Wala untat ang operasyon militar sa boundary sang banwa sang Cauayan kag syudad sang Sipalay halin pa sadtong Mayo 30 sini nga tuig tubtub subong. Nalab-ot sang ila mga operasyon militar ang walo (8) ka baryo kag 35 ka sityo sa banwa sang Cauayan, kag 2 ka baryo kag 10 ka sitio sa syudad sang Sipalay. May yara 200 tubtub 300 ang kadakuon sang ila nga tropa nga naga-operasyon sa nasambit nga mga lugar.

PAGPALUPOK KAG PAGPAMAHUG. Ginpahug kag ginpalukpan sang 47th IB ang mag-asawa nga Mario Calago sadtong Setyembre 2 samtang nagapamaya sang lubi sa Sityo Pasto, Brgy Inayawan, Cauayan.

Samtang, nag imposar ang militar sang curfew, alas 5:00 sang hapon tubtub alas 5:00 sang aga. Wala na sang pumuluyo nga makaggwa sa ila nga balay kag kaiping nga mga baryo. Madamo ang ginpasurender nga pumuluyo agud gamiton nga pamatuod nga huyang na ang NPA sa lugar.

PAGKASTIGO. Ginkastigo si Raymund Grande sang Sityo Omas, Camindangan, Sipalay City nga ginasugo-sugo man mismo sang nasambit nga tropa militar nga magkuha sa ila nga suplay samtang nagtenir sila sa sityo para sa pagbantay sa proyekto nga taytay ni Vice Mayor Nonoy Montilla sang Sipalay City.

PAGPAMBOMBA. Sadtong Setyembre 27-30, naglunsar sang pagpambomba ang tropa militar gamit ang mortar sa Manlocahoc, Sipalay City halin sa ila detatsment sa Barasbarasan sa amo man nga syudad. Indi magnubo sa 40 ka bilog nga bomba ang ila ginpalupok nga nagtupa sa mga bukid sang Binus-ay, Camindangan. Adlaw-gab-i ang ila pagpambomba nga nagresulta sa kakugmat sang pumuluyo. Dugang pa, nakahalit ini sa duha ka karabaw kag nagtuga sang kadaot sa kinaiyahan.

Suno sa AFP, nagpatawag man sila sang public hearing kag may ihibalo ang lokal nga gobyerno sang Sipalay angot sa natabu.

Hugot nga ginkondena sang Armando Sumayang Jr Command – NPA Southwest Negros Front (ASJC-NPA) ang wala untat nga pagpamahug kag pagpangkugmat sa pumuluyo idalum sa administrasyon ni Marcos II. Pareho sa diktadura sa iya nga amay, magbunga lang ini sang malapad nga kaakig kag pag-alsa sang pumuluyo. Pursigido ang ASJC-NPA nga mahatagan sang hustisya ang mga biktima sa pasista sang estado.###