NAPAHALIN SANG PUMULUYONG Bangladesh ang prime minister sang pungsod nga si Sheik Hasina Wazed sadtong Agosto 5 sa tunga sang higante nga mga protesta batuk sa iya nga paghari. Napalayas siya isa ka adlaw pagkatapos mahitabo ang pinakamaduguon nga protesta sa pungsod, kon sa diin ginpaulanan sang bala sang mga pulis ang linibo ka ralyista. Masobra 90 ang gilayon nga napatay kag ginatos ang napilasan sa adlaw nga ini.

Nagsugod ang mga protesta sa sulod sang mga unibersidad batuk sa sistema nga kota sa paghatag sang mga trabaho sa burukrasya sibil. Madasig nga naglapnag ang pagbato pagkatapos pasulit-sulit nga sulungon sang mga pwersa ni Hasina ang mga demonstrasyon. Nagpatuman si Hasina sang karpyu, gin-utod ang internet, ginpasirado ang mga unibersidad kag ang midya. Tungod sa grabe nga brutalidad sang mga pulis, naglab-ot sa panawagan sa pagpapanaog kay Hasina. Sa kabilogan, masobra 300 na ang napatay sa mga protesta nga una na nga naglupok sadtong Hunyo.

Yara sa sentro sang mga protesta sang mga estudyante kag pumuluyo sang Bangladesh ang malala nga krisis sa ekonomiya, kag ang kawad-on sang trabaho kag mga oportunidad sa pungsod. Ang bugtong nga maayo nga trabaho sa pungsod, ilabi na sa mga nakatapos sang kolehiyo, amo ang mga pwesto sa gobyerno. Tungod sa sistema nga kota, nangin limitado ang mga pusisyon nga ini. Ginbag-o sang Korte Suprema ang sistema nga ini sadtong ikaduha nga semana sang Hulyo.