Gipatay sa mga sundalo sa Armed Forces of the Philippines (AFP) ang tulo ka sibilyan sa Negros Occidental ug Masbate sa milabayng mga semana. Ang Negros Occidental ug Masbate ang una ug ikaduhang adunay pinakadaghang narekord nga biktima sa pagpamatay ilalum sa rehimeng Marcos.

Niadtong Agosto 22, brutal nga gipatay sa 94th IB ang magtiayong sibilyan nga silang Marvin Incancion, 37, ug Jolina Martinez, 27, sa ilang payag sa Sityo Pisok, Barangay Buenavista, Himamaylan City, Negros Occidental. Namatay sila sa mga samad pinusila sa ulo. Halos dili mailhan ang dagway ni Martinez tungod sa grabeng igo sa bala.

Niadtong Setyembre 1, gipatay sa 2nd IB ang 30-anyos nga mag-uumang si Tata Bacutin sa Barangay Pili, Placer, Masbate atol sa paghampak sa Bagyong Enteng. Siya ang ika-33 nga biktima sa pulitikanhong pagpamatay sa prubinsya.

Gipagawas nga mga Pulang manggugubat nga napatay sa engkwentro ang mga biktima.

Blokeyo sa pagkaon. Grabeng gutom ug perwisyo ang gibunga sa pipila na ka semanang blokeyo sa pagkaon sa 80th IB ug 70th IB sa upat ka sityo sa Barangay Umiray, General Nakar, Quezon. Ginaharang sa mga sundalo ang mga sako sa bugas ug uban pang pagkaon para sa mga tindahan sa mga nahisgutang sityo tungod sa walay basihang akusasyon nga kini para sa Bagong Hukbong Bayan.

Pag-aresto. Gidagit sa mga pulis ug militar ug gipasakahan og hinimu-himong kasong kriminal silang Cirila Estrada, kanhing bilanggong pulitikal, ug Victor Pelayo sa Capiz niadtong Agosto 29. Wala dayon sila gitumaw ug nakaplagan lamang sa mga grupo sa tawhanong katungod ug paryente sa istasyon sa pulis sa Roxas City human ang duha ka adlaw.

Sa Quezon, iligal nga giaresto sa mga pulis ang mag-uuma sa lubi nga si Roberto Mendoza niadtong Setyembre 1 sa Barangay Silongin, San Francisco. Si Mendoza ang amahan sa tigpanalipud sa tawhanong katungod nga si Lieshel Mendoza nga ginapig-ot sa 85th IB. Giguba usab sa mga pulis ang dingding sa iyang payag human kini giransak.

Pagpamig-ot. Iligal nga gikuha sa mga sundalo sa 3rd Civil-Military Operations Battalion sa 3rd ID ang mga pangalan sa mga myembro ug upisyal sa Asosasyon sang Magagmay nga Mangingisda sa Santiago sa Barangay Santiago, Barotac Viejo, Iloilo niadtong Agosto 18. Sa Maynila, gipadangat sa barangay ni Enrique Lozada Jr (Teng), tigpamaba sa Bayan-Manila, ang pagpaniktik sa mga pulis kaniya.