[PRWC Party Documents] Stand For Socialism Against Modern Revisionism, Enero 15, 1992

MANINDUGAN SA SOSYALISMO BATUK SA MODERNO NGA REBISYUNISMO

III. Ang Proseso sang Kapitalista nga Pagpanumbalik

Ikaduha nga Halintang: Ang Rehimeng Brezhnev, 1964-82

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

Samtang si Khrushchov matingil nga anti-Stalin, si Brezhnev naghimo sang limitado nga "pagbuhi" kay Stalin. Kon anguton naton ini sa liwat nga sentralisasyon sang burukrasya kag mga empresa pang-estado nga sang una gindesentralisa kag ang mga mapiguson na tikang batuk sa mga anti-komunista nga oposisyon, mapakita nga ginabuhi ni Brezhnev ang polisiya ni Stalin.

Sa kamatuoran ang rehimen ni Brezhnev sa kabilugan anti-Stalin, sa pagsunod sa nagapadayon nga linya sang pagsakdag sang Khruschovista nga mga oryentado nga kapitalista nga reporma sa ekonomya kag sa linya sang pagdebelopar ikasarang pang-opensiba "agud pangapinan ang Unyon Sobyet sa gwa sang iya lindero". Gani sayup ang maghambal nga ang 18 anyos nga rehimen ni Brezhnev amo ang pag-untat sang anti-Stalin nga linya nga ginsuguran ni Krushchov.

May ara ugaling isa ka pang-ideolohiya nga sayup nga nagabutang kanday Khrushchov kag Brezhnev pareho kay Stalin. Ang wala napanahon nga deklarasyon sang pagdula sang mga sahi kag makasahi nga paghimakas, maluwas lang sa tunga sang kaaway kag sag pumuluyo. Ini nga linya sayup nga nagaalagad sa paghimutig sa pagluntad pa sang konsiderable nga nagadaku nga burgesya sa sosyedad nga Sobyet kag sa paghatag katarungan sa mga mapiguson nga tikang sa ginasigahum nga kaaway sang pumuluyo nga Sobyet nga nagaoponer sa nagahari nga hubon.

Sa idalom sang liderato ni Brezhnev, ang Khruschovista nga mga oryentado nga kapitalista nga reporma mabaskog nga ginduso sang magtimbanganay nga Brezhnev-Kosygin. Ang sosyalismo ginkambyo sa monopolyong kapitalismo sang estado nga ginadominahan sang mga garuk nga burukrata indi lang sa pagpataas sang ila personal nga kita kag pribilehiyo kundi sa pagkuha sang kurakot paagi sa pagpakighimbon sa mga pribado nga entreprenyur kag bisan sa mga sindikato kriminal sa paggatas sa mga empresa pang-estado. Sa nagapalapad nga sakop ang mga produkto nga mabaligya sang mga empresa pang-estado kon indi ginapanubuan ang presyo ginapalapaw ukon ginadeklarar nga depektuso lamang palikawon sa mga pribado nga entreprenyur para sa hilway nga baligyaanay.

Ang balaligyaan kag ang kontrata sa pagbaklanay sa mga kapitalista nga kumbuyahan sa luwas nangin isa ka daku nga sorsa sang mga kikbak para sa mga opisyal pang-estado nga ginadeposito sa mga sekreto nga bangko sa luwas. May ara man nga nagauswag nga black market sa pagbayluhanay sa luwas kag pag-ismagol sang mga epektos halin sa Nakatundan paagi sa Nasidlangan nga Europa, sa Baltic kag nabagatnan nga republika.

Ang kagarukan sang mga burukrata kag pribado nga kapitalista naganubo sang dungog sang nagahari nga rebisyunistang partido kag rehimen sa madamo nga lebel. Sa hingapusan sang rehimen ni Brezhnev, ginatantya nga may ara 30 ka milyon ka tawo nga nagaentra sa pribado nga negosyo. Isa sini ang mga katapu sang pamilya sang pang-estado kag pangpartido nga opisyales. Mismo ang mga katapu sang pamilya nga Brezhnev suod nga nagahimbunanay sa mga pribado nga empresa kag sindikato kriminal.

Ang mga empresa pang-estado kinahanglanon para sa pagsiguro sa mga pundo sa padayon nagalapad nga sentral nga burukrasya nga Sobyet kag para sa palumbaanay nga ginsentralisa liwat. Isa ka "military-industrial complex" ang madasig nga nagdaku kag nagkaon kada tuig sang masobra sa konserbatibo nga tantya nga 20 porsyento nga badyet sang Sobyet. Handum gid sang rehimen nga Brezhnev nga mag-angkon sang katupong militar sa iya superpawer nga karibal, ang Estados Unidos.

Ang daku nga estadong Sobyet nga makapaggwa tani sang daku nga surplas agud ihinguyang liwat sa mas episyente nga pagpalapad sang produksyon sibil sang mga basehan kag di-basehan nga produkto pangkonsumo, nag-uyang sang mga pundo para sa importasyon sang mataas nga lima ka porsyento sang populasyon (ang bag-o nga burgesya), sa daku nga bulto sang imported nga lamigas, sa "military-industrial complex" kag sa palumbaanay armas, sa pagmentinar kag pagpaarmas sang tunga sa milyon nga mga tropa sa Nasidlangan nga Europa kag sa iban nga komitment sa luwas, maayo kag malain man sa ikatlong kalibutan.

Isa sa maayo nga komitment amo ang pagbulig sa mga pumuluyo nga Byetnames sa Gyera sa Byetnam, Cuba, Angola kag Nicaragua. Isa sa mga malain amo ang pagpadala sang isa ka daku nga numero sang tropa nga Sobyet kag kagamitan sa Afghanistan kag sa panahon nga ang Unyon Sobyet maathag nga ara na sa maiwat nga kahimtangan pang-ekonomya kag pinansya.

Ang maiwat nga kwarta para sa importasyon sang lamigas kag mataas-sing-sari nga produkto pangkonsumo naghalin sa pagbaligya sang 10 porsyento sang produkto nga langis sang Sobyet sa mga pungsod sa Nakatundan kag sa kita halin sa pagbaligya sang produkto militar sa mga nagaprodukto sang langis nga pungsod sa Middle East.

Ang rehimen ni Brezhnev naggamit sang "Marxista-Leninista" nga paglubid sang mga tinaga sa pagtabon kag mangin lehitimo ang pag-uswag sang kapitalismo sa sulod sang Unyon Sobyet. Mapiguson nga mga tikang ang gin-gamit batuk sa mga pangontra sang rehimen lakip ang balibad nga paghunong sang mga buang. Ini nga mga tikang nagaserbi sa pagpauswag sang kapitalismo kag nagalakip sang sosyal nga pasismo.

Ang rehimen ni Brezhnev nag-introdusar sa kalibutan sang isa ka malaut nga reinterpretasyon sang diktadurya sang prole-taryado kag proletaryo nga internasyunalismo, sa proklamasyon sang doktrina nga Brezhnev sang nasentro-sa-Sobyet nga "internasyunal nga diktadurya sang proletaryado." Ginhimo ini sa okasyon sang pagsalakay sang Sobyet sa Czechoslovakia sang 1968. Sa sini ang Unyon Sobyet gintawag nga sosyal-imperyalista, sosyalista sa hambal imperyalista sa buhat. Sa kapreho nga arogansya, gindeploy ni Brezhnev ang ginatos ka libo nga tropa nga Sobyet sa alihid sang border sang Sobyet kag Tsina.

Ang Unyon Sobyet sa idalom ni Brezhnev nagsakdag sang prinsipyo sang "internasyunal nga dibisyon sang pagtrabaho" sa sulod sang CMEA. Nagakahulugan ini sang pagpatuman sang ispesyalisasyon sang mga linya sang produksyon sang partikular nga mga katapu nga pungsod luwas sa Unyon Sobyet. Ang relasyon sa tunga sang Unyon Sobyet kag iban nga CMEA nga katapu nga pungsod wala sang kinatuhay sa tunga sang imperyalismo kag malakolonya. Nagpugong ini sa kumpre-hensibo nga pag-uswag sang mga pungsodnon nga ekonomya sang kadam-an nga mga katapu nga pungsod wala sapayan sang pila ka basehan nga industriya nga ginpasad.

Sa katapusan, ang Unyon Sobyet nagsugod sa pagbatyag sang pagkadehado nga magadul-ong sang langis sa mas manubo sangsa iya pangkalibutanon nga balaligyaan kag sa baylo magbaton sang menos kalidad nga mga produkto. Sa kubay sang mga pungsod sang Nasidlangan nga Europa may nagaluntad nga malawig nga kaugot sa pigaw nga kagamitan nga sa aktwal ila ginabaton halin sa Unyon Sobyt sa sobra kataas nga presyo.

Antes pa ang 1970, ang Unyon Sobyet nagabuyok sang mga oryentado kapitalista nga mga reporma sa iya mga satelayt nga pungsod sa Nasidlangan nga Europa pero depinido nga wala sang may ginatugtan sa ano man nga pagtinguha sining mga satelayt nga maghalin sa Warsaw Pact. Sa temprano sang 1970, ang Unyon Sobyet mismo gusto maghimo sang isa ka detente sa Estados Unidos, mag-angkon sang "labing ginapaboran nga nasyon" (MFN) nga tratasyon, magganar sang akses sa bag-o nga teknolohiya kag mga pangluwas nga utang halin sa Estados Unidos kag iban pa nga kapitalista nga pungsod. Ugaling sang 1972, ang rehimen ni Brezhnev wala ginbaton sang Jackson-Vannik Amendment nga naghawid sang istatus bilang MFN sang Unyon Sobyet bangud sa pagpugong sa pagluwas sa pungsod sang mga Judeo. Ang rehimen nagbuyok gilayon sa iya Nasidlangan nga Europa nga satelayt sa pagsulod sa mga kasugtanan pang-ekonomya, pangpinansya kag baligyaanay sa mga kapitalista nga pungsod.

Gani ang ini nga mga pungsod nga ginamhan sang rebisyunista nabuyo sa Nakatundan nga mga produkto pangkonsumo kag pautang. Sang temprano sang 1980, kadam-an sa ila nahulog sa seryuso nga problema pang-ekonomya bilang isa ka resulta sang paglala sang mga lokal nga problema kag mga kabudlayan sa paglubad sang ila ginapas-an nga mga utang nga ang kada isa ka ulo (per capita) sa kadam-an nga kaso masobra pa sangsa iya sang Pilipinas. Bilang responsable sa mga pang-ekonomya nga polisiya kag sang ila burukratiko nga korapsyon, ang mga rebisyunista nga nagaharing partido kag rehimen nadulaan sang dungog sa masa sang malapad nga masa sang pumuluyo kag sa nagadugang nga anti-Sobyet kag anti-komunista nga intelihensya.

Ang mga nagahari nga partido sa Nasidlangan nga Europa sa masami nangin bulnerable sa akusasyon sang pagka-idu-ido pulitikal, ilabi na sa direksyon san anti-komu-nista nga mga taga-suporta sang nasyunalismo kag relihiyon. Magluwas sa Yugoslavia kag Albania, ining mga Partido mga tinagpi-tagpi ukon ginsimpon nga mga partido komunista kag sosyal-demokrata nga ginbutang sa poder sang Unyon Sobyet pagkatapos sang Ikaduha nga Inaway Kalibutanon kag sa pangunahon, nag-atras sa pagpatuman sang mga basehan nga reporma sosyal, ilabi sang ginapaha-nugutan ni Khrushchov ang pagpatuman sang mga oryentado nga kapitalista nga mga reporma.

Bisan pagkatapos sang Jackson-Vannik Amendment, ang Estados Unidos nagatawtaw gihapon sa ginahandum nga MFN istatus kag iban nga pang-ekonomya nga konsesyon sa Unyon Sobyet kag himuon ini sang Estados Unidos, nakatigayon ini sa pagkuha sang bisan ano sa Unyon Sobyet, pareho sa iya komitement sa Helsinki Accord (tuyo sa paghatag sang legal nga proteksyon sa mga nagareklamo sa Unyon Sobyet) kag isa ka borador sa tratado sa istratehiko na limitasyon sa mga armas pero wala gid maghatag ini sang mga konsesyon nga gusto sang Unyon Sobyet. Ang Estados Unidos sa simple gusto nga magpadayon sang Cold War agud iduso ukon piliton ang Unyon Sobyet sa pag-uyang sang iya resorsa sa palumbaanay sa armas. Ang sig-nipikante nga konsesyon lang nga padayon nakuha sang Unyon Sobyet amo ang pagbakal sang lamigas kag pautang komersyal kaangut sini.

Sang ang liderato sang Partido nagdesisyon sa pagtilaw ukon pagpangita sang mga relasyon sa mga nagaharing partido sa Unyon Sobyet kag Nasidlangan nga Europa sa katung-anan sang 1980, ara ang sayup nga pagpati nga ang mga nagbulos kay Brezhnev magasunod sa anti-imperyalista nga linya sa Cold War sang duha ka superpawer. Gani ang polisiya nga papel bahin sa Unyon Sobyet kag Nasidlangan nga Europa nagasunod sa linya ni Brezhnev.

Wala sapayan nga ang rehimen ni Gorbachov nagsunod sa malaut nga mga rebisyunista nga polisiya sangsa iya ginsundan, nangin maayo ini nga sorsa sang impormasyon angut sa prinsipal kag esensyal nga kinaiya sang rehimen nga Brezhnev sa kumprehensibo nga sakop sang mga isyu. Sa paggamit sang impormasyon sa isa ka kritikal nga Marxista-Leninista nga punto-de-bista, mahapos naton masuma ang rehimen nga Brezhnev.