Hunong-pasada sa UP-Diliman. Naghunong-pasada ang mga drayber ug opereytor sa dyip nga nagabyahe sulod sa UP-Diliman niadtong Agosto 1 aron supakon ang pagsulod sa kooperatiba sa e-jeepney nga moilog sa ruta sa mga tradisyunal nga dyip sa kampus. Gipangulohan ang protesta sa UP Transport Group, uban ang suporta sa mga estudyante, magtutudlo, ug mga trabahante ug empleyado sa unibersidad. Nagsumite usab ang grupo og sulat sa administrayon sa UP-Diliman. Naglakip kini sa unum ka hangyo sa mga drayber.

Pagsugat sa unang adlaw sa klase. Nagprotesta sa Mendiola sa Maynila ang mga magtutudlo nga myembro sa ACT-Philippines niadtong Hulyo 29, kadungan sa pag-abli sa klase. Gimakmak nila ang pagpasagad sa rehimen ni Marcos ug ang mga palpak niining mga palisiya sa edukasyon. Matud nila, napakyas ang rehimen ni Marcos sa pagtagad sa padayon nga kakulangan sa mga klasrum, magtutudlo, mga tauhang pangsuporta sa sektor sa edukasyon, kagamitan sa pagtudlo ug mga pasilidad.

Mga biktima sa bagyong Carina, nagpiket. Sunud-sunod nga piket-protesta ang gilunsad sa mga kabus sa kasyudaran ug grupo nga maki-kinaiyahan niadtong Hulyo 29 sa upisina sa Department of Social Welfare and Development ug Department of Environment and Natural Resources sa Metro Manila. Gisingil nila ang rehimen ni Marcos ug ang mga ahensya niini sa ilang pagpasagad ug tulubagon sa mga naapektuhan sa bagyong Carina.