Eksaktong usa ka tuig ang milabay dihang gisugdan sa Zionistang estado sa Israel ang paturagas nga pagpamomba, pag-atake ug pagpanakop sa Gaza Strip, kayutaan sa Palestine. Sa suporta sa imperyalismong US, gipakusog sa mga pwersang Zionista ang henosidyo batok sa mga Palestino, gamit ang tone-toneladang bomba aron pulbuson ang tibuok Gaza.

Dili moubos sa 41,000 ka tawo, lakip ang 27,000 ka kababayen-an ug mga bata ang gipatay sa subli-subling pagmasaker sa mga pamilya ug komunidad. Napalayas sa ilang mga panimalay ang halos tibuok 2.1 milyong populasyon sa Gaza. Tinuyong gitarget sa pagpamomba ang mga istrukturang pangnegosyo ug puluy-anan, ospital, eskwelahan, mga planta sa kuryente, sistema sa patubig, mga kalsada ug uban pa. Di matungkad ang pag-antus sa katawhan sa Gaza tungod sa kagutom ug sakit, kawalay mainum, pagkaguba sa sanitasyon ug pagpiang sa sistemang panglawas. Wala nakaluwas sa pag-atake sa Israel bisan ang mga tawong midya ug mga internasyunal nga ahensyang nagadala og mga hinabang.

Daku kaayong kabuang ang pangatarungan sa mga Zionista, sa US ug sa mga kaalyadong imperyalistang nasud. Ginaduso nila nga ang paturagas nga pagpamomba sa Gaza kabahin sa “katungod sa Israel nga panalipdan ang kaugalingon,” bisan og ang gitarget niini ang populasyon nga walay ikasukol. Ang pagpamomba sa Gaza dayag nga paglapas sa internasyunal nga makitawhanong balaod ug linuog nga mga krimen sa gubat.

Ang teroristang gyera sa Zionistang Israel sa Gaza usa ka dili patas nga tubag sa armadong panag-alsa nga gilunsad niadtong Oktubre 7, 2023 sa lain-laing mga manggugubat nga nakigbisog alang sa kagawasan sa Palestine. Niadtong adlawa, naglunsad sila og mga armadong opensiba batok sa mga base militar ug pasilidad sa Israel ug mikuha og mga bihag. Gihimo kadto sa lapad nga han-ay sa mga grupong nagasukol sa Palestine, lakip ang mga pwersang Islamiko (Hamas), ang People’s Front for the Liberation of Palestine, bisan ang uban pang demokratiko, armado ug dili-armadong rebolusyonaryong pwersa.

Ang panag-alsa, nga gitawag og Operation Al-Aqsa Flood, nagtinguhang suklan ang nagkagrabeng pagpangdaugdaug ug pulitikanhong pagpanumpo sa Zionistang Israel batok sa mga Palestino sa Gaza ug sa Occupied West Bank. Dugang kadto sa makasaysayanong bahin sa nagapadayong pakigbisog sa katawhang Palestino alang sa nasudnong paglingkawas ug katungod sa kaugalingong paghukum.

Kapin 75 ka tuig na ang milabay dihang gihimo sa mga pwersang Zionista o ultra-nasyunalistang Hudyo, nga adunay suporta sa imperyalismong US ug Britanya, ang mga masaker ug lain-laing porma sa kabangis aron palayason ang 700,000 Palestino gikan sa ilang mga panimalay ug yuta, ug hawanon ang dalan aron tukuron ang estadong Hudyo sa Israel. Tungod sa Al Nakba (o Ang Dakung Katalagman), napugos nga mobakwit ug mipanon ang mga Palestino padulong sa Jordan (West Bank) ug sa Gaza Strip (sa utlanan sa Egypt), o magpadangop sa lain-laing bahin sa kalibutan. Sukad niadtong 1967, gisakop sa Zionistang Israel ang West Bank ug gipriso ang mga Palestino sa mga gikoral nga komunidad. Ang Gaza Strip nahimong usa ka dakung prisohan nga kanunay ginabantayan ug ginaatake sa mga pwersang Israeli.

Ang kabangis ug barbarismo sa 75 ka tuig nga Zionista ug imperyalistang pagpangdaugdaug gitugbangan sa madasigon ug walay hunong nga pagsukol sa katawhang Palestino. Gipakita nila ang ilang determinasyong mosukol pinaagi sa mga gubat ug Intifada (Panag-alsa), kung asa gipakita ang kaisog ug walay pagduhaduha sa pagsakripisyo sa daghang mga martir. Ang armadong opensiba niadtong Oktubre 7, 2023 usa ka mahinungdanong kadaugan sa makasaysayanong pagsukol sa katawhang Palestino aron ilingkawas ang ilang nasud gikan sa kadena sa pagpangdaugdaug.

Ang Zionistang estado sa Israel hingpit nga ginasuportahan sa US ug mga kaalyadong imperyalistang nasud. Dugang sa tinuig nga ayudang $3.8 bilyon, naghatag ang US og dili moubos sa $12.5 bilyong ayudang militar gikan Oktubre 2023 sa porma sa kapin 10,000 toneladang mga bomba nga gigamit sa dinaghang pagpatay sa katawhang Palestino. Nagpabungol-bungol kini sa pagkundena sa tibuok kalibutan sa henosidyo sa Gaza, samtang misaka ang ganansya sa mga kumpanyang Amerikanong nagahimo og armas. Ipokrito ang panawagan sa gubyernong Biden alang sa hunong-buto ug laraw lamang nga pahalapon ang papel niini sa henosidyo. Ang tinuod niining tumong mao ang padayon nga gamiton ang Israel nga pundasyon aron ipabilin ug pakusgon ang hegemonya niini sa Middle East aron siguruhon ang iyang interes sa lapad nga reserbang lana ug uban pang mga rekurso.

Pinaagi sa sekretong suporta sa US, gipagrabe pa sa Israel ang gubat sa Middle East sa pag-atake sa Lebanon, Yemen, Syria ug Iran, nga pulos hugot nga misuporta sa pagsukol sa katawhang Palestino sa henosidyo sa Israel. Ang pagbuto og mga misayl sa Israel sa Lebanon mipatay sa kapin 500 sibilyan, dungan sa asasinasyon sa pipila ka lider sa kalihukang Hezbollah. Isip proxy sa US, gusto sa Israel nga pasiugdahan ang mas lapad nga gubat sa Middle East, nga nagatarget sa mga nasud nga lig-ong nanalipud sa ilang soberanya, ilabina ang Iran, nga dayag nga gideklara sa US nga kaaway niini. Ang pagpanghagit og mas lapad nga gyera ug pagkahakog sa gubat sa Israel ug US tin-aw nga timailhan sa pagkabangkrap sa imperyalismo.

Sa tibuok kalibutan, minilyon ang nagpadayag sa ilang grabeng kasilag sa henosidyo sa Gaza, lakip na sa okupadong West Bank. Taliwala sa mga pagsulay nga sumpuon ang ilang mga protesta, sama sa US ug ubang nasud, wala sila napaatras tungod kay mikuha sila og inspirasyon sa walay utlanang determinasyon sa katawhang Palestino ug sa ilang mga rebolusyonaryong pwersa nga ipadayon ang ilang pagsukol.

Kinahanglang ihatag sa katawhang Pilipino ang walay kinutubang suporta sa katawhang Palestino sa maisugon nilang pakigbisog alang sa nasudnong pagpalingkawas ug katungod sa paghukum-sa-kaugalingon. Ang pakigbisog sa katawhang Palestino hugot nga nakasumpay sa pakigbisog sa katawhang Pilipino, sa tanang dinaugdaug nga katawhan ug mga nasud nga nanalipud sa nasudnong kaugalingnan batok sa imperyalistang interbensyon ug mga gubat. Ang kadaugan sa katawhang Palestino, kadaugan sa tanang dinaugdaug nga katawhan sa tibuok kalibutan.