PADAYON NGA GINADUSO sang mga drayber kag opereytor ang pagpabasura sang Public utility Vehicle Modernization Program (PUVMP) nga nagaduso sang jeepney phaseout kag pagbaylo sa mga ini sang mahal kag usado na nga imported nga mini-bus. Ini pagkatapos gindeklarar sang Department of Transportation nga padayon ang PUVMP sa pihak sang ikaduha nga resolusyon sang senado para isuspinde ang programa.

Ginhatagan pagtamod sang senado nga dako nga isip sang mga dyip ang namalibad nga magpakonsolida, tungod wala sang ikasarang ang mga drayber kag opereytor nga magbakal sang tuman ka mahal nga mga mini-bus.

Masuspinde man ukon indi ang PUVMP, dako na ang gintuga sini nga kahalitan sa palangabuhian sang mga drayber kag opereytor. Gintuyo sini nga punggan ang dalagko nga isip sang mga dyip nga magbyahe sa pamahog nga harangan ang mga indi konsolidado nga dyip, pagakasuhan ang mga drayber kag pagakuhaon (impound) ang mga dyip.

Ini sa pihak sang wala ginsapubliko nga resolusyon sang LTFRB sadtong Abril 30 nga nagtugot sa mga indi konsolidado nga dyip nga magbyahe sa mga ruta nga wala ukon manubo ang konsolidado nga prangkisa. Hungod nga gintago ini sang LTFRB sa mga drayber kag opereytor para pwersahon ang dako-dako pa nga isip sang mga drayber nga wala nagpakonsolida nga magpaidalom sa PUVMP.

Pabug-at ang programa bisan sa mga nagkonsolida kag napilitan nga magbakal sang malahalon nga mga salakyan nga gabuk kag indi mahapos nga pangitaan sang pyesa. Sa Iloilo City, nagbunga ang PUVMP sa pagbuhin sang madamo nga ruta sang gagmay nga kooperatiba kag pagmonopolisa sang dalagko nga korporasyon sa mayor nga mga ruta sa sulod sang syudad.

Padayon ang panawagan sang Piston para sa pagpabalik sang 5-tuig nga prangkisa kag pag-atras sang mga napilitan nga mga drayber sa ila nga aplikasyon para sa konsolidasyon.