[PRWC Party Documents] Stand For Socialism Against Modern Revisionism, Enero 15, 1992

MANINDUGAN SA SOSYALISMO BATUK SA MODERNO NGA REBISYUNISMO

III. Ang Proseso sang Kapitalista nga Pagpanumbalik

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

Ang mga rehimen nanday Khrushchov, Brezhnev kag Gorbachov nagmarka sang tatlo ka mga halintang sang kapitalista nga pagpanumbalik sa Unyon Sobyet, isa ka proseso sang pagpahuyang kag pagguba sa dungganon nga mga kadalag-an sang proletaryadong Sobyet kag pumuluyo sa idalom sang pagpamuno nanday Lenin kag Stalin. Ining proseso nagasakop man sang Nasidlangan nga Europa.

Ang rehimeng Khrushchov nagpa-hamtang sang pundasyon sang moderno nga rebisyunismo nga Sobyet. Ang rehimeng Brezhnev lubos nga nagdebelopar sini sa isa ka mas malawig nga panahon kag ang nagkambyo sang sosyalismo sa monopolyo nga burukrata kapitalismo kag ang rehimeng Gorbachov nagkumpleto sang trabaho sang moderno nga rebisyunismo paagi sa pagwasak sa nabilin nga mga marka sang sosyalismo kag lubos nga nagbungkag sang sosyalistang dekorasyon sang mga rebisyunista nga rehimen sa Nasidlangan nga Europa kag sa Unyon Sobyet. Sa katapusan, iya ginwasak ang Unyon Sobyet nga gintukod kag ginpangapinan nanday Lenin kag Stalin.

Agud ibalik ang kapitalismo, ginrebisa sang mga rehimen sang rebisyunista nga Sobyet ang mga basehan nga prinsipyo sang sosyalistang rebolusyon kag konstruksyon kag nag-agi sa mga halintang sang ginhinabunan nga kontra-rebolusyon sang 38 ka tuig, 1953 asta 1991. Isa ini ka talaksan sang kadungganan nanday Lenin kag Stalin nga ang ila mga kadalag-an sa 36 anyos sang sosyalistang rebolusyon kag konstuksyon nagkuha sang malapit apat ka dekada agud mabungkag. Ginhinguyang ni Stalin ang total nga 20 anyos sa sosyalistang konstruksyon. Ang mga rebisyunista nga traidor nagkuha sang mas malawig nga panahon sa pagpanumbalik sang kapitalismo sa Unyon Sobyet.

Sa pareho nga sakop sang panahon, ang mga rebisyunistang rehimen tuso nga nagpakuno-kuno sa pag-atake kay Stalin agud atakehon ang mga pundasyon sang Marxista-Leninista nga teorya kag praktika kag sang ulihi nagkondenar kay Lenin mismo kag sa bilog nga dalagan sang kasaysayan Sobyet kag sa katapuan waskon ang Unyon Sobyet. Ang mga rebisyunista nga traidor sa ila malawigan nga "de-Stalinisasyon" nga kampanya nagbasol kay Stalin lampas sa iya kamatayon sa ila mismo nga kasal-anan kag bisan mismo sang ila mga kapaslawan. Halimbawa, ila mismo ginpalala ang burukra-tismo sa pag-alagad sang kapitalista nga pagpanumbalik pero ila gihapon ginabasol sini si Stalin nga madugay na nga napatay.

Si Tito sang Yugoslavia may pinasahi nga pagkatuhay bilang tagpanguna sang moderno nga rebisyunismo. Sa pag-oponer kay Stalin, naglisa siya sa mga basehang prinsipyo sang sosyalistang rebolusyon kag konstrksyon sang 1947 kag nagbaton sang pangpulitika kag materyal nga mga suporta halin sa Nakatundan. Nagpamalibad siya sa paglunsar sang reporma sa duta kag kolektibisasyon. Iya ginpreserbar kag ginsakdag ang burgesya paagi sa burukrasya kag pribado nga negosyo, ilabi na sa porma sang mga pribado nga kooperatiba.

Ginkonsiderar niya nga yabi sa sosyalismo indi ang pangpubliko nga pagpanag-iya sang kagamitan sa produksyon; pang-ekonomya nga pagplano kag dugang nga pagpauswag sang mga produktibo nga pwersa kundi ang gilayon nga desentralisasyon sang mga kumbuyahan; ang ginatawag nga kuno kaugalingon nga pagdumala sang mga mamumugon nga sa aktwal ginakumbinar sang burukratismo kag anarkiya sang produksyon; kag pagpagana sang hilway nga baligyaanay (lakip ang mga epektos nga gin-import sa Nakatundan nga mga pungsod) sandig sa nagaluntad kag wala napauswag nga lebel sang produksyon. Sa pagmis-interpretar sa New Economic Policy ni Lenin bilang pinakamodelo para sa sosyalista nga pang-ekonomya nga pag-uswag, siya ang una nga pinuno sang estado sa paggamit kay Lenin batuk kay Lenin kag Stalin.