Kwarisma gid ang nadangtan sang mga mangunguma sa binukid sang Moises Padilla. Naglab-ot na sa masobra 200 ka berdugong 62nd IB ang naglusob sa Sityo Tibubong, Brgy Quinten Remo, Moises Padilla, Negros Occidental. Ginperwisyo sang nasambit nga tropa militar ang pagpamalandong sang pumuluyo sa tion sang kwarisma sa nasambit nga lugar.

Subong nga adlaw, may mga kolum sang 62nd nga nagapangsaka-saka sa mga kabalayan sang mga mangunguma sa mga sityo sang Tiyos, Kansimba, Tapas, Lower Tiyos, Tibubong tanan sakop sang Brgy Quinten Remo, Moises Padilla.

Abril 6 alas 7:00 sang aga-gin-imbestigar kag gilayon ginkastigo si Jesus Molina sang naga-operasyon nga tropa sang 62nd IB sa Sityo Inarawis, Brgy Quinten Remo. Si Molina ang bag-o lang nag-abot sa balay sang iya ugangan sa nasambit nga sityo.

Abril 7 alas 8:00 sang aga- ginsaka kag ginransak sang militar ang balay ni Jeffrey Gella, may asawa kag tatlo ka kabataan. Gin-imbestigar kag pilit nga ginapatudlo ang NPA. Bangud inosente ang biktima sa presenya sang NPA, ginkastigo si Jeffrey pati na ang iya utod nga si Jessel Gella, soltero kag legal ang edad.

May kolum man sang 62nd IB nga makita sa Sityo Inangaw sakop sang Brgy Sandayao, Guihulngan. Mga 1 ka kilometro ang distansya sang Sityo Inangaw, Brgy Sandayao, Guihulngan halin sa sityo Tiyos, Brgy Quinten Remo, Moises Padilla.

Samtang sa proper sang Sityo Tibubong sa amo gihapon nga baryo, ang publiko nga buluthuan ang ginahimo nga kampo militar sang 62nd IB halin kahapon tubtob subong nga adlaw Abril 7, 2023.