[PRWC Party Documents] Stand For Socialism Against Modern Revisionism, Enero 15, 1992

MANINDUGAN SA SOSYALISMO BATUK SA MODERNO NGA REBISYUNISMO

II. Ang Palanublion kanday Lenin kag Stalin

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

Ang pulang bandera sang Unyon Sobyet nahulog na. Ang tsarista nga bandera sang Rusya amo na ang nagawagayway sa ibabaw sang Kremlin. Pila lang ka panahon nga ang lawas sang dungganon nga Lenin halinon sa iya mausuleyo sa Red Square, luwas lang kon ang bag-o nga burgesya sang Rusya nagakabig sini nga makuwartahan nga talan-awon sang mga turista.

Ang moderno nga rebisyunista nga Sobyet, halin kay Krushchov pakadto kay Gorbachov naggamit sang ngalan ni Lenin sa pag-atake kay Stalin. Apang sa pagkamatuod ang lubos nga pagnegar kay Stalin amo man ang lubos nga pagnegar kay Lenin kag Leninismo, sosyalismo, sa Unyon Sobyet kag sa bug-os nga dalagan sang Bolshevik kag kasaysayan Sobyet. Ang burgesya sa anay Unyon Sobyet wala nakontento sa ano man kundi sa hayag nga pagpanumbalik sang kapitalismo kag sa imposisyon sang makasahing diktadurya sang burgesya.

Nagakinahanglan nga palab-ason naton ang kaugalingon sa ginpanubli nanday Lenin kag Stalin sa atubang sang tingub nga pagtinguha sang mga imperyalista, sang mga moderno nga rebisyunista, ang mga walay huya nga tagpanumbalik sang kapitalismo, kag ang anti-komunistang burges nga intelihensya sa pagpakalain kag pagsamad sini.

Ang kadungganan ni Lenin makita sa dugang nga pagpauswag sa tatlo ka sangkap sang Marxismo: pilosopiya, ekonomya pangpulitika kag syentipikong sosyalismo. Isa siya ka dungganon nga master sang Marxismo sa panahon sang moderno nga imperyalismo kag proletaryong rebolusyon.

Nagpadalom pa gid siya sa diyalektiko materyalismo, nagtumod nga ang paghiliusa sang magkabanggi amo ang labing pundamen-tal nga layi sang materyal nga realidad kag transpormasyon kag nagpakigbanggi sang maid-id kag madalom sa ginatawag nga "ikatlong pwersa" nga suhetibistang pilosopiya (empirio-criticism).

Gin-analisa niya ang moderno nga imperyalismo kag ginhimo ang teorya sang indi alalangay nga pag-uswag, nga nagpaathag sang posibilidad sang sosyalistang rebolusyon sa pinakamahuyang nga bahin sang kalibutanon nga sistemang kapitalista. Nagpalawig siya sa Marxista nga teorya sang estado kag rebolusyon. Malig-on siya nga nagpanindugan para sa proletaryado nga makasahing paghimakas kag diktadurya sang proletaryado batuk sa mga klasikal nga rebisyunista kag aktwal nga nagpamuno sa una nga sosyalistang rebolusyon.

Ang mga idea ni Lenin gintilawan sa mga debate sa sulod sang Ikaduha nga Internasyunal kag sa sulod sang Russian Social Democratic Labour Party (RSDLP). Ang proletaryado nga rebolusyonaryong linya nga ginadala niya kag sang iya mga kaupod nga Bolshevik husto kag madinalag-on sa pagpakigbanggi sa nagkalain-lain nga burges nga idea kag mga pormasyon nga nagpakig-away sa paggahum sa paghimakas batuk sa tsarista nga aristokrasya.

Ginahambal naton nga ang sosyalistang rebolusyon nagsugod sang Nobyembre 7, 1917 bangud sa sini nga adlaw ang pumuluyo sa idalom sang pagpamuno sang proletaryado paagi sa Bolshevik nga Partido nag-agum sang gahum pangpulitika halin sa burgesya. Sa sini nga punto ang diktadurya sang proletaryado naestablisar. Bangud sini, si Lenin ginakonsiderar nga dungganon nga tagapundar sang sosyalismong Sobyet. Diktadurya sang proletaryado amo ang una nga rekisito sa pagtukod sang sosyalismo. Kon wala sining gahum, ang sosyalistang rebolusyon indi matigayon. Sa sini nga gahum natigayon ni Lenin nga mahimo ang nasyunalisasyon sang duta kag mga kapital nga propyedad sang mga sahing mapanghimulos kag ginpamunuan ang ekonomya.

Ang makasahing diktadurya sang proletaryado sa iban nga pulong amo ang gahum pang-estado nga kinahanglanon sa pagwasak kag pag-ilis sang gahum pang-estado ukon makasahing diktadurya sang burgesya, para sa pagpatuman sang tanan-nga-bahin nga sosyalistang rebolusyon kag para punggan ang mga kontra-rebolusyonaryo sa pag-agaw sang kontrol sang sosyedad.

Ang diktadurya sang proletaryado sa amo nga tion amo man ang demokrasya sang proletaryado kag demokrasya para sa bilog nga pumuluyo, ilabi na sang mga anak-balhas nga mamumugon kag mangunguma. Kon wala ginapatuman ang diktadurya sang proletaryado batuk sa ila mga makasahing kaaway, ang proletaryado kag ang pumuluyo indi makatam-id sang demokrasya sa kubay nila. Diktadurya sang proletaryado amo ang bunga sang pinakamataas nga porma sang demokratikong aksyon-- ang rebolusyonaryo nga proseso nga nagapukan sa diktadurya sang burges. Garantiya ini sang demokrasya sang pumuluyo batuk sa mga lokal kag eksternal nga makasahing kaaway, ang mga lokal nga mapanghimulos nga sahi kag ang mga imperyalista.

Ang mga Bolsheviks nangin madinalag-on bangud hugot nila nga ginpangapinan ang proletaryado nga makasahing diktadurya. Nakatuon sila sang maayo sa mga leksyon halin sa kapaslawan sang Paris Commune sang 1871 kag sa repormismo kag pagluib sang mga sosyal demokratiko nga partido sa Ikaduha nga Internasyunal.

Kapot ang diktadurya sang proletaryado, ang mga Bolsheviks nagbungkag sang Enero 1918 sang Constituent Assembly nga ginboto pagkatapos sang Oktubreng Rebolusyon pero ginadominar sang mga rebolusyonaryo nga sosyalista kag sang mga Mensheviks bangud ang asembleya nagpamalibad sa pagratipika sa Deklarasyon sang mga Kinamatarung sang Nagatrabaho kag Ginahimuslan nga Pumuluyo. Masunod, ang mga Bolsheviks nagdumuli sa mga burges nga partido bangud ining mga partido naglunsar sang kontra-rebolusyonaryong kakahas kag gyera sibil kag nagakunsabo sa mga mapangsilabot nga dumuluong.

Kutub sang buhi siya, ginpamunuan ni Lenin ang proletaryado nga Sobyet kag pumuluyo kag ang mga Sobyet sang mamumugon, mangunguma kag suldado sa kadalag-an sa gyera sibil kag sa gyera batuk sa mga mapangsalakay nga pwersa humalin sang 1918 pakadto sa 1921. Ginkonsolida niya ang Unyon Sobyet bilang isa ka unyon nga federal sang mga sosyalistang republika kag nagtukod sang mga kongreso sang mga Sobyet kag mga nasyunalidad. Bilang isa ka proletaryo nga internasyunalista, iya gintukod ang Ikatlo nga Internasyunal kag nagbalay sang anti-imperyalista nga linya para sa proletaryado sa kalibutan kag sa tanan nga ginapigos nga pungsod kag pumuluyo.

Sang 1922 iya ginproklamar ang New Economic Policy bilang isa ka transisyunal nga tikang para sa pagbuhi sang ekonomya halin sa kasamaran sang gyera sa pinakamadasig nga posibleng pamaagi kag pagremedyo sa problema sang "War Communism" nga nagaimbolber sang pagtipon sang suplay kag pagrasyon sa kahimtangan sang gyera, kasamaran kag kakulangan. Sa idalom sang ini polisiya, ang gagmay nga negosyante kag mga manggaranon nga mangungugma gintugutan sa paghimo sang pribado nga produksyon kag pagbaligya sang ila mga produkto.