4 katawo, ginpatay sang AFP
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2023/09/20230907.human-rights-violations-1024x791.jpeg )
Tatlo ka hors de combat kag isa ka tigulang nga mangunguma nga wala-ikasarang magbato ang ginpatay sang militar sang nagligad nga mga semana. Walo naman ang gin-aresto kag ginpasakaan sang himo-himo nga kasong kriminal.
Sa Negros Occidental, ginkuha sang 15th IB ang 69-anyos nga si Ramon Enseniales, gindala sa lasang, kag hungod nga ginpatay sadtong Hulyo 29 sa Sityo Pasto, Barangay Basak, Cauayan.
Duha ka hors de combat nga hangaway sang Bagong Hukbong Bayan (BHB)-Southwest Negros ang ginpatay man sang 15th IB sa Barangay Camindangan, Sipalay City sa nasambit nga prubinsya. Sadtong Hulyo 29, gindakop sang 15th IB ang 23-anyos nga Pulang hangaway nga si Reggie Fundador (Ka Tata) sa Sityo Badyang. Pagkasunod nga adlaw, nakita na lang ang iya bangkay sa dalan sang Crossing Magtanday, Barangay Camindangan. Kitaon sa iya bangkay ang mga marka sang tortyur. Sadtong Agosto 1, ginpatay sang 15th IB ang hors de combat nga si Alvin Lumagsao Sinsano (Ka Zian) sa Sityo Cambuguiot sa pareho nga barangay.
Sa Rizal, hungod nga ginpatay pagkatapos madakpan sang 80th IB si Wally Agudes (Ka KM) sadtong Hulyo 18 sa Barangay Burgos, Rodriguez. Si Ka KM ang may yara sang ginabatyag nga malala nga trangkaso nga kabangdanan sang iya pagtinir sa komunidad.
Pag-aresto. Iligal nga gin-aresto kag gintortyur sang mga pwersa sang estado ang apat ka organisador sang mga mangunguma nga sila ni Maria Theresa Buscayno, Desiree Jaranilla Patuñ-og, Andres Ely, kag Oliver Millo sadtong Hulyo 29 sang gab-i. Ginkuha sila samtang nagabyahe sa Jose Abad santos Avenue sa Mexico, Pampanga.
Ginpasakaan sila sang kaso nga iligal possession of firearms and explosives. Ginapagwa nga nakumpiskar sa ila ang nagkalain-lain nga mga armas kag granada. Nabilanggo sila subong sa San Fernando, Pampanga.
Sadtong Hulyo 11, gin-aresto sang 203rd IBde ang sityo lider sang Sityo Lukban, Barangay Panaytayan, Mansalay sa Oriental Mindoro nga si G. Itaw Ramunyan. Gindalahig siya sa nahitabo nga inaway sang isa ka yunit sang 203rd IBde kag BHB sa nasambit nga sityo sadtong aga sang amo nga adlaw.
Pila ka adlaw pagkatapos sini, gin-aresto kag ginpriso sang mga soldado ang duha pa ka Mangyan-Hanunuo upod ang duha nila ka pasahero samtang nagabyahe sa Sityo Tambangan, San Roque, Bulalacao.
Sa Rizal, gin-aresto man sadtong Hulyo si Laila Ramos, isa ka organisador sang tumandok nga Dumagat-Remontado.
Demolisyon. Mapintas nga gindemolis sang mga tinawo sang kumpaniya nga Megaland Prime Estate Corporation ang ginatawag nga Donald Compound sa FB Harrison St sa Pasay City sadtong Agosto 1. Ginwasak sang demolition team ang 40 ka pamalay kon sa diin nagapuyo ang 500 ka residente.
Gindakop man sang mga pulis sadtong Agosto 3 ang aktibista nga si Benedict Macabenta nga yara sa lugar para magsuporta sa mga residente. Gintapakan siya sang mga pulis kag ginsumbag sa nawong.
Sa Quezon City, indi magnubo sa tatlo ka kababainhan nga residente sang King Christian St, Barangay Bagbag, Novaliches ang napilasan sadtong Hulyo 28 sa pagpamatok nila sa iligal nga pagkudal kag demolisyon sa ila nga komunidad. May 30 ka mga trabahador kag maton si Roberto Collantes, nagapang-agaw sang duta, ang ginsugo nga gub-on ang mga pamalay sa lugar.
Pagpang-ipit. Ginpasakaan sang kaso nga pagpatay kag ginapasibangdan nga myembro sang BHB ang tatlo ka katapo sang midya kag isa ka upisyal sa impormasyon sang lokal nga gobyerno sa Masbate sadtong Hulyo. Ginhimo ini pagkatapos nila magpasaka sang 11 ka kaso sang pagpangawat batuk kay Gov. Antonio Kho sang Masbate kag sa iya nga tinawo sadtong Marso 25 angot sa korapsyon sa mga lokal nga proyekto sa prubinsya.
Sa Quezon City, gintayaan sang pusil kag ginpaandaman ang organisador sang mamumugon nga si Grace Villota sa University of the Philippines-Diliman sadtong gab-i sang Hulyo 22.