Mabaskog nga ginakondenar sang Leonardo Panaligan Command-New People’s Army Central Negros Front (LPC-NPA) ang planado nga pagpatay sang berdugong 94th IB kay Ka Juanito Magbanua (Romeo Nanta), tagpamaba sang Apolinario Gatmaitan Command – New People’s Army Negros Island Regional Operational Command (AGC-NPA).

Lunsay kabutigan kag patalang ang mga palayag ni B/Gen. Inocencio Pasaporte sa publiko kaangot sa sirkumstansya sang kamatayon ni Ka Juanito Magbanua. Wala sang engkwentro nga natabo sadtong Oktubre 10, 2022 sa Sityo Medel, Brgy Carabalan, Himamaylan City. Ang matuod gindakop kag hungod nga ginpatay si Ka JM sang berdugo kag pasista nga 94th IB sa mando ni Maj. Gen Benedict Arevalo sang 3ID kag B/Gen. Inocencio Pasaporte sang 303rd Bde PA. Ang planado nga pagpatay sang 94th IB kay Ka JM, gingamit ni Pasaporte kag Arevalo nga “pataas moral” sa nagahuyango kag nagakakurdam nga tropa militar sa pagpakig-away batok sa NPA. Nadumduman antis pa nga ginpatay sang militar si Ka JM, nag-agum na sang kaswalidad (2 patay, 6 samaron) ang 94th IBPA.

Lubos ang pagkabalaka ni Ka JM sa pumuluyo sang Brgy Carabalan, Himamaylan bangud sang natabo nga engkwentro sa tunga sang NPA kag tropa sang 94th IB. Kabalo ang CPP-NPA sa isla nga kon may kaangay sini nga hitabo, ang sibilyan ang paukpan sa pasistang AFP labi na gid kon may mga kaswalti sa ila hanay. Gani daku ang kahangawa ni Ka JM sa mga pumuluyo sang Himamaylan bangud nahisayran mismo ni Ka JM ang militarisasyon kag laye militar nga nagluntad sa lugar ilabe na gid ang pagduging sa mga checkpoints nga ginmuntar sang AFP kag PNP, ang patarasak nga pagpamomba, wala puntariya nga pagpaniro halin sa helikopter kag mga operating troops sang 94th IB, pagpangransak sang mga puluy-an sang mangunguma, pagpangkastigo sang mga sibilyan sang AFP partikular na sang berdugong tropa sang 94th IB idalum sa 303rd BdePA diin nagtuga sang linibo-libo nga nag-ebakwit nga pumuluyo sang Brgy Carabalan kag mga kasikbit sini nga mga baryo.

Makabig si Ka JM nga hors de combat ukon wala na sang ikasarang magbato bangud sang ginabatyag sa lawas. Ina nga panahon ga-antus si Ka Juanito sang hypertension kag arthritis. Diin na ang ginasugid ni Arevalo kag Pasaporte nga naga-obserbar ini sang mga laye sa gyera? Ang pagpatay sang 94th IB kay Ka JM, mga rebolusyonaryong masa kag aktibista; “PASISTA, MERSENARYO kag REAKSYONARYO ang matuod nga tatak sang AFP, PNP kag iban pa nga armadong pwersa sang mapintas nga estado partikular na sang terorista nga rehimeng US-Marcos II.

“Mapatay man ang REBOLUSYONARYO, indi ang REBOLUSYON!” kaangay lang sang mapintas nga pagpatay sang militar kay Ka Juanito Magbanua. Madula man si Ka JM apang ang iya gintudlo sa masang ginahimuslan kag ginapigos ilabe na sa mga Negrosanon magpabilin. Mahilway lamang ang sahing anakbalhas sa kamot sang imperyalismo, burukrata-kapitalismo kag pyudalismo sa tunga sang mapiguson kag mahimuslanon nga malakolonyal kag malapyudal nga sosyedad Pilipino paagi lamang sa pagtib-ong kag pagsulong sang armadong paghimakas. Ini ang indi madula sa kaisipan sang mga mangunguma, mamumugon, kabataan, propesyunal kag iban pa nga sektor. Ang buhi nga inagihan kag kina-alam ni Ka JM sa pagrebolusyon, ang sulundon kag inspirasyon sang mga isganan nga kadre sang Partido, Pulang kumander, Pulang hangaway, mga rebolusyonaryong masa ilabe na sang mga pamatan-on kag kabataang-estudyante upod sa sandigan nga alyansa sang sahing mangunguma kag mamumugon.

Ka JM baganihan ka sang armadong rebolusyon!
Handa kag pursigido kami nga magsugpon sang imo ginsugdan sa rebolusyon!
Ikaw ang amon buhi nga handumanan kag inspirasyon!
Mabuhay ang Demokratiko nga Rebolusyon sa Banwa nga may sosyalistang perspektiba!
Ka JM, Mabuhay ka!