Lab-as pa ang double murder case kag massacre nga ginkomiter ni SB Agustin “Nene” Grande upod sa mga katapo sang BPAT, Civil Defense kag armadong goons ni Magsie Peña nga nag-utas sang kabuhi nila SB Michael Garcia kag running SB Candidate Mark Garcia sadtong Abril 25, 2019 sa Hda. Dresdin, Brgy. Inolingan, Moises Padilla.

Ini nga mga kalakasan ni Nene Grande kasugpon lang sang malaba na nga listahan sang mga kontra-pumuluyo sini nga mga kahimuan. Si Nene Grande ang kakunsabo man sang iya utod nga si Nonong Grande sa pagpangilkil sa mga CARP beneficiaries sang Magallon diin ginkuhaan ang mga ini sang tag singko mil pesos (P5,000.00) kada cropping sang tubo. Ginareklamo man sang mga driver sang trucking sa tubo ilabe na ang mga small planters ang garapalan nga pagpangdaya sang Ma. Cecilia Transloading diin ginapanag-iyahan ini ni Nene Grande. Panahon nga magreklamo ang mga biktima ginapaisug-isugan, habuyan sang malain nga mga tinaga kag ginapahug sila ni Nene Grande.

Saksi ang tanan nga pumuluyo sa Magallon nga indi hamulag si Nene Grande sa mga kontra-pumuluyo nga mga kalakasan ni Magsie Peña. Isa sa mga utok si Nene Grande sa pagpapatay kay Jerry Turga paagi kay Regie Lopez nga isa man sa mga tinawo ni Magsie sa mando mismo ni Mayor Magdaleno “Magsie” Peña sadtong nagliligad nga mga tinuig.

Si Magsie Peña kag Nene Grande man ang nagpadakop kay Brgy Kagawad Junjun Opiar sang Brgy. Macagahay, Magallon kag pila pa ka iban para kuhaan sang affidavit kag himuon nga witness batok sa pila man ka indibidwal nga pangontra sang Montilla-Peña nga bloke. Kakutsaba man diri si Col. Igberto Dacoscos sang 62nd IBPA.

Kabutigan ang ginawakal ni Nene Grande nga si Joe Ceazar nga katapo sang BPAT indi niya kilala. Ang BPAT ang ginasweldohan sang local nga gobyerno sang Magallon paagi kay SB Jolomar “Julo” Hilario bilang budget and appropriation committee sang Moises Padilla. Tanan nga BPAT kag Civil defense member ang pinili nga mga indibidwal sandig sa kagustuhan ni Nene Grande kag Magsie Peña. Kag tanan man nga BPAT kag Civil defense ang masami nagayaub sa mga mando ni Nene Grande kag ni Mayor Peña.

Militarisasyon kag intimidasyon sa kasumpong sa pulitika ang pinakatuyo ni Peña sa Magallon pabor sa iya kaugalingon nga interes kag poder. Tuyo man ni BGen. Benedict Arevalo sang 303rd BdePA kag Police Col. Romeo Baleros nga pahugon ang pumuluyo paagi sa terorismo sang estado sa mando sang US-Duterte nga rehimen.

“Marka bahala” na lang si BGen. Arevalo kag Police Col. Baleros nga hambalon sang publiko ilabe na sang pamilya Garcia nga “inutil” bangud sa pihak sang intense military operations sa Moises Padilla nahimo pa ang pagmasaker sa grupo ni Vice Mayor Ella Garcia nga ginkamatay nila SB Michael Garcia kag Mark Garcia.

Ang matuod, kakutsaba ang PNP Magallon sa pagpamuno ni Police Capt. Jojie Liba, Police Col. Baleros sang NOCPPO kag BGen. Benedict Arevalo sang 303rd BdePA sa maitom nga buko ni Magsie Peña batok sa pamilya Garcia. Wala man makibot ang LPC-NPA nga hilwayon sang reaksyunaryong korte si Nene Grande sa pihak sang mga ebidensya. Mas labi nga wala na ginkatingala sang NPA nga “tikup-bibig” sila Arevalo kag Beleros sa pagmensyunar sang ngalan ni Mayor “Magsie” Peña nga amo ang utok sa pagmasaker sa pamilya Garcia sa pihak sang maisog nga pagtumod sang mga biktima.

Ang pag-operate kag pag-aresto sang PNP tubtob pag-inquest sang reactionary judicial court kay SB Agustin “Nene” Grande kag Joe Ceazar, lunsay “diversionary tactics” kag isa ka sistematiko nga “ritual” sa paghilway kay Mayor “Magsie” Peña bilang utok sa nasambit nga krimen.

Kon nahilway man si Nene Grande kag Magsie Peña sang reaksyunaryong korte sa pagmasaker sa pamilya Garcia, sa mando sang Rebolusyonaryong Korte sang Pumuluyo, ang NPA indi gid mag-untat sa pagpangita sang hustisya para sa mga biktima. Padayon nga maglagas kay Magsie Peña, Nene Grande kag iban pa nga mga perpetrators agud pasabton sang ila mga kalakasan batok sa pumuluyo kaangay sang ginhimo sang NPA kay SB Jolomar “Julo” Hilario.

Ang pagdako sang tropa militar sa Magallon kag pagparada sang mga tangke de gyera sa publiko indi simple lang nga COMELEC control kundi laragway sang de facto martial law kag kongkreto nga dagway sang militarisasyon para pahugon ang NPA kag pumuluyo. Taliwas ini sa mga justifications ni BGen. Benedict Arevalo sang 303rd BdePA.

Madugay na ini nga ginahandaan sang LPC-NPA kag bug-os nga rebolusyonaryong masa. Isulong ang Armadong Paghimakas! Paslawon ang de facto martial law sa Negros! Ilunsar ang lapnagon nga taktikal nga opensiba batok sa tuta kag pasistang AFP, PNP kag iban pa nga kontra-pumuluyo nga mga armadong hubon!