Napatas-an sa mga mamumuong-panguma sa tubuhan sa Barangay Kahil (dili tinuod nga pangalan) sa habagatang bahin sa Negros ang inadlawang suhulan human hiniusang giatubang ang duha ka agalong yutaan niadtong Hunyo. Sa taho sa Ang Paghimakas, mantalaan sa rebolusyonaryong kalihukan sa Negros, napataas ang suhulan gikan ₱200-₱220 ngadto sa ₱250, samtang ang pagdaro gikan ₱700 ngadto sa ₱1,300 sa duha ka agi kada ektarya.

Nakabenepisyo dinhi ang 19 ka panimalay o 44 ka mga mamumuong-panguma gikan sa lima ka sityo. Napadaug kini taliwala sa mas gipagrabeng mga operasyong militar sa Armed Forces of the Philippines.

Sumala sa Ang Paghimakas, ang anti-pyudal nga pakigbisog sa Barangay Kahil ikaduha na sa organisadong pagsukol sa masang mag-uuma panahon sa tiempo muerto o “patay nga panahon,” kini ang mga bulan sa tunga-tunga sa siklo sa pagpananum og tubo. Gilunsad ang unang hugna niadtong Mayo.

Piket sa mag-uuma. Niadtong Agosto 29, nagtapok ug nagprotesta ang mga mag-uuma sa Negros Occidental atubangan sa kapitolyo sa prubinsya sa Bacolod City para iduso ang pagpagawas sa pondo sa gubyerno aron makasugakod sa tiempo muerto. Gipangunahan ang protesta sa Kilusang Magbubukid ng Pilipinas Negros ug National Federation of Sugar Workers.

Nanawagan sila sa Sangguniang Panlalawigan nga magpagula og usa ka resolusyon nga magdeklara og makanunayong suporta sa mga mamumuong-panguma nga nakasinati sa kalisud ug kagutom matag tiempo muerto. Una nang nagsumite og sulat ang mga mag-uuma sa bise gubernador niadtong Agosto 20 alang sa usa ka dayalogo.

Niadtong Agosto 20, naglunsad usab og piket ug dayalogo ang mga mag-uuma sa Department of Agriculture Region VI sa Bacolod City. Kaniadto pang Hunyo sila nagsumite og sulat sa ahensya aron iduso ang suporta alang sa panginabuhian.