Nagwali (liturgical celebration) ang National Council of Churches of the Philippines (NCCP) ug Philippine Ecumenical Peace Forum niadtong Setyembre 1 aron dumdumon ang ika-32 nga tuig sa pagpirma sa The Hague Joint Declaration sa mga representante sa National Democratic Front of the Philippines (NDFP) ug sa Government of the Republic of the Philippines (GRP) sa The Hague, Netherlands. Unod sa maong deklarasyon ang gambalay sa negosasyon ug ang pagkasunud-sunod sa mga sustantibong adyenda para makab-ot ang makatarunganon ug malahutayong kalinaw.

Ayha niini, gikundena sa mga rebolusyonaryong pwersa ang pahayag ni Eduardo Año, National Security Adviser, nga nag-ingong wala niya nakitang madayon ang panaghisgot kalinaw. Sukwahi kini sa pamahayag nga nagsulting “positibo” ang rehimeng Marcos nga magbunga ang panaghisgot sa usa ka “pinal nga kasabutan.”

Atubangan sa managsukwahi nga senyales gikan sa GRP, subling gipalig-on sa NDFP ang kaandamon niini alang sa negosasyon isip epektibong pamaagi aron tubagon ang mga ugat sa nagatunhay nga gyera sibil. Matud usab sa Partido Komunista ng Pilipinas, ang pag-uswag sa panaghisgot labaw nga nakadepende sa gikusgon sa tingog sa katawhang Pilipino ug sa hiniusa nilang pagtukmod sa rehimeng Marcos nga paminawon ang dugay nang singgit alang sa tinuod nga reporma sa yuta ug nasudnong industriyalisasyon ug ang pagtapos sa mga pagpangabuso sa tawhanong katungod ug internasyunal nga makitawhanong balaod.