Mabaskog nga ginakondenar sang Leonardo Panaligan Command New People’s Army ang padayon nga pagpang-atake sang pasistang militar sa mga komunidad sa Guihulngan. Halos 1 na ka semana ang pagpanghalughog sanga 300-400 ka berdugo nga 62nd IB, 33rd DRCoy kag Scout rangers sa mga kalasangan sang Guihulngan.

Sugod pa sadtong Oktubre 22, 2022 sang gab-i ang operasyon militar tubtob subong Oktubre 29 sa mga boundary sang Brgy Basak, Bulado, Binubuhan, Tacpao kag Humay-humay tanan sang Guihulngan City. Partikular sa sityo sang Baby Busay, Magkanaway, Danao kag Makab-ig sang Brgy Basak; Kansuhe, Kambinagting, Kambanog, Maculos, Bantayan, Tubod, Maka-angkob, Anibong kag Lanipga sang Brgy Tacpao, Maslog kag Binubuhan Gamay sakop sang Brgy Binubuhan; sityo Putat, Pulangi, Antibalas kag Kalakdog sang Brgy Humay-humay.

Ginpangsaka-saka ang mga kabalayan sang mga mangunguma, malawig nga nagatiner sa ila mga puluy-an, simbahan kag eskwelahan. Ginaperwisyo ang mga mangunguma sa pagpanginto sang militar; ginapatawag sila para patambungon sa mga miting sang 4P’s kag asembleya sa barangay. Nagakabalaka ang mga pumuluyo kay direkta militar ang nagapasilidar sa nasambit nga mga miting. Ginasukmatan sila sang mga militar nga nagasuporta kag nagatago sang nga katapo sang NPA.

Oktubre 24 mga las 2:00 sang hapon, ginsaka kag ginpang-ukay ang balay ni Candro Briones sang 10 ka mga militar nga naka-civilian uniform nga nagpakilala nga mga NPA kadungan sa balay sang 2 pa sini nga kaingod. Ginpasibangdan sila nga nagatago sa NPA kag kuno mga NPA supporters. Ang pamilya Briones ang nagapuyo sa sityo Guluwaan, Brgy Bulado, Guihulngan.

Sa pihak sang bagyo Paeng padayon pa ang pag-atake sang militar kag padayon man nga ginahalitan sang pasistang militar ang pananom sang mga mangunguma. Kadungan man sini ang pagpangawat sang ila mga kasapatan kaangay sang manok kag iban pa.

Ginapanawagan sang LPC-NPA sa mga Guihulnganon nga hugot nga maghiliusa agud palayason ang pasistang militar sa kaumahan. Samtang ang tanan nga yunit sang NPA ang maglunsar sang lapnagon nga taktikal nga opensiba agud hatagan hustisya ang mga biktima sang pagpanghalit militar sa sakop sang Guihulngan kag bilog nga Central Negros.###