Wala-preno ang kapintas kag bayolensya sang rehimen Marcos sa nagligad nga semana. Nalista sa Isabela ang pag-abdak sa duha ka pamatan-on nga organisador, pag-aresto sa anom ka lider-tsuper kag opereytor sa Bacolod City kag tatlo ka estudyante sa Quezon City, kag mga kaso sang pagpang-ipit sa Cavite.

Pag-abdak. Sa Isabela, gin-abdak sang mga pwersa sang estado sila ni Vladimir Maro kag Andy Magno sa banwa sang San Pablo sadtong Septyembre 11. Si Maro ang organisador sang Migrante Youth kag tigtib-ong sang kinamatarung sang mamumugon nga migrante. Si Magno naman ang nangin kabahin sang Minggan-University of the Philippines Manila, isa ka organisasyon nga nagatib-ong sa kapalibutan. Nakatapos siya sang kurso nga Development Studies sa unibersidad.

Sadtong Septyembre 15, natultolan sang mga himata kag abogado si Maro sa istasyon sang pulis sa Peñablanca kon diin siya ginbilanggo. Ginpasakaan siya sang duha ka kaso sang tuyo nga pagpatay kag “terorismo.”

Pag-aresto. Ginbomba sang tubig sang mga bumbero kag mapintas nga ginbungkag sang mga pulis kag armado nga pwersa sang rehimen Marcos ang mga nagprotesta nga drayber kag opereytor sang dyip sa Bacolod City sadtong Septyembre 18. Agud nga ibuyagyag ang ila reklamo batuk sa jeepney phaseout, nagpiket sila sa atubang sang isa ka hotel sa Lacson Street kon sa diin ginlunsar sang mga ahensya sang gubyerno ang Public Transport Modernization Program Summit.

Gin-aresto sang mga pulis ang pila ka lider sang Undoc-Piston, KNETCO-Piston, kag Bacod-Manibela sa nasambit nga piket. Lakip diri sila ni Lilian Sembrano, Rudy Catedral, Eric Bendoy, Shallemar Leutner, Melchor Omangyon, kag Rodolfo Gardoce.

Sadtong Septyembre 19, tatlo ka estudyante sang Polytechnic University of the Philippines ang ginkuha sang mga nakasibilyan nga mga pulis sa Quiapo, Manila samtang nagapatigayon sang “oplan-pinta” bilang pagdumdom sa ika-52 nga anibersaryo sang laye militar kag diktadurya sang una nga rehimen US-Marcos.

Pagpang-ipit. Sadtong Sep-tyembre 9, nagtukod sang isa ka tsekpoynt ang mga pwersa sang estado sa pasulod sa Lupang Ramos sa Dasmariñas City. Pagkasunod nga adlaw, pwersahan nga ginsulod sang 50 ka pulis kag militar ang komunidad sa tabon sang pag-inspeksyon kaangot sa African Swine Fever. Liwat nga ginsulod ang komunidad sadtong Septyembre 17.

Sadtong Setyembre 9, nagpondo sang pila ka oras ang apat ka salakyan sa atubang sang Lupang Tartaria sa Silang. May yara man ini sang upod nga isa ka siksbay nga trak sang mga soldado nga may tatlo ka pusil sa atop, kag tatlo ka V150 nga mga tangke sang militar.