Hugot nga gimakmak sa lain-laing sektor ang rehimeng Marcos tungod sa kabuang nga gisulti ning bag-o lang sa mga upisyal niini sa ekonomiya nga ₱64 kada adlaw lang ang gikinahanglan aron matawag nga dili kabus o gutom ang usa ka Pilipino. Dayag nga ginalingla ni Marcos ang katawhan aron tabunan ang tinuod nga gidaghanon sa mga naglisud ug gigutom sa Pilipinas.

Sa pagtakda ni Marcos sa labing ubos nga sukdanan sa disenteng kinabuhi, ginapagawas karon sa iyang gubyerno nga usa lamang sa napulo ka Pilipino ang kabus. Dayag nga giinsulto ni Marcos ang mayorya sa mga Pilipino nga adlaw-adlawng naghago apan dili igo ang suhulan o kulang kaayo ang kita aron suportahan ang panginahanglan sa ilang mga pamilya.

Tinuyong ginatabunan ni Marcos ug sa iyang mga upisyal ang tinuod nga bili sa panginabuhi sa Pilipinas. Naghimuhimo siya og ilusyon nga nagkadaghan ang mga Pilipino nga “hatungang hut-ong,” aron itago ang kamatuoran nga mayorya sa mga Pilipino ang nag-ilaid sa kalisud.

Ang imposibleng ubos kaayong estadistika sa kagutom ug kalisud nagsilbi sa palisiya ni Marcos nga ilansang sa labing ubos nga ang-ang ang suhulan ug sweldo sa mga mamumuo ug yanong mga empleyado. Sa nangaging duha ka tuig, nagpabungol-bungol si Marcos sa reklamo ug pangayo alang sa mahinungdanong umento. Daku kaayong insulto sa mga pangpublikong magtutudlo ug empleyado sa gubyerno ang iyang gipanghinambog ning bag-o lang nga ₱26/adlaw nga pag-usbaw sa sweldo, nga daw mumhong gihulog gikan sa lamesa sa mga nagsalusalo sa Malacañang.

Paspas nga mitiurok ang ang-ang sa panganabuhi sa masa sa katawhang Pilipino. Sa ilalum ni Marcos, walay gintang ang pagsaka sa presyo sa pagkaon, ilabina sa bugas, bisan ang lana, pamasahe, kuryente ug uban pang batakang panginahanglan ug mga serbisyo. Nagpabilin usab nga ubos ang suhulan ug ubos kaayo ang umento nga gimando sa gubyerno. Anaa sa ₱1,200 na ang minimum nga sukaranan sa disenteng ang-ang sa panginabuhi sa usa ka pamilyang may lima ka myembro.

Atubangan sa dakung gintang tali sa suhulan ug sweldo, sa usa ka bahin, ug sa inadlaw nga panginahanglan sa mga pamilyang Pilipino, sa pikas bahin, labing gikinahanglan nga ipanghingusog sa mga mamumuo ug masang kabus ang pag-ila sa ilang batakang katungod sa katilingban ug ekonomiya. Angayan nilang iduso, sa partikular, ang ilang katungod sa mas taas nga istandard ug mas maayong kalidad sa panginabuhi, kadungan sa umento sa suhulan, trabaho ug panginabuhian.

Kinahanglang singlon sa katawhan ang rehimeng Marcos sa grabeng kapakyasan niining pugngan ang pagsaka sa presyo sa nag-unang mga palaliton, serbisyo ug kagamitan, ug sa palisiya niining pugngan ang pag-usbaw sa suhulan ug sweldo. Walay gihimo ang gubyernong Marcos aron tumanon ang giangkon niining responsibilidad isip estado nga siguruhon ang kaayuhan sa katawhan.

Ang mga palisiyang neoliberal ni Marcos sa ekonomiya nakasentro sa pag-awhag ug pagsalig sa langyawng pamuhunan, liberalisasyon sa importasyon, walay pugong nga pagpangutang, ug pagpahamtang og dugang na usab nga mga buhis. Kini ang hinungdan sa paggrabe sa krisis sa ekonomiya ug pagsamot sa kahimtang sa masa. Nagsilbi kining tanan sa interes sa mga langyawng kapitalista, sa kasosyo nilang lokal nga dagkung negosyo, dagkung agalong yutaan ug mga burukrata-kapitalista. Mihakop sila og binilyong piso gikan sa mga proyektong pang-imprastruktura sa gubyerno, pagpangawkaw sa bahandi sa nasud ug pagpahimulos sa baratong pamuo.

Kini nga mga palisiya ang hinungdan sa walay hunong nga paghagba sa lokal nga produksyon sa pagkaon ug uban pang batakang panginahanglan, pagsaka sa presyo sa mga gina-import nga igbabaligya, dakung problema sa kawalay trabaho (ilabina sa mga kabatan-onan), ubos kaayong suhulan, pagpangilog sa panginabuhian ug dislokasyon sa mga mangingisda ug mga kabus, pagpangilog og yuta, pagpalayas sa mga mag-uuma, pagkaguba sa kinaiyahan ug paglimas sa bahandi sa nasud.

Ang mga palisiya sa rehimeng Marcos nagasugnod sa mulo sa lapad nga masa sa katawhan. Labaw nga milalum ang ilang kasilag kang Marcos sa ginahimong pagbawi sa gatusan ka bilyong pisong bahandi nga gikawat sa iyang pamilya sa panahon sa diktadurya sa iyang amahan. Labaw pang migrabe ang ilang diskuntento sa pag-usik-usik og binilyong piso sa paglulinghayaw ni Marcos sa gawas sa nasud, mga salusalo sa Malacañang, pagkontrol sa ismagling sa bugas, asukal ug uban pa, walay ulaw nga pagkawat sa mga proyekto sa gubyerno, paggunit sa Maharlika Investment Fund aron paburan ang negosyo sa iyang mga kroni, ug uban pang kaso sa dayag nga korapsyon.

Mas grabe pa, gigamit ni Marcos ang armadong pwersa sa estado para mangsabwag og pasistang terorismo batok sa katawhan aron sumpuon ang katawhan, bungkagon ang ilang panaghiusa ug pugngan silang mosukol.

Atubangan niining kahimtanga, kinahanglang manglimbasog ang mga pwersang nasudnon-demokratiko sa pagpukaw ug paghugpong sa pinakalapad nga han-ay sa katawhan, ilabina sa masang labing nag-antus ilalum ni Marcos. Kinahanglang kusganong ipataas ang kahimatngon sa masa nga ang gakasinati nilang kalisud ug kagutom dili kapalaran, dili masulbad sa kakugi ug paningkamot, ug labaw nga dili angayang antuson na lamang. Angayan nilang makita nga kini direktang resulta sa mga palisiya ug programa sa rehimeng Marcos ug sa iyang mga among imperyalistang langyaw.

Ipaabot sa lapad nga masa nga kinahanglan nilang maghiusa ug molihok sa lain-laing pamaagi sa pagsukol aron panalipdan ang ilang mga katungod ug iasdang ang ilang interes. Kinahanglang hugpungon ang ilang han-ay sa mga unyon ug lain-laing porma sa mga organisasyon sa mga pabrika, komunidad sa kasyudaran ug kabukiran, mga eskwelahan, mga upisina, ug uban pa.

Ang pakigbisog sa katawhang Pilipino batok sa anti-katawhan ug anti-nasyunal sa rehimeng Marcos kabahin sa kinatibuk-ang pagsukol aron tapuson ang tibuok sistemang semikolonyal ug semipyudal pinaagi sa nasudnon-demokratikong pakigbisog, lakip ang lain-laing porma sa pagsukol, labaw sa tanan, pinaagi sa armadong pakigbisog. Kinahanglang tapuson ang paghari sa mapahimuslanon ug madaugdaugong hut-ong. Isip pinakakonsentradong dagway sa maong dunot nga sistema, ang pasista, papet, paantus ug pabug-at nga rehimeng US-Marcos ang pinakasentrong target sa pagsukol sa katawhan.