Gikan mindanao hangtud Luzon, walay hunong ang pagpangawkaw sa San Miguel Corporation (SMC) sa dagkung burgesya nga si Ramon Ang sa kinaiyanhong bahandi sa nasud nga nagagun-ub sa kinaiyahan ug panginabuhian sa katawhan.

Sa Zambales, gibabagan sa mga lumulupyo, maki-kinaiyahang grupo ug mga tawong-simbahan ang plano sa San Miguel Global Power (SMGP), subsidyaryo sa SMC, nga palapdon ang Masinloc Power Plant niini sa Masinloc, Zambales. Gikundena usab nila ang pag-endorso sa maong plano sa gubernador sa Zambales nga si Hermogenes Ebdane Jr. Si Ebdane usa ka kanhing hepe sa Philippine National Police, kalihim sa Department of Defense, ug kalihim sa Department of Public Works and Highways.

Gibabagan sa mga lumulupyo ang konstruksyon sa duha pa ka dugang nga yunit sa plantang coal-powered o ginapadagan sa karbon. Panawagan nila ang hinanali nga pagpasirado sa maong planta.

Matud sa kontra-petisyon, napalayas sa ilang mga panimalay ug panginabuhian ang mga lumulupyo sa mga komunidad palibot sa planta. Nakasinati usab sila og kadaut sa ilang panglawas, ug pagpamig-ot ug intimidasyon sa mga mibabag. Naguba usab ang kadagatan sa Masinloc Bay.

Sa pagtuon sa Concerned Citizens of Zambales, gidaut sa abo sa karbon gikan sa Masinloc ang produksyon sa mangga nga usa sa mayor nga panginabuhian sa prubinsya. May kadaut usab kini sa mga umahan sa amihanang Zambales. Kung ipadayon ang ekspansyon sa planta, labaw nga molapad ang kadaut nga ibunga niini sa mga umahan ug kahanginan sa prubinsya.

Gimakmak usab nila ang pagpondo sa proyekto sa Standard Chartered, usa ka multinasyunal nga bangko nga nakabase sa United Kingdom. Midawat usab kini og pondo gikan sa International Finance Corporation sa World Bank.

Sa Pilipinas, gikan sa mga plantang coal-powered ang 54.7% sa greenhouse gas emission sa sektor sa enerhiya.