Jeepney phaseout, padayong gibatukan
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2023/03/20230307.jeepney-strike-b-1024x813.jpg )
PADAYONG GIBATUKAN SA mga drayber ug opereytor ang pagbasura sa Public Utility Vehicle Modernization Program (PUVMP) nga nagduso sa jeepney phaseout ug pag-ilis niini sa mahal ug karaang nga mga imported nga mini-bus. Kini human gideklara sa Department of Transportation (DOTr) nga magpadayon ang PUVMP bisan pa sa ikaduhang resolusyon sa senado aron ipasuspinde ang programa.
Gihatagan og pagtagad sa senado nga daghang mga dyip ang nagdumili sa pagkonsolida, tungod sa kakulang sa kapasidad sa mga drayber ug opereytor nga mopalit sa mahal kaayong mga mini-bus.
Masuspinde man o dili ang PUVMP, daku na ang kadaut nga gibunga niini sa panginabuhian sa mga drayber ug opereytor. Gisulayan niining pugngan ang daghang mga dyip nga mamasada sa hulgang harangon ang mga dili konsolidadong dyip, kasohan ang mga drayber ug kuhaon (impound) ang mga dyip.
Kini taliwala sa wala gipublikong resolusyon sa LTFRB niadtong Abril 30 nga nagtugot sa mga dili konsolidadong dyip nga mamasada sa mga ruta nga wala o ubos ang konsolidadong prangkisa. Tinuyong gitago kini sa LTFRB sa mga drayber ug opereytor aron pugson ang daghan pang mga drayber nga wala nagpakonsolida nga mosulod sa PUVMP.
Pabug-at ang programa bisan sa mga nagkonsolida ug napugos nga mopalit sa mahal nga mga sakyanan nga daling madaut ug dili daling pangitaan og pyesa. Sa Iloilo City, nagresulta ang PUVMP sa pagkibhang sa daghang ruta sa gagmayng kooperatiba ug pagmonopolyo sa dagkung korporasyon sa mayor nga mga ruta sa sulod sa syudad.
Padayon ang panawagan sa Piston alang sa pagbalik sa 5-ka-tuig nga indibidwal nga prangkisa ug pag-atras sa mga napugos nga mga drayber sa ilang aplikasyon para sa konsolidasyon.