Armando Liwanag, Tagapangulo, Partido Komunista ng Pilipinas

Enero 15, 1992

Ang yabi nga elemento sang "bag-o nga kaisipan" ni Gorbachov sa mga relasyon internasyunal amo ang "de-ideolohisasyon" nga nagakahulugan sa aktwal sang lubos nga pagsikway sa proletaryado nga makasahing panindugan kag proletaryo nga internasyuna-lismo kag pagtipyok sa imperyalismo sa pag-panabon sang kooperasyon. Gintindugan ni Gorbachov nga ang makahas nga kinaiya sang imperyalismo nagbag-o pakadto sa malinong kag ang katawhan may integral nga mga interes kag lapaw-sa-sahi nga kabalaka bahin sa hinganiban sang malaparan nga pagdestruso, ekolohiya kag iban pa nga isyu. Ang "de-ideolohisasyon" ni Gorbachov nagakahulugan sa aktwal sang lubos nga pagsikway sang proletaryado nga makasahing panindugan kag pag-angkon sang makasahi nga burges nga panindugan.

Tanan nga Marxista nagakilala sa komon nga interes sang katawhan kag sa pag-uswag sang sibilisasyon sang katawhan; kag sa amo man sa kamatuoran nga ang kalibutan kag partikular sa mga katilingban nga ginaharian sang imperyalista kag mga lokal nga nagaharing sahi kag sang istoriko nga makasahing paghimakas sa tunga sang burgesya kag sang proletaryado nagapadayon sa gihapon. Ang ginhimo ni Gorbachov amo ang paggamit sang mga abstrakto, unibersalistiko kag lapaw-sa-sahi nga termino agud mangin buron ang istoriko nga makasahing paghimakas kag mangita sang komon nga kawsa sa imperyalismo.

Ginasigahum niya nga ang "mga lehitimo nga pungsodnon nga mga interes" sang mga estado amo ang labing importante sa pagbalay sang mga relasyon internasyunal. Pagkatapos sang ika-70 nga anibersaryo sang Dungganon nga Sosyalistang Rebolusyon sang Oktubre, ginbuhinan niya ang aktibidades internasyunal sang CPSU angut sa pagkooperar sa mga pungsod sa ikatlong kalibutan kag mga anti-imperyalista nga organisasyon kag kahublagan. Ang mga prominente nga adbayser niya nagproponer man nga ang mga internasyunal nga organisasyon sang pumuluyo nga ginagastuhan sang mga organisasyon nga Sobyet mahimo makig-isa sa ila kapareho nga mga organisasyon nga ginagastuhan sang mga pwersa sang kapitalismo agud magporma sang mas daku nga mga "indi-ideolohikal" nga organisasyon. Ang buot nila hambalon amo ang lubos nga kapitulasyon sa imperyalista nga ideolohiya.

Gintanyag ni Gorbachov ang prinsipyo sang lunsay malinong nga pagpangabuhi sa mga estado, ano man ang sistema sosyal sini. Ginasikway niya ang Brezhnev Doctrine kag gintum-ukan ang punto nga ang iban nga pungsod kag amo man sa mga komunista nga partido ang makadesisyon para sa ila kaugalingon. Pero nangin ipokrito siya bangud ang mga ahente nga Gorbachovista masako sa ila pagreorganisa kag pagbungkag sa mga nagaharing partido kag rehimen sa Nasidlangan nga Europa.

Nagpanawagan siya sa pag-untat sang Cold War, pagpadasig sa pagbungkag sang mga armas nukleyar kag pagbuhin sang mga kumbensyunal nga pwersa kag sa pagdula sang NATO kag sang Warsaw Pact. Ang mga tratado sa pagbuhin sang mga armas madasig nga ginpirmahan sangsa ano man nga nauna nga panahon sa Cold War. Ginhimo ini tanan sang rehimeng Gorbachov lamang nga maganyat ang mga dumuluong nga pamuhunan kag bag-ong teknolohiya agud buligan ang ekonomya nga Sobyet. Pero ang Group of Seven may malig-on nga panindugan nga indi sila maghaboy sang ila kwarta sa malala, madasig nga nagamudmod kag garuk nga burukratikong ekonomya.

Sa idalom sang pagpamuno ni Gobachov, ang Unyon Sobyet nagkolaborar sa Estados Unidos kag iban nga pungsod sa pagtapos sang mga rehiyunal nga armadong kumplikto pareho sa Iran, Iraq, Afghanistan, Angola kag Nicaragua. Ang Unyon Sobyet nagkomiter sang iya kaugalingon sa unilateral nga pag-atras sang mga pwersa militar sa Nasidlangan nga Europa kabaylo sang pang-ekonomya nga bulig halin sa Nakatundan sa porma sang mga direkta nga pamuhunan, pautang, pagsaylo sang teknolohiya kag mga akomodasyon sang negosyo. Sa kubay sang mga pwersa nga kalitalista, Germany ang naghatag sang kadam-an nga bulig sa porma sang pautang, mga suplay pangkonsumo kag bulig sa paghimo balay para sa mga tropang Sobyet nga nagbalalik halin sa Nasidlangan nga Europa. Pero bisan ang mga pundo nga ginpauna para sa paghimo balay sa mga tropa nangin bagay para sa indi maayo nga pagdumala kag kinawatay. Sang damlag pa sang 1987, ang mga rebisyunista nga nagaharing partido kag rehimen sa Nasidlangan nga Europa ginaduso na nga magreorganisa sang ila kaugalingon kag pag-ilis sang mga Gorbachovista sa mga Brezhnevista. Naglibot man ang sugilanon sa sulod kag sa gwa sang mga nagaharing partido kag rehimen nga nagdesisyon na ang Unyon Sobyet sa pag-atras sang iya mga pwersa sa Nasidlangan nga Europa kag indi magpasilabot sa kon ano ang matabo sa rehiyon. Gani ang mga anti-komunista nga pwersa may pauna nga notisya kon ano ang ila pagahimuon sa idalom sang bag-o nga sirkumstansya. Mahimo nga sakyan nila ang matuod nga agrabyo sang pumuluyo kag pukanon ang mga wala na kredito nga nagaharing partido kag rehimen.

Ang sosyo-ekonomiko kag krisis pangpulitika sa madamo nga rebisyunistang rehimen kag ang lapnagon nga hayag nga ihibalo nga ang Unyon Sobyet indi na interesado sa pagpreserbar sang Warsaw Pact kag sang kontrolado-sang-rubble nga CMEA supisyente nga basehan para sa mismo pag-aktibo kag pagdaku sang anti-komunista nga pwersa. Ang nagadugang athag nga mensahe humalin 1987 asta 1989 nga ang Unyon Sobyet indi mag-interbenar sa ano man nga aksyon popular batuk sa mga lokal nga rehimen naghatag sa mga anti-komunista nga pwersa sang kumpyansa sa ila tuyo nga pagpukan. Labing importante sa tanan, ang pinakamadamo nga mayorya sang mga rebisyunista nga burukrata sa nagaharing partido kag sang estado (magluwas sa pila pareho kanday Ceaucescu nga relatibo indepedyente sa CPSU kag Honecker kag Zhikhov nga madugay na mga Brezhnivista) madali lang sa paghukas sang ila mga komunista nga maskara, magpabilin sang ila mga pribilehiyo, panginpuslan ang mga bag-o nga oportunidad kag malikawan ang kaakig sang agrabyado na nga pumuluyo.

Sa kritikal nga mga reperensya sa sining diskusyon sa mga responsibilidad sang rehimeng Gorbachov kag sang mga satelayt nga rehimen sa Nasidlangan nga Europa sa pagkabagsak sang naulihi, indi dapat sal-an nga ang tuyo naton amo ang isa ka pat-ud nga polisiya ukon ang isa ka pat-ud nga ilig sang mga hitabo nga nagliko sa iban nga dalan. Ginalaragway lang naton sa sining punto ang ulihi nga halintang sang pagkawasak sa iya kaugalingon ukon pagbuyagyag sa mga rebisyunista nga partido kag rehimen.

Masunod sa pagwasak sang CPSU kag sang Unyon Sobyet, ang pinakadaku nga serbisyo nga ginhimo sang rehimeng Gorbachov sa mga kapitalista nga pwersa amo ang madasig nga paghatag sang Nasidlangan nga Europa sa ila kag sa pagbungkag sang Waraw Pact kag sang CMEA.

Sa sulod sang uhili nga tinuig sang iya pagluntad, ang Unyon Sobyet sa idalom ni Gorbachov nagsuporta sa Estados Unidos sa paglunsar sang gyera sang pagpanalakay sa Rehiyon sang Gulpo kag sa pagpakita sang kaugalingon nga siya lang ang pulis sang kalibutan.

Si Gorbachov lubos nga naghayag sang iya kaugalingon sang 1991. Ang mga makahalalit nga resulta sa Unyon Sobyet sang sini nga sahi sang pagpamuno nangin tuman kaathag. Indi makatindog ang sin-o man nga rebolusyonaryo nga magpangapin para sa iya kag himuon siya nga isa ka baganihan. Ang sin-o man nga natiplang sa pagpati nga si Gorbachov naglunsar sang sosyalista nga pagbuhi dapat maghimo sang isa ka malawig kag madalom nga pagtan-aw sa indi matago nga pamatuod nga ginkumpleto niya ang proseso sang kapitalistang pagpanumbalik nga gin-umpisahan ni Khrushchov kag ginpangunahan ang pagsamad sa Unyon Sobyet.

Ang mga opisyal, ideolohista kag propagandista sang imperyalismo kag reaksyon padayon sa paglawag kay Gorbachov nga labing dungganon nga tawo sa ika-20 nga siglo sa pagdala sang "demokrasya" sa Unyon Sobyet kag Nasidlangan nga Europa. Kon amo, may rason gid sila nga magpangalipay. Gindala niya ang hayagan nga pagpanumbalik sang kapitalismo kag diktadurya nga burges. Ang mga pumuluyo sa anay Unyon Sobyet kag Nasidlangan nga Europa ginbuksan subong sa dugang nga kapitalista nga pagpanghimulos kag pagpamigos, nag-antus sang gutom kag, pagkadula sang daku sang kahilwayan kag nagaatubang sang dugang nga kinagamo pulitikal, nagalapad nga gyera sibil kag pasismo militar.

Back to top
<Prev   1  2  3  4  5  6  7  8  9  10  11  12  13  14  15  16  17  18  19  20   Next>
Back to CPP Documents