Ilaklaksid ken tubtubngaren ti umili a Pilipino ken dagiti rebolusyonaryo a puersa da ti indoktrinasyon ken aglaplapusanan a kampanya a panangallilaw ti pasista a rehimen US-Marcos. Daytoy a kampanya ket linaon iti nabiit a mandar ni Marcos a baleksen ti maysa a sapata ken kantaen ti maysa a saniweng a pammadayaw iti ubbaw daytoy a ladawan ti maysa a “Bagong Pilipinas.”

Ti kampanya nga indoktrinasyon iti “Bagong Pilipinas” ket saan a maiduma iti “Bagong Lipunan” ti diktador nga ama na nga inaramat tapno kalluban dagiti panangabuso idi linteg militar ken papintasen ti imahe iti tiraniko a panagturay ni Marcos.

Ti konsepto ni Marcos Jr iti maysa a “Bagong Pilipinas” ket pasig nga ubbaw ken palso a sarsarita. Pakakitaan daytoy ti peke a “landslide” a panangabak na, ken usaren tapno kalluban ti panagdarugas ken panangallilaw iti umay nga eleksyon tapno papigsaen ti dinastiko a panagturay dagiti Marcos.

Panggep dagiti Marcos iti ar-aramiden a manipulasyon iti panunot a kullaapan ti kapanunotan ti umili iti panangilinged iti daan a nalungsot a sistema ken nu kasano a nakaramut daytoy iti ganggannaet a dominasyon, pasista a pananglapped ken pyudal a panangidadanes ken kadagiti parikut da.

Al-alillawen iti “Bagong Pilipinas” ni Marcos ti umili a Pilipino kadagiti ilusyon ti maysa a “barbaro” a masangoanan. Iti kinapudno, awan ti uray ania man a basaran a “barbaro” iti manangidadanes ken mananggundaway a malakolonyal ken malapyudal a sistema iti Pilipinas ken iti daan a korap a panagturay iti dadakkel a burgesya komprador ken dadakkel nga apo’t daga. Agtultuloy ida nga agpempennek iti kinabaknang, ken agturturay usar dagiti instrumento iti terorismo iti estado.

Awan iti aniaman a barbaro laksid iti lallalo a panagsagaba ti umili a Pilipino. Nabalaho da iti umun-uneg a gayong-gayong iti kinarigat ken bisin. Agsagsagaba da iti nababbaba a sweldo, nasaksaknap a kinaawan daga, disempleyo, pananggamgam iti kabiagan, nangatngato a presyo, padagsen a buwis, ken madaddadael a pampubliko a serbisyo.

Dakdakkel ti nagbaetan iti saad dagiti agtuturturay a dasig ken dagiti magunggundawayan ken maidaddadanes a dasig. Isu nga, determinado ti umili a Pilipino nga itultuloy ti pannakidangadang tapno baliwan ti dana ti pakasaritaan iti pagilian, gun-oden ti nailian a wayawaya, baliwan ti sosyo-ekonomiko a sistema, ken mangibangon iti maysa a pudno a demokratiko a gobyerno. Ilaklaksid ti umili a Pilipino ti “Bagong Pilipinas” ni Marcos ken paspasingkedan ti kinasagana da a makidangadang para iti nailian a demokrasya.