sa lokal nga gubyerno sa Masbate niadtong Hulyo. Gihimo kini human nilang magpasaka og 11 ka kaso batok kang Gov. Antonio Kho sa Masbate ug sa iyang mga alipures niadtong Marso 25 bahin sa korapsyon sa mga lokal nga proyekto sa prubinsya.
Sa Quezon City, gitiunan og pusil ug gihulga ang organisador sa mga mamumuo nga si Grace Villota sa University of the Philippines-Diliman niadtong gabii sa Hulyo 22.