Halin Mindanao tubtob Luzon, wala untat ang pagpangkawkaw sang San Miguel Corporation (SMC) sang dalagko nga burgesya nga si Ramon Ang sa dunang manggad sang pungsod nga nagaguba sa kapalibutan kag palangabuhian sang pumuluyo. Sa Zambales, ginpamatukan sang mga residente, maki-kapalibutan nga grupo kag mga tawong-simbahan ang plano sang San Miguel Global Power (SMGP), subsidyaryo sang SMC, nga palaparon ang Masinloc Power Plant sini sa Masinloc, Zambales. Ginkundenar man sang mga ini ang pag-endorso sa plano nga ini sang gubernador sang Zambales nga si retirado nga heneral Hermogenes Ebdane Jr. Si Ebdane ang anay hepe sang Philippine National Police, tiglikom sang Department of Defense, kag tiglikom sang Department of Public Works and Highways.

Ginpamatukan sang mga residente ang konstruksyon sang duha pa ka dugang nga yunit sang planta nga coal-powered ukon ginapadalagan sang karbon. Panawagan nila ang hinanali nga pagpasira sa nasambit nga planta.

Suno sa kontra-petisyon, napalayas sa ila mga puluy-an kag palangabuhian ang mga residente sa mga komunidad sa palibot sang planta. Nag-agum man sila sang kahalitan sa ila nga ikaayong lawas, kag pagpang-ipit kag intimidasyon sa mga nagapamatok. Naguba man ang kadagatan sa Masinloc Bay.

Sa pagtuon sang Concerned Citizen of Zambales, ginguba sang abo sang karbon halin sa Masinloc ang produksyon sang paho nga isa sa mayor nga palangabuhian sa prubinsya. May gintuga man ini nga kahalitan sa mga ulumhan sa na-aminhan nga bahin sang Zambales. Kon ipadayon ang ekspansyon sang planta, labi nga magasangkad ang kahalitan nga pagatugahon sini sa mga ulumhan kag pangkabilogan nga hangin sang prubinsya.

Ginbatikos man nila ang pagpondo sa proyekto sang Standard Chartered, isa ka multinasyunal nga bangko nga nakabase sa United Kingdom. Nagbaton man ini sang pondo halin sa International Finance Corporation sang World Bank.

Sa Pilipinas, halin sa mga planta nga coal-powered ang 54.7% sang mga greenhouse gas emission sang sektor sang enerhiya.