Walay-renda ang kamangtas ug kabangis sa rehimeng Marcos sa milabayng mga semana. Nataho sa Isabela ang pagdagit sa duha ka batan-ong organisador, pag-aresto sa unum ka lider-drayber ug opereytor sa Bacolod City, tulo ka estudyante sa Quezon City ug mga kaso sa pagpamig-ot sa Cavite.

Pagdagit. Sa Isabela, gidagit sa mga pwersa sa estado silang Vladimir Maro ug Andy Magno sa lungsod sa San Pablo niadtong Setyembre 11. Si Maro usa ka organisador sa Migrante Youth ug tigpanalipud sa katungod sa mamumuong migrante. Si Magno usab myembro sa Minggan-University of the Philippines Manila, usa ka organisasyong tigpanalipud sa kinaiyahan. Nakahuman siya sa kursong Development Studies sa unibersidad.

Niadtong Setyembre 15, nakaplagan sa mga paryente ug abugado si Maro sa istasyon sa mga pulis sa Peñablanca kung asa siya gipriso. Gipasakahan siya og duha ka kasong sulayng pagpatay ug “terorismo.”

Pag-aresto. Gibombahan og tubig sa mga bumbero ug bangis nga gibungkag sa mga pulis ug armadong pwersa sa rehimeng Marcos ang mga nagprotestang drayber ug opereytor sa dyip sa Bacolod City niadtong Setyembre 18. Aron ipadayag ang ilang reklamo batok sa jeepney phaseout, nagpiket sila atubangan sa usa ka hotel sa Lacson Street kung asa gilunsad sa mga ahensya sa gubyerno ang Public Transport Modernization Program Summit.

Giaresto sa mga pulis ang pipila ka lider sa Undoc-Piston, KNETCO-Piston, ug Bacod-Manibela sa maong piket. Lakip dinhi silang Lilian Sembrano, Rudy Catedral, Eric Bendoy, Shallemar Leutner, Melchor Omangyon, ug Rodolfo Gardoce.

Niadtong Setyembre 19, tulo ka estudyante sa Polytechnic University of the Philippines ang gidakop sa nakasibilyang mga pulis sa Quiapo, Manila samtang “nag-oplan-pinta” isip pagdumdum sa ika-52 nga anibersaryo sa balaod militar ug diktadurya sa unang rehimeng US-Marcos.

Pagpamig-ot. Niadtong Setyembre 9, nagmuntar og usa ka tsekpoynt ang mga pwersa sa estado sa bukana sa Lupang Ramos sa Dasmariñas City. Sa misunod nga adlaw, pugos nga gisulod sa 50 ka pulis ug militar ang komunidad sa takuban sa pag-inspeksyon kalabot sa African Swine Fever. Subling gisulod ang komunidad niadtong Setyembre 17.

Niadtong Setyembre 9, mihunong og pipila ka oras ang upat ka sakyanan sa pulis atubangan sa Lupang Tartaria sa Silang. Kini adunay ubang usa ka siksbay sa mga sundalo nga may tulo ka armas sa atop, ug tulo ka V150 nga mga tangke sa militar.