GINDIS-ARMAHAN nga wala sang lupok sang NPA – Mt. Cansermon Command si Lorenzo Zayco Varela sadtong Enero 10, alas 8 sang gab-i sa iya nga balay sa Sitio Lower Balicaocao, Brgy. Urong, Kabankalan City, bangud sa iya nga kaso nga pagpalupok, pagpaniro gamit ang armas kag pagpamahog sa pumuluyo sa palibot.

Nakuha sa iya nga residensya ang 1 ka .22 kalibre nga riple, 2 ka shotgun, 2 ka 9mm nga pistola, 1 ka .357 cal nga pistola, 2 ka hand grenade, gatusan ka mga bala sa nagakalain-lain nga armas, kag mga iban pa nga kagamitan militar.

Sa amo nga panghitabo, wala ginhilabtan sang mga pulang hangaway ang mga personal nga kagamitan kaangay sang kwarta kag cellphone, lain sa mersenaryong AFP kag PNP nga luwas sa pagdakop sa mga inosenteng sibilyan, nagakuha pa gid sang libu-libo nga kwarta halin sa mga pumuluyo sa madamo nga higayon sa lain-lain nga bahin sa Negros kag sa bilog pungsod. ###