Layo sa kamatuoran ang ikatulong SONA ni Marcos Jr
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2024/08/20240807.marcos-3rd-sona-1024x759.png )
Layo kaayo sa kamatuoran ug sa adlaw-adlaw nga pag-antus sa katawhang Pilipino ang gipahayag ni Ferdinand Marcos Jr sa iyang ikatulong State of the Nation Address (SONA) niadtong Hulyo 22. Gigamit lamang niya ang SONA aron tabunan ang krisis sa ekonomiya ug balik-balikon ang iyang mga daw engrandeng “kadaugan” ug gipanghambog nga “Bagong Pilipinas.”
Naghimo si Marcos ug usa ka pekeng hulagway. Gituyo niyang imenos ang tataw nga mga problema sama sa pagsaka sa presyo sa pagkaon, serbisyo ug yutilidad, kulang nga sweldo, grabeng kawad-on sa trabaho ug kontraktwalisasyon, pagpangilog sa yuta ug panginabuhian, ug nagkadanghang biktima sa pulitikanhong pagpamatay ug pagpanumpo.
Ang nalipay lamang sa pagpapulong ni Marcos mao ang dagkung negosyo, langyawng kapitalista, ug mga burukrata-kapitalista. Silang tanan nakapahimulos sa iyang korapsyon, todong liberalisasyon sa pag-import, mga proyektong imprastruktura nga gipondohan sa langyaw ug adunay garantiya sa gubyerno nga hugot nga ginasupak sa katawhan, ug palisiya sa baratong pamuo, ug kumbersyon sa libuang ektaryang yuta aron makadani sa langyawng pamuhunan.
SONA sa katawhan
Ang tinuod nga kahimtang sa nasud klarong nadungog sa mga kadalanan gawas sa Kongreso, ingonman sa mga prubinsya, ug sa singgit sa mga migranteng mamumuo sa laing nasud. Sa pagpanguna sa Bagong Alyansang Makabayan (Bayan), libuang Pilipino ang nagprotesta sa adlaw sa ikatulong SONA.
Bisan ulan, nagmartsa sa Commonwealth Avenue sa Quezon City ang mga mag-uuma, mamumuo, kabatan-onan, kababayen-an, mga drayber ug opereytor sa dyip, nasudnong minorya, mga kabus sa kasyudaran, magtutudlo, mga mamumuo sa pangkalawas, empleyado sa gubyerno ug uban pang mga demokratikong sektor.
Gibatikos sa Bayan ang paggasto sa rehimeng Marcos og ₱20 milyon alang sa preparasyon, pagkaon ug uban pang gasto para sa SONA. Gikundena usab nila ang pagdeploy ni Marcos og 23,000 ka pulis sa Metro Manila aron pugngan ang mga lihok-protesta. Gibabagan ang bulto sa mga nasudnon-demokratikong grupo nga magmartsa padulong sa Batasan Pambansa sa may Diliman Doctors Hospital.
Misalmot sa protesta ang kapin sa 600 gikan sa Southern Tagalog. Sa wala pa ang SONA, nagpahigayon sila og karaban sa pagpanguna sa rehiyonal nga balangay sa Bayan. Sunud-sunod nga protesta ang gilunsad sa delegasyon sa rehiyon sa lain-laing ahensya sa Metro Manila, lakip ang rali sa embahada sa US.
Samtang, gipadayon sa mga representante sa Makabayan Bloc ang pagsul-ob og mga “protest outfit” o bisti nga adunay mga panawagan ug imahe sa mga sektor nga ilang ginarepresentahan. Mibarog silang suuton kini bisan pa sa naunang pagdili sa Kongreso ug pahimangno nga dili sila pasudlon.
Gilunsad usab ang susamang mga protesta ug martsa sa Baguio City niadtong Hulyo 21, ug sa Albay, Naga City, Cebu City, Bacolod City, Iloilo City, Roxas City sa Capiz, Aklan, ug Davao City niadtong Hulyo 22. Nalunsad ang mga aktibidad taliwala sa militarisasyon sa mga barangay sa kabanikanhan ug mga pangharang ug tsekpoynt sa mga pulis sa syudad.
Nagpahigayon usab ang kapin sa 200 ka bilanggong pulitikal og usa ka adlaw nga pagpusa isip protesta sa rehimeng Marcos ug aron ibutyag ang ilang kahimtang sulod sa mapiot nga mga prisohan. Kapin sa 100 ang nag-ayuno sa isla sa Negros samtang nakighiusa usab ang mga taga-Palawan, Camarines Sur ug Metro Manila.
Liboan ka milya man ang gilay-on gikan sa nasud, nagprotesta ang mga grupo sa migranteng Pilipino sa North America, Europe, Asia ug Australia sa pagpanguna sa mga balangay sa Bayan ug Migrante niadtong Hulyo 21 hangtud Hulyo 24.
Adunay mga aktibidad sa lima ka syudad sa Canada, sa pito ka erya sa US kung asa 1,100 ka Pilipino ang misalmot, sa Austria, Germany, Italy, Switzerland, ug United Kingdom. Aduna usay protesta sa tulo ka lugar sa Australia samtang usa ka aktibidad ang gilunsad sa New Zealand. Sa Asia, adunay mga aktibidad ang mga migranteng Pilipino sa Hong Kong, Japan, South Korea ug Taiwan.