Kabutigan kag makahuluya nga ginawakal sang 62nd IB sa pagpamuno ni L/Col. William Pesase Jr bilang commanding officer nga may pito ka katapo sang New People’s Army (NPA) ang boluntaryo nga nagsurender sang nagligad nga Disyembre 26, 2023.

Ginpresentar sang pasistang tropa sang 62nd IB kay Mayor Filomino “Mikoy” Reyes sang Guihulngan City, Negros Oriental sadtong Disyembre 27, 2023 matapos nga boluntaryo kuno nga nagsurender ang pito ka NPA nga ginkilala sanday @Arwin, @Gigi, @Juco (Jason Juliano), @Bulantoy (Ian Bayno), tanan sang Barangay McKinley kag @Lenlen (Connie Remasog) kag @Pete (Regie Remasog)- mag-asawa sang Sityo Compound, Barangay Luz kag @Pilo (Felix Garde) sang Sityo Kalusa, Barangay Tacpao, sakop tanan sang Guihulngan City.

Ang matuod, madugay na sila nga nagpahuway kag nagpangabubi nga mga sibilyan bangud sang mga masunod nga sirkumstansya:

1. Si @Arwin boluntaryo nga nag-angot sa NPA matapos nga ginlagas siya sang pasistang militar kag PNP sa natabo nga Oplan Sauron sadtong Disyembre 2018. Nakasulod siya sa yunit sadtong tunga-tunga sang tuig 2020 kag 2021, nagpangasawa kag nagpanguma sa Barangay Riverside, Isabela, Negros Occidental. Tumandok sang Sityo Panagtugas, Barangay Trinidad, Guihulngan City si Arwin. Taliwas sa ginawakal sang militar nga tumandok siya sang Barangay McKinley.

2. Si @Gigi ang tumandok sang Barangay Puso, La Castellana, Negros Occidental. Boluntaryo man nga nagpasakop sa NPA sadtong tuig 2021. Pila lang ka bulan, pilit nga naggwa sa yunit kay may nakomiter nga kasaypanan sa pulitika kag indi tampad nga mag-atubang sa iya mga sayop. Rason nga nagpahuway ini, nagpangasawa kag nagpangabuhi nga sibilyan sa Brgy Riverside, Isabela. Indi tumandok sang Barangay McKinley si @Gigi taliwas man sa ginapabula sang pasistang militar.

3. Si @Juco (Jason Juliano) ang tumandok sang Sityo Caliban, Barangay Banog-banog, Isabela, taliwas sa ginawakal sang militar nga taga-Barangay McKinley, Guhulngan City. May rekord nga drug addict kag nabudlayan magpangibabaw sa iya malain nga bisyo.

4. Si @Bulantoy (Ian Bayno)- indi man pasado sa NPA bangud may kaso nga rape sa reaksyonaryong korte. Abril 2023 tuyo nga boluntaryo magsulod sa NPA. Bangud nga ginapangita sang reaksyonaryong otoridad, nagkadto sa yunit, apang Setyembre 2023 ginpaggwa sa NPA kag gin-endorsar sa pamilya. Si Bulantoy ang tumandok sang Sityo Caliban, Barangay Banog-banog, Isabela kag binutig nga taga-Barangay McKinley, Guihulngan City.

5. Si @Lenlen (Connie Remasog) kag Pete (Regie Remasog)-ang mag-asawa nga Remasog sang Sityo Compound, Brgy Luz, Guihulngan City. Sila nga duha ang boluntaryo man nga nagserbisyo sa NPA sadtong tuig 2020 matapos nga ginpatay sang pasistang 62nd IB ang ila pinalangga nga anak (Rekim Remasog) kag illigal nga gin-aresto sang nasambit nga tropa militar ang isa pa sini nga anak nga si Reneil Remasog sadtong 2020. Ginpasibangdan sila nga supporter sang NPA. May limitasyon ang mag-asawa sa ikaayong lawas rason nga indi sila pasado sa NPA. Si Regie ang may deperensya sa iya pagpamati (bungol) kag si Connie ang may nervous breakdown. Rason nga tuig 2021 ginpaggwa sila sa NPA kag nagpangabuhi na nga mga sibilyan.

6. Si @Pilo (Felix Garde) ang tumandok sang Sityo Kalubasa, Barangay Tacpao, Guihulngan. Tuig 2016 boluntaryo man nga nagpasakop sa NPA. Apang indi pasado sa NPA bangud sang sulundon nga sakit sa paminsaron (naga-abot ang panahon nga nagaliso ang paminsaron bangud sang nervous breakdown). Bangud masami ginalagas sang militar sa ila lugar, tuig 2021 ginpalayo siya sa lugar. Tuig 2023 liwat nga na-nervous breakdown, nabuang kag indi na makontrol. Gindakop sang militar sa Brgy Santol, Binalbagan. Indi man matuod nga Political Instructor (PI) si Felix Garde nga ginapabula sang 62nd IB.

Ang matuod, madugay na nga iligal sila nga ginpang-aresto sang 62nd IB, ginatipon ang mga ini sa 62nd IB Alpha Coy HQ nga nahamtang sa Barangay McKinley, Guihulngan City kag pilit nga ginagamit sa mga operasyon militar. Saksi ang mga pumuluyo kag mga biktima sang mga kalakasan sang berdugong 62nd IB sa mga partisipasyon sang pito sa nasambit nga kalakasan.

Si Jason Juliano kag Ian Bayno upod sa tropa sang pasistang 62nd IB ang nagransak sang balay kag nangilkil sang P2,000.00 sa pamilya Garsula sa Sityo Patag, Barangay Riverside, Isabela, sadtong November 2023 sa mando sang 62nd IB. Si @Juko, @Bulantoy kag @Pilo ang kabahin man sa brutal nga pagpatay kay Braulio, “Bunny” Tubalado sang Sityo Karanawan, Barangay Amuntay, Binalbagan, Negros Occidental. Nakilal-an nga si @Pilo ang nagtrigger sa pagtiro-patay kay Tubalado sa mando sang 62nd IB sadtong December 2023. Samtang si @Pete kag @Lenlen ang nagserbe giya sa mga operasyon sang militar sa mga Barangay sang Linantuyan kag Luz tanan sang Guihulngan City kag Barangay Makilignit sang Isabela.

Ginagamit lamang ang pito ka mga sibilyan ang kuno “boluntaryo nga pagsurender” bilang ritwal tayming sa pagsaulog sang ika-55 nga anibersaryo sang Communist Party of the Philippines (CPP) sadtong December 26, 2023 sa likod sang recycled kag peke nga mga surenderees. Gusto lang sabotahion sang militar ang signipikante nga kahiwatan sang mga kadalag-an sa sulod sang masobra lima na ka dekada nga armadong paghimakas sa absoluto nga pagpamuno sang CPP sa NPA. Samtang himuon naman nga gatasan sa lapnagon nga korapsyon sang mga matag-as nga opisyal militar kag NTF-Elcac ang pilit nga pagpasurender sa mga sibilyan paagi sa E-CLIP kag Barangay Development Program.###