Protesta sa mga drayber sa Catarman. Nagtapok ang 300 ka drayber sa traysikel nga may rutang University of Eastern Philippines-Catarman niadtong Setyembre 8 aron ipadangat ang ilang pagbabag sa planong pag-ilog sa usa ka kooperatiba sa ilang ruta. Kini nga atake sa ilang panginabuhian resulta sa PUVMP (PTMP) nga nag-abli sa lain-laing ruta sa gagmayng drayber ug opereytor sa dagkung korporatisadong mga kumpanya sa “modernong dyip.”

Eyes On Set Network, gilunsad. Gitukod sa mga mamumuo sa pelikula ug telebisyon, mga propesyunal, mga estudyante sa midya, ug mga tigpanalipud sa katungod sa pamuo ang Eyes on Set Network aron bantayan ang pagpatuman sa Eddie Garcia Law ug pagduso sa makabuhi nga suhulan ug makitawhanong oras sa pagtrabaho sa industriya sa pelikula ug telebisyon. Upisyal nga gilunsad ang network sa usa ka rali niadtong Setyembre 11 sa Quezon City.

Pagkwari sa Rizal, gipapahunong. Miadto niadtong Setyembre 11 sa DENR ang mga grupong maki-kinaiyahan ug mangingisdang apektado sa pagbaha sa Rizal dihang mihampak ang bagyong Enteng. Panawagan nila ang hinanali nga pagkansela sa tanang mga permit alang sa kwari ug mina sa prubinsya. Matud nila, ang sobra-sobrang pagkaupaw sa kalasangan dinhi nga bunga sa kwari ug mina ang usa sa mayor nga hinungdan sa paspas nga pagsaka sa tubig ug malukpanong pagbaha niadtong Setyembre 2.