Mabaskog nga ginakondenar sang LPC-NPA ang masingki nga militarisasyon kag pagpanglagas sa mga inosenteng sibilyan sa padayon nga SEMPO/Oplan Sauron sang AFP, PNP kag Duterte Death Squad sa Negros Oriental.

Pebrero 24, 2019 alas 3:00 sa kaagahon, ang wala kaluoy nga pagsunog sang balay ni Tisoy Pasinabo sa sityo Panagtugas, Trinidad, Guihulngan City. Ang pamilya ni Tisoy Pasinabo isa sa 20 ka pamilya nga 87 ka indibidwal nga nagbakwit sadtong Enero 28, 2019 gikan sa ila lugar padulong sa Roman Catholic Bishop’s House sa San Carlos City, Negros Occidental. Napilitan sila nga nagbakwit bunga sang sobra nga kahadlok kag wala sang kaseguruhan ang ila kabuhi kag pangabuhian bangud sang mapintas nga SEMPO/Oplan Sauron sang AFP, PNP-PRO7, force multipliers nga BPAT, Civil Defense sang Moises Padilla, Negros Occidental kag Duterte Death Squad sa mando sang AFP CentCom sadtong Disyembre 27, 2018 kag padayon pa nga militarisasyon sa sakop sang Guihulngan.

Ginsunog sang ginapatihan nga mga katapo sang 94th IBPA ang balay ni Tisoy Pasinabo matapos nga ginpasalig kag ginpabalik sila ni Vice Mayor Ernesto Reyes sa Guihulngan City, Spo4 Zaldy Delara kag Fr. Edwin Laude sang Social Action Center-Diocese of San Carlos sa ila lugar sadtong Pebrero 7, 2019 sa pagpaseguro sang ila seguridad. Resulta man ini sang natabo nga dialogue sadtong Pebrero 4, 2019 sa San Carlos City sa tunga sang 5 ka kaparian sang Diocese of San Carlos sa pagpanguna ni Fr. Edwin Laude, Vice Mayor Ernesto Reyes sang Guihulngan, 3 ka kapulisan sang Giuhulngan sa pagpanguna ni SPO4 Zaldy Delara, Brgy Captain Milbourn Bustamante sang Trinidad, Guihulngan kag representante sang mga biktima upod sa KAUGMAON/Hustisya Guihulngan Chapter.

Halin sadtong Disyembre 27, 2018 tubtob Pebrero 6, 2019, ang Oplan Sauron/SEMPO sang AFP, PNP kag Duterte Death Squad padayon nga naga-operate sa Guihulngan. Nagresulta ini tanan sang pagpamatay sa 6 ka sibilyan kaangay nila Reneboy Pat, Jimmy Pat, Jimmy Revilla, Jun Kubol kag iban pa. Kapin sa 56 ka balay nga ginransak, 45 ka indibidwal nga ginpanglagas sa planted kag peke nga warrant of arrests sa himu-himo nga kaso, nagdislokar sang 940 ka indibidwal sa sulod sang 188 households, madamo sang pagkabutang kag linibu-libo nga kwarta sang pumuluyo ang ginkawat kag madamo man sang mga pamatan-on kag kabataang estudyante sa baryo ang nag-untat sa ila pagtuon. Sa 33 ka baryo nga sakop sang Guihulngan, halos 9 sini sa mga baryo ang lubos naapektuhan.

Lubos man ginakondenar sang NPA ang illegal nga pag-aresto sang combined forces sang 94th IBPA, CIDG kag SAF-PNP sa himu-himo nga kaso nga “illegal possession of firearms” sa planted nga 45 cal. pistol sa mag-amay nga Guillermo Casipong Sr., 62 anyos kag 2 ka mga kabataan sini nga sanday Jerome Casipong, 29 ang edad kag Guillermo Casipong Jr sadtong Pebrero 22, 2019 alas 2:00 sa kaagahon sa sityo Tabalugo, Brgy Budlasan, Canlaon City, Negros Oriental. Pilit nga ginpaggwa sa iya puluy-an si Emilio Mahinay kag ginatayaan sang armas ang ulo sini sang mga katapo sang 94th IBPA samtang gina-imbestigar. Kadungan man sini ang illegal nga pag-aresto kay Francing Maribong sang nasambit gihapon nga lugar. Gilayon sila gindala sa costudial facility sang Canlaon City Police Station. Ginhilway gilayon si Emilio Mahinay, Guillermo Casipong Jr. kag Jerome Casipong bangud wala sang nagakaigo nga ebidensya. Samtang naga-antus sa prisohan sila Francing Maribong kag Guillermo Casipong sa illegal possession of firearms nga kaso gikan gintanom nga armas sa ila sang 94th IBPA, CIDG kag SAF-PNP.

Ang nasambit nga ilegal nga pag-aresto ginpamunuan ni PS/Insp. Ruben E. Verbo Jr. kag PO1 Ronnel Caisio dala ang peke nga warrant of arrest nga pirmado ni presiding judge Mario Trinidad nga ang armas nakatatak .357 apang ang nakuha planted nga 45 cal. pistol.

Dugang naman ini sa malaba na nga listahan sang wala-untat nga human rights violations, paglapas sa CARHRIHL kag pagpasingki sang militarisasyon sang state security forces ilabe na sang 94th IB, 62nd IBPA kag SAF-PNP sa Central Negros idalom sa mapintas nga SEMPO/Oplan Sauron sang US-Duterte nga rehimen.