Napasakaan sang mga mamumugon sa kampo sa Barangay Kahil (indi matuod nga pangalan) sa sur nga bahin sang Negros ang inadlaw nga sweldo pagkatapos ululupod nga gin-atubang ang duha ka agalon mayduta sadtong Hunyo. Sa report sang Ang Paghimakas, pamantalaan sang rebolusyonaryong kahublagan sa Negros, napasaka ang sweldo halin ₱200-₱220 padulong sa ₱250, samtang ang pagpang-arado halin ₱700 padulong ₱1,300 sa duha ka pasada kada ektarya.

Nakabenepisyo diri ang 19 ka panimalay ukon 44 ka mga mamumugon sa uma halin sa lima ka sityo. Nadaog ini sa tunga sang mas ginpabaskog nga operasyon militar sang Armed Forces of the Philippines.

Suno sa Ang Paghimakas, ang kontra-pyudal nga paghimakas sa Barangay Kahil ang ikaduha na sa organisado nga pagbato sang masang mangunguma sa panahon sang tiempos muerto ukon “patay nga panahon” nga nagatumod sa mga bulan sa tunga sang siklo sang pagtanom sang tubo. Ginlunsar ang una nga duso sadtong Mayo.

Piket sang mangunguma. Sadtong Agosto 29, nagtililipon kag nagprotesta ang mga mangunguma sang Negros Occidental sa atubang sang kapitolyo sang prubinsya sa Bacolod City para iduso ang pagpagwa sang pondo sang gubyerno para makabulig sa tiempos muerto. Ginpangunahan ang hublag sang Kilusang Magbubukid ng Pilipinas Negros kag National Federation of Sugar Workers.

Nagpanawagan sila sa Sangguniang Panlalawigan nga magpagwa sang isa ka resolusyon nga nagadeklarar sang tayuyon nga suporta para sa mga mamumugon sa uma nga kada tuig naga-agum sang kapigaduhon kag gutom kada tiempos muerto. Una na nga nagsumite sang sulat ang mga mangunguma sa bise gubernador sadtong Agosto 20 para sa isa ka dayalogo.

Sadtong Agosto 20, naglunsar man sang piket kag dayalogo ang mga mangunguma sa Department of Agriculture Region VI sa Bacolod City. Sadto pang Hunyo nagpasa na sila sang sulat sa ahensya para iduso ang suporta para sa palangabuhian.