Read in: English

Samtang nagapadayon ang kanihit sa pagkaon, tukmod sa Covid-19 ug sa gipahamtang sa reaksyunaryong gobyerno nga food blockade ug pag-hamlet sa mga sibilyan, nagapadayon usab ang operasyon sa mga magun-ubong plantasyon ug minahan.

Tungod niini, giparalisa sa mga Pulang manggugubat sa NPA-Misamis Oriental ang tulo ka dumped truck ug usa ka bus sa multinasyunal nga kumpanyang Del Monte Philippines, Inc. sa Sitio Talambao, Brgy. Bulahan, Claveria, Misamis Oriental niadtong Oktubre 6, 2020, sa may alas 10 sa buntag.

Kaniadto usab Oktubre 5, sa may alas-9 sa buntag, giatake usab sa NPA-Misamis Oriental ang tropa sa Special Civilian Active Auxiliary sa MINERGY nga naka-istasyon sa Brgy. Quezon, Balingasag.

Gilunsad ang maong mga pag-atake taliwala sa sustinido ug focused military operation (FMO) nga gilunsad sa AFP sa North Central Mindanao Region. Gilunsad sa AFP ang ilang mga hugna sa FMO sa Bukidnon, Misamis Oriental ug Agusan del Sur ug del Norte ug gipadayon pa ilang operasyon sugod Setyembre hangtud sa kasamtangan.

Nanumpa ang NPA-Misamis Oriental nga pakyason ang militarisasyon ug gipagrabeng pagpangatake sa AFP ug sa rehimeng US-Duterte. Nagapakita lamang kini nga ang walay makab-ot nga kadaugan ang kontra-katawhan ug kontra-rebolusyonaryong gubat ni Duterte.

Dugang pa, kinahanglang igahin sa estado ang iyang pagtagad sa kasamtangang krisis sa Covid-19 imbes nga usik-usikan ang kwarta sa katawhan alang sa militarisasyon ug pagpalit ug mga kahimanang militar. Kung padayong pasagdan sa rehimeng US-Duterte ang yangongo sa katawhan, samtang ginapig-utan sila sa ilang batakang mga katungod, siguradong mag-antos siya sa balos nga hampak niini.