NAPALAGPOT SA KATAWHANG Bangladesh ang prime minister sa nasud nga si Sheik Hasina Wazed niadtong Agosto 5 taliwala sa dagkung mga protesta batok sa iyang paghari. Napalayas siya usa ka adlaw human mahitabo ang labing maduguong protesta sa nasud, kung asa gipaulanan sa mga pulis og bala ang liboang raliyista. Kapin 90 ang diha-dihang namatay ug gatusan ang nasamdan niadtong adlawa.

Nagsugod ang mga protesta sulod sa mga unibersidad batok sa sistemang kota sa paghatag og mga trabaho sa burukrasya sibil. Paspas nga mikaylap ang pagbatok human balik-balik nga giatake sa mga pwersa ni Hasina ang mga demonstrasyon. Nagpatuman si Hasina og curfew, giputol ang internet, gipasarado ang mga unibersidad ug ang midya. Sa grabeng brutalidad sa mga pulis, miabot ang panawagan sa pagpanaug kay Hasina. Sa kinatibuk-an, kapin 300 ang namatay sa mga protesta nga unang miulbo niadtong Hunyo.

Anaa sa sentro sa mga protesta sa mga estudyante ug katawhang Bangladesh ang grabeng krisis sa ekonomiya, ug ang kakulang sa trabaho ug mga oportunidad sa nasud. Ang bugtong tarong nga trabaho sa nasud, labi na sa mga nakahuman sa kolehiyo, mao ang mga pwesto sa gubyerno. Tungod sa sistemang kota, nahimong limitado ang mga posisyon niini. Giusab na sa Korte Suprema ang maong sistema niadtong ikaduhang semana sa Hulyo.