Kapin 100 katawo ang mitambong sa gihimong programa sa parangal para sa mga Bayani ug Martir sa Agosto sa Panay niadtong Agosto 26 sa Iloilo. Misalmot dinhi ang mga higala, pamilya ug mga kanhing kauban sa 11 ka nakalas nga mga Pulang manggugubat sa Bagong Hukbong Bayan (BHB)-Panay ug mga kadre sa Partido Komunista ng Pilipinas sa rehiyon. Namartir sila sa sunud-sunod nga armadong engkwentro niadtong Agosto sa Iloilo ug Antique.

Ang adlaw sa parangal giatol sa ika-74 nga birthday ni Ka Concha Araneta-Bocala, usa sa mga namartir. Nagsilbi si Ka Concha isip usa sa nag-unang upisyal sa Rehiyunal nga Komite sa Partido sa Panay ug konsultant sa National Democratic Front of the Philippines.

Gibasa sa programa ang parangal sa Komite Sentral sa Partido sa mga Bayani ug Martir sa Agosto sa Panay. Gihatagan niini og pinakataas nga pasidungog si Vicente Hinojales (Ka Hadjie/Ka Emil), kagawad sa Komite Sentral ug kalihim sa Rehiyunal nga Komite sa Partido sa isla. Nangulo siya sa rehiyon sa Panay sukad 2016, human nga nagpatuman sa mahinungdanong bahin sa kumprehensibong paglambo sa mga rebolusyonaryong pakigbisog sa Northeast Mindanao gikan 2006 hangtud 2016.