MADINALAG-ON NGA GINHIWAT sa Venezuela ang eleksyon nga pang-pangulohan sadtong Hulyo 28. Nagdaog diri ang nagapungko nga presidente nga si Nicolas Maduro, isa sa mga mabakod nga kontra-imperyalista nga nagapamuno sa Latin America. Nakakuha siya sang 51.2% sang mga boto, batuk sa kasumpong niya nga si Edmundo Gonzalez Urrutia, nga nakakuha sang 44.2%.

Gintuyo sang US kag mga alyado sini sa Latin America nga gamuhon ang eleksyon paagi sa pag-hack sa data transmission system nga nagresulta sa pagdugay sang pagpagwa sang resulta sang inisipay. Sang wala nagmadinalag-on, gindeklarar sini nga “gindaya” ang eleksyon kag ginkilala si Gonzalez bilang “nagdaog” bisan wala sang may nauyatan nga ebidensya sang dinayaay.

Si Gonzalez ang pangtapal nga kandidato sang oposisyon nga si Maria Corina Machado, nga gindumilian nga magdalagan tungod sa pagsuporta niya sa US sa pagpatuman sang sangsyon pang-ekonomya nga nagpa-antus sa Venezuela, kag sa pagpanawagan para sa dumuluong nga interbensyon militar para pahalinon si Maduro.