Arbitraryong sinampahan ng Philippine National Police (PNP) ang 10 kandidato sa pagkasenador ng Koalisyong Makabayan at iba pang mga lider-masa sa kasong iligal na asembliya kaugnay ng kilos protesta noong Nobyembre 30, 2024, Araw ni Bonifacio, sa Mendiola sa Maynila. Ginamit ng pulis ang Public Assembly Act o Batas Pambansa 880 para gipitin ang mga kandidato at lider.

Kabilang sa mga kinasuhan sina Kilusang Mayo Uno (KMU) Secretary General Jerome Adonis, Makabayan President Liza Maza, ACT Teachers Partylist Rep. France Castro, Gabriela Partylist Rep. Arlene Brosas, Piston President Mody Floranda, Kadamay Secretary General Mimi Doringo, Kilusang Magbubukid ng Pilipinas Chairperson Danilo Ramos, Pamalakaya Vice Chair Ronnel Arambulo, Sandugo Co-Chair Amirah Lidasan, at Filipino Nurses United Secretary General Alyn Andamo. Kinasuhan rin sina former Bayan Muna Partylist Rep. Ferdie Gaite, Alliance of Concerned Teachers Chair Vladimer Quetua at Alliance of Health Workers Secretary General Cristy Donguines.

Matatandaang nauna nang kinasuhan sina KMU Chairperson Elmer “Ka Bong” Labog at Nilo Mortifero, kasapi ng Bayan Muna na iligal na inaresto ng mga pulis sa araw ng protesta.

“Malinaw na ito’y panggigipit sa kalayaang magtipon at sa mamamayang naggigiit ng karapatan at kapakanan. Nag-aaksaya ng pondo at oras ang Manila Police District sa pagdidiin sa mga nagpoprotesta,” pahayag ng KMU, grupong nanguna sa protesta. Dagdag pa ng grupo, inililihis ng sirkus na pagkakaso ang nagpapatuloy na katiwalian at pagnanakaw ng mga nasa gubyerno habang patuloy na naghihirap ang karaniwang tao.

Ayon sa Makabayan, karaniwan nang taktika ng mga pwersa ng estado ang pagsasampa ng mga “shotgun” o basta-bastang kaso laban sa mga lider-masa. Binanggit pa ng koalisyon na sa pagmamadali at arbitraryong pagkakaso nito ay tinukoy pa nito bilang “babae” ang lider ng Piston na si Floranda at si Lidasan bilang kasapi ng organisasyon ng mga guro na ACT.

“Kami ngayon ay nakikipag-ugnayan na sa mga kinasuhang lider at kanilang mga abugado at maghahanda ng isang matibay na depensang ligal laban sa pinakabagong kaso ng panghaharas mula sa PNP,” ayon sa Makabayan. Dapat umanong matigil na ang pagsasampa ng gawa-gawang mga kaso ng iligal na asembliya at pagturing sa protesta bilang isang krimen.

Nakatakda ang paunang imbestigasyon sa kaso sa darating na Enero 15 sa Maynila.