Gin-ambus sang Bagong Hukbong Bayan (BHB)-Sorsogon (Celso Minguez Command) ang mga tinawo sang 22nd IB samtang nagabyahe sa Sityo Sabang, Barangay Calpi, Sorsogon sadtong Septyembre 6. Napatay diri si Cpl. Rodel Felismino samtang napilasan ang isa pa ka soldado sang 22nd IB nga nakabase sa Barangay Calmayon, Juban.

Ang nasambit nga aksyon ang sabat sang BHB-Sorsogon sa reklamo sang pumuluyo sa nagkalain-lain nga baryo sang Magallanes, Bulan, Irosin kag Juban nga ginaharas sang mga soldado sa mga operasyon militar. Kabahin man ini sa pagsaludo sang Pulang hukbo sa kabaganihan ni Arnel “Ka Mando” Estiller kag iban pa nga rebolusyonaryong martir.

Pagsilot. Ginreport sang BHB-Masbate (Jose Rapsing Command) ang pagpatuman sini sang rebolusyonaryo nga hustisya sadtong Setyembre 10 sa isa ka aktibo nga katapo sang CAFGU nga si CAA Rodel Monsalod sa Barangay Cadulawan, Cataingan. Si Monsalod ang nagaserbe nga giya sa mga operasyon kag kampanya sang pagpatay sang 2nd IB sa mga sibilyan. Bayaran nga maton siya ni Masbate Gov. Antonio Kho.

Sa Negros Oriental, ginpapanaugan sang silot sang BHB-Central Negros (Leonardo Panaligan Command) si Jonel Sevilla, aktibo nga aset panilag sang militar nga taga-Sityo Kabulay, Barangay Trinidad, Guihulngan City sadtong Agosto 30, santo sa desisyon sang natungdan nga mga organo sang demokratiko nga gubyerno sang banwa. Ginpatigayon ang armado nga aksyon sa Sityo Cambairan sa nasambit nga barangay.

Kontra-ensirkulo. Indi magnubo sa 10 ka tropa sang 2nd IB ang napatay sa kontra-reyd sang BHB-Masbate sa pag-ensirkulo sang mga tropa sang militar sa Sityo Calanay, Barangay Banco, Palanas sadtong Septyembre 15. Ginpalupok sang mga Pulang hangaway ang isa ka bomba nga nagresulta sa kaswalti sa bahin sang militar. Luwas nga nakamaniobra ang mga kaupod nga wala sang kahalitan sa ila nga kubay.