Taliwala sa malukpanong kagutom ug kalisud, gianunsyo niadtong Agosto 29 ni Gilbert Teodoro, kalihim sa Department of Defense, ang plano sa Armed Forces of the Philippines (AFP) nga mopalit og mga misayl ug 40 ka eroplanong iggugubat sa presyong ₱300-₱400 bilyon. Pagapaliton kini sa mga Amerikanong kumpanya sa armas ug ilang mga subsidyaryo.

Sa kasamtangan, ginasulting adunay 224 ka sakyanang iggugubat pangkahanginan ang AFP. Ginagamit kini sa mga paturagas nga pagpamomba sa kalasangan ug mga sibilyang komunidad sa hungog nga laraw sa AFP nga “pukanon” ang rebolusyonaryong kalihukan.

Dili moubos sa 60 ang narekord sa Ang Bayan nga mga kaso sa pagpamomba, pagpanganyon ug istraping gikan Hulyo 2022 hangtud Hunyo 2024. Ang 32 dinhi mga aerial bombing o paghulog sa dili moubos sa upat ka dagkung bomba gamit ang mga FA-50, Super Tucano ug mga pang-atakeng helikopter.

Pinakadaghan ang narekord nga pagpamomba ug pagpang-istraping sa Bukidnon, sunod sa Northern Samar, Abra, Kalinga, Cagayan ug Aurora. Aduna usay mga pagpamomba sa Oriental Mindoro, Western Samar, Misamis Oriental, Apayao, Surigao del Sur, Agusan del Norte, Iloilo, Negros Occidental, Quezon ug Camarines Sur, Nueva Vizcaya, Agusan del Sur, Zamboanga del Norte, Negros Oriental, Masbate ug Samar.

Sa tanang higayon, kadungan sa maong mga pagpamomba ang pagpanganyon ug malangkubon ug malungtarong operasyong kombat sa militar nga hinungdan sa kaylap nga pagpangabuso ug mga paglapas sa katungod sa mga sibilyan.