[PRWC Party Documents] Stand For Socialism Against Modern Revisionism, Enero 15, 1992

Manindugan Para sa Sosyalismo Batuk sa Modernong Rebisyunismo

IV. Pila ka mga Leksyon Halin sa Pagkarumpag sang Modernong Rebisyunismo sa Unyon Sobyet kag Nasidlangan nga Europa

Read in English Basahin sa Pilipino

Armando Liwanag, Tagapangulo, Partido Komunista ng Pilipinas

Enero 15, 1992

Labing malahalon nga maghimo sang isa ka malip-ot kag nagakaigo nga paglaragway sang mga nagaharing partido kag rehimen sa Unyon Sobyet kag Nasidlangan nga Europa, ang krisis nga maathag nga nagatublag sa ila sugod sang temprano sang dekada 1980 kag ila pagbagsak humalin 1989 asta 1991. Ining nagahari nga mga partido kag rehimen mga rebisyunista. Ang ila krisis kag pagkabagsak indi iya sang sosyalismo kundi iya sang moderno nga rebisyunismo ukon pagpanumbalik sang kapitalismo nga nagapakuno-kuno nga sosyalismo. Ang wala panabon-tabon nga pagpanumbalik sang kapitalismo kag makasahing diktadurya sang burgesya amo ang indi matago nga pruweba. Ang pagbadbad sang mga rebisyunista nga sistema kag ang pagladlad sang kamatuoran pila ka tuig antes ang pagkabagsak nga natabo sa atubang sang aton mga mata.

May pang-ideolohiya kag pangpulitika nga kagumon kon ang krisis kag pagkabagsak sang mga rebisyunista nga nagaharing partido kag rehimen malaragway nga iya sang sosyalismo sangsa iya sang moderno nga rebisyuinismo. Ang ini nga paglaragway nagapadayon sa pagkilala sa moderno nga rebisyunismo bilang sosyalismo. Tanan nga Marxista-Leninista dapat malig-on nga magkilala sang pamatuod nga ang sosyalismo ginsuhot kag nangibabaw ang moderno nga rebisyunismo sang madugay antes maglumoy ang moderno nga rebisyunismo sa isa ka krisis nga nagdul-ong sa pagkabagsak sang mga rebisyunista nga nagaharing partido kag rehimen sang 1989 kag 1991.

Makahambal lang ang isa sang krisis sang sosyalismo kon nagapamensar siya nga ang moderno nga rebisyunismo amo ang sosyalismo kag naga-obserbar sa krisis kag pagbagsak sang mga nagahari nga partido kag rehimen. Ang mga imperyalista, mga rebisyu-nista mismo kag ang burges-intelihensya ang simple magatawag sang krisis kag pagbagsak sang sining mga anti-Stalin nga partido kag rehimen bilang "krisis sang Stalinismo" ukon sang "Stalinistang modelo sang sosyalismo". Napatay na si Stalin sang 38 ka tuig kag isa ka proseso sang "de-Stalinisasyon" ang nagluntad sa nagtaliwan nga 35 ka tuig.

Ang kaladlawan nga madugay na siya nga napatay ginabasol gihapon si Stalin sang iya mga kaaway ukon sang wala niya nahimo sa nasambit nga tinuig. Lunsay pagpanabon kag kulto sang personahe ang kabaliskaran sini! Ang mga merito kag demerito sang isa ka lider dapat lang konsiderahon sa sulod sang iya panahon sang responsibilidad luwas lang kon ang katuyuan indi ang paghimo sang istorikal nga pagtasar kundi pakalainon ang isa ka lider kag maghimo sang saywar agud atakehon ang Marxismo-Leninismo kag sosyalismo sa isa ka burges nga pamaagi sang pagpersonalisa. Ang mga moderno nga rebisyunista indi dapat tugutan sa pagtabon sang ila responsibilidad sa sakop sang ila panahon sang paggahum mismo. Sa pagkamatuod, ang dungganon nga hinimuan ni Stalin sa sosyalistang konstruksyon kag pagpangapin sa Unyon Sobyet kontra sa pagpanumbalik sang kapitalismo kag sa pagbungkag sang Unyon Sobyet sang modernong rebisyunista.

Dapat kita nga magkuha sang husto nga mga leksyon sa mga pagluib kag pagpanabotahe sa sosyalismo sang mga moderno nga rebisyunista halin kanday Khrushchov pakadto kay Gorbachov. Dapat pamatukan naton ang mga pwersa kag elemento nga buot magwasak sa Partido kag sa rebolusyonaryo nga kahublagan halin sa sulod sa pagsunod-sunod kay Gorbachov kag sa kapareho sini kag sa pagpamatuk sa mga basehan nga rebolusyonaryong prinsipyo sang Partido.