Komite Sentral, Partido Komunista sang Pilipinas
Hulyo 1992
Ang Pinakamalala nga Disoryentasyon
Ang pinakamalala nga tipo sang disoryentasyon nagsugod nga magkadagway sadtong 1981 sa porma sang konsepto sang "estratehiko nga kontra-opensiba" kag "tatlo ka estratehiko nga koordinasyon" nga naggikan sa sentral nga pamunuan mismo. Ang konsepto sang "estratehiko nga kontra-opensiba"-- antes pa man mangin nagapanguna nga behikulo sang paglapnag sa bug-os nga pungsod sang kumbinasyon sang insureksyunismong urban kag "regularisasyon" pagkatapos sang ika-9 nga plenum sang Komite Sentral sadtong 1985-- nagdala na sang mga ideya nga nagadali-dali pag-lumpat pakadto sa regular nga pagpakig-away nga mahulag nga gintalana nga pangunahon nga porma sang pagpakig-away sa estratehiko nga depensiba; nag-ganyat sang paghandom sa insureksyon nga ginpamensar nga makapadasig sa pagpabakod sang hangaway kag pag-abanse sa mas mataas nga estratehiko nga halintang ukon desaysibo nga kadalag-an; nagpalapnag sang konsepto sang mga koordinado nga opensiba pangpulitika kag pangmilitar sa pungsudnon nga sakop; kag nagbukas sa posibilidad sang pareho sadto nga mga opensiba nga magapadulong sa pag-angkon sang desaysibo nga kadalag-an sang rebolusyon.
Ang konsepto sang "tatlo ka estratehiko nga koordinasyon" nagatum-ok sa sentral nga estratehiko nga kapuslanan sang koordinasyon sang paghimakas sa kaumhan kag kasyudaran, paghimakas pangpulitika kag paghimakas nga armado, kag hilikuton sa sulod sang pungsod kag iban nga pungsod, pero sa pamaagi nga nagalisa sa estratehiko nga linya sang paglikup sang kasyudaran halin sa kaumhan. Ginasakdag yadto ang panan-awan nga pangunahon nga pwersa sang rebolusyon ang kumbinasyon nga mamumugon-mangunguma, sa baylo nga masang mangunguma. Kag ginapatampok ang balor sang mga masangkad nga mobilisasyon pangpulitika sang pumuluyo pero may tendensya nga ibulos ukon ipaibabaw ato sa maukod nga pagtukod sa kubay sang masang mangunguma sang solido nga direkta nga baseng masa sang armado nga rebolusyon. Gintalana sato ang timbangan nga 60-40 sang hilikuton sa kaumhan kag hilikuton sa syudad, kadungan ang panan-awan nga ang prinsipal nga tum-ok sa kaumhan pwede magwaslik sa kasyudaran sa idalum sang indi maathag nga mga pagbag-o sa mga kahimtangan kag indi gin-athag nga mga lebel kag dulunan. Dugang pa ang mga ideya nga nagaganyat sang tendensya nga sobra nga maghandom sa ayuda halin sa guwa sang pungsod.
Ginbalay ang mga konsepto nga ini sa pagtinguha nga athagon ang mga katungdanan kag dalan sang pagsulong sa kahimtangan nga madasig ang kumpas sang pagbakud sang mga prenteng gerilya kag mga yunit gerilya kag madasig nga nagapaus-os ang pasistang diktadura padulong sa pagpukan. Pero dala sang petiburgis nga pagkataka kag suhetibismo, ang mga halambalan tuman nga temprano nga natutok sa pag-lumpat sa estratehiko nga pagkapatas kag estratehiko nga kadalag-an sa sitwasyon nga ang kinahanglan paghingalit sa napakamaayo nga kahimtangan agud konsolidahon ang mga panugod nga kadalag-an, labi pa nga sunsunon ang katag sang baseng masa kag mga pwersa nga gerilya sa malapad nga sakop, itransporma ang mga panugod nga baseng gerilya kag konsolidadong sona pakadto sa mas malapad kag mas solido nga mga kuta sang rebolusyon, kag padasigon ang pagpaluya sang pasistang diktadura kag bilog nga reaksyon.
Nangin talalupangdon bisan sa pila ka nagapamuno nga kadre ang hayag nga pagkataka sa kalawigon sang inaway banwa. May ara pa nga nagahambal nga daw ang malawigan nga kinaiya sang inaway banwa suhetibo nga kagustuhan ukon indi gani mas bunga sang kahuyangon sang buot ukon kawawad-an sang imahinasyon sangsa dikta sang mga obhetibo nga kundisyon kag sang obhetibo nga proseso nga kinahanglan sa pagtukod sang kusog sang rebolusyon kag pagpaluya sang reaksyon. Gani nabuksan ang ganhaan sa pagtuhaw kag paglapnag sang mga konsepto sang pagpanglagas sa mga ginpalip-ot nga ruta sa estratehiko nga pag-lumpat, pagdali nga makasugod sa mga estratehiko nga desaysibo nga engkwentro sa dagway sang regular nga pagpakig-away nga mahulag ukon insureksyon nga urban, pagpakanubo ukon paglaktud sa maukod nga pagtukod sang nagapasangkad kag nagapadalum nga baseng masa, kag pagkamaluyagon sa eklektiko nga pagpamulut-pulot kag pagtahi-tahi sang mga pugtak-pugtak nga mga dumuluong nga eksperyensya pareho sang sa Nicaragua, Byetnam kag Zimbabwe nga gintantya nga makapadasig sa pagsulong kag pagdaog.
Sa Mindanaw ang konsepto sang tatlo ka estratehiko nga koordinasyon ginpaluntad bilang polisa sang komisyon sang Partido sa isla sa pihak sang desisyon nga ipaidalum ato sa padayon nga pagtuon kag diskusyon sang sentral nga pamunuan (Lantawon, "Mga Nota sa Estratehiya kag Taktika sang aton Inaway banwa", 1982). Madasig nga gin-uyunan ato labina sang pila ka kadre nga nagapahayag sang duda sa praktikalidad kag pagkasanto sang pagtukod sa kaumhan sang isla sang mga rebolusyonaryo nga base kag sang paghimakas nga antipyudal. Sa konsepto sang kabilugan nga pagsulong sang paghimakas sa isla, ang balayon sang estratehiko nga koordinasyon ukon kumbinasyon sang kaumhan kag kasyudaran ginpaibabaw sa estratehiko nga paghatag-tum-ok sa kaumhan. Isa pa nga talalupangdon nga resulta amo ang konsepto kag praktika sang nagapasingki nga "paghimakas nga pulitiko-militar" sa Syudad sang Davao kag iban pa nga sentrong syudad sa porma sang todo-larga nga pagpakig-away nga partisano, masangkad nga propaganda, mga kumprontasyunal nga aksyon sa kalsada kag pagtingob sang mga ini.
Sa duso sang mga marantog nga kadalag-an sa umpisa sang pagpakig-away nga partisano sa Syudad sang Davao halin 1982 kag, pagkatapos, sang bugso sang kontrapasista nga protesta sa mga sentrong syudad pagkatapos sang asasinasyon kay Aquino, gin-uyatan sang Komisyon sa Mindanaw ang pila ka dinalan halin sa inaway banwa sang Byetnam (labina ang "pagsabnit sa mga oportunidad" nga gin-gamit sadtong Agosto 1945 kag "estratehiya sang away kag pag-alsa" sa nabagatnan Byetnam sadtong mga tuig nga 1960) pero yadto ginwarik sa insureksyon nga urban, ginsamo sa teorya kag praktika sang inaway banwa ang mga idea sang ispontanyong pag-alsa sang masa kag armado nga insureksyon nga urban gikan sa Sentral Amerika, kag gindisenyo ang balayon nga Pulang Lugar (Paghimakas nga Militar)- Puting Lugar (Paghimakas nga Pangpulitika) nga sistematiko nga naglisa sa estratehiko nga linya sang paglikup sang kasyudaran halin sa kaumhan kag nagpabor sa mga pag-alsa kag insureksyon bilang "pinakamataas nga porma sang paghimakas nga pangpulitika nga dapat agumon" ("Basehan sa Pagpauswag kag Papel sang Kahublagan sa Puting Lugar sa Bilog nga Estratehiya sang Inaway Banwa sa Mindanaw", 1984).
Sa pila ka mayor nga dokumento nga nagapakita sang kakulangan sa paghangup sa sandigan nga teorya, ginbag-o sang Komisyon sa Mindanaw ang depinisyon sang tinaga nga "pangpulitika" kag ginsangga ini ukon gintupong sa "armado" ukon "militar". Ang mga paghimakas nga pangpulitika ginpakahulugan sa mga dokumento nga ini nga "yadtong pangunahon nakabatay sa mga pwersa nga popular kag armado nga pwersa sang masa ukon mga pwersa nga pangpulitika nga ginasulong pangunahon sa mga kasyudaran " samtang ang "armado nga paghimakas" ginpakahulugan nga "prinsipal nga ginasulong sa kaumhan kag prinsipal nga nagasalig sa mga armado nga pwersa ukon hangaway nga nakapokus sa katuyuan nga lutuson ang pwersa militar sang rehimen". (Lantawon, "Basehan sa Pagpauswag kag Papel sang Kahublagan sa Puting Lugar sa Bilog nga Estratehiya sang Inaway Banwa sa Mindanaw", p. 6) Ginadingot sa aton armado nga paghimakas, nga isa ka inaway banwa, ang kinaiya sini bilang isa ka rebolusyonaryo nga pangpulitika nga kahublagan pangmasa. Dala lamang sang paghandom sang armado nga insureksyon nga urban, ang hangaway sang banwa luyag nga ipanubo sa posisyon sang isa ka pwersa militar nga "regularisado" sa pamaagi nga halos wala sang ginkatuhay sa hangaway sang kaaway.
Dapat walay-untat naton nga ipahanumdum sa aton kaugalingon nga ang inaway banwa may rebolusyonaryo nga kinaiya nga pangpulitika kag ang hangaway sang banwa isa ka armado nga organisasyon pangmasa. Ang aton inaway banwa ara sa balayon sang pungsudnon-demokratiko nga rebolusyon. Kag sa balayon nga antipyudal, may ara kinahanglan nga pangpulitika nga integrasyon sang armado nga paghimakas, tunay nga reporma sa duta kag pagtukod sang baseng masa. Ang aton inaway banwa isa ka rebolusyonaryo nga pangpulitika nga kahublagan pangmasa nga nagasakop sa tanan nga dagway sang paghimakas, ligal kag iligal, armado kag indi-armado. Kag may ikasarang nga magdaku kag magpangibabaw ang isa ka hangaway sang banwa batok sa isa ka tuman nga nakalaban nga pwersa militar sang kaaway bunga, sa esensya, sang pagbuylog kag pagsakdag sang pumuluyo.
Samtang nagasugal sa posibilidad sang lubos nga kadalag-an paagi sa armado nga insureksyon nga urban, sang walay konsiderasyon sa kusog sang hangaway sang banwa, kag aktwal na nga ginabungkag base didto ang kabilugan nga katag, direksyon sang pagtinguha, mga prayoridad kag angtanay sang mga pwersa sa kaumhan kag kasyudaran, nagpadayon ang embokada sang pagsakdag sa teorya sang inaway banwa. May ara nga wala nakahangup sa relasyon sang rebolusyonaryo nga estratehiya kag taktika nga nagapati nga ang subong sadto nga pagdistrungkar ara sa lebel lamang sang pleksibilidad sa taktika, nga sa ngalan sang "pagsabnit sa mga oportunidad" kag sa kada may magatuhaw nga kuno mga "oportunidad" pwede ipahigad ang estratehiko nga linya kag mga prinsipyo sang aton inaway banwa agud magtusmaw sa insureksyunismo, nga wala ginahalitan ang rebolusyon. May ara naman nga nagapalampas sa ginpag-agaway nga pag-ayo sa teorya sang inaway banwa sang mga promotor sang insureksyon nga urban bangud interesado man sila sa dasigay nga kadalag-an nga wala sang maukod kag solido nga hilikuton pangmasa. Gani ang mga promotor sang insureksyon nga urban kag sang "regularisasyon" sang hangaway (buot silingon, pagtukod sang mas mga dalagku nga yunit kag istap militar sa kahalitan sang pagtukod sang baseng masa) nahimo nga magkasalo sa pareho nga mga dokumento.
Ang pinakamalain nga dagway sang paglihis nga siya man nga napamatud-an nga pinakamasapnot sa pagtadlong amo ang naungot sa pag-ilog sa isa ka dumuluong nga modelo nga tuman nga indi-santo kag indi-nahangpan, nagahamulag yadto sa ginsudlan nga kontekstong istorikal kag mga pinasahi nga kundisyon, kag pagkatapos nagataklob sato sa kaugalingon nga rebolusyonaryo nga praktika sang Partido kag pumuluyo nga Pilipino. Husto nga silingon nga ang Partido dapat makatuon sa tanan nga rebolusyonaryo nga eksperyensya sa iban nga pungsod. Pero dapat man naton nga mahibal-an kon paano kwentahun kag takson ang mga ini sigun sa ila kamalahalon kag kapuslanan sa rebolusyon nga Pilipino.
Ang direkta nga insureksyunista nga balayon nga Pulang Areya- Puting Areya ginplastar sang Komisyon sa Mindanaw sa ika-9 nga plenum sang Komite Sentral sadtong 1985. Ginbalibaran ato sang plenum. Pero may mga pangunahon nga sangkap sato nga gin-endorso, ginkuha kag ginlakip sa programa para sa "estratehiko nga kontra-opensiba" ukon indi gani daan nga kapareho sang sangkap sang naulihi. Gintalana ang target nga pangkabilugan nga insureksyon ukon pag-alsa sa una nga tuig sang "estratehiko nga kontra-opensiba" luwas pa ang mga "pagtilaw" nga pag-alsa antes sadto pagkatapos sang eksperyensya sa pag-alsa sang EDSA, nangin permi ginasambit man ang "pagsabnit sa mga kahigayunan"buot�silingon paghanda nga mangsaruso sa pag-alsa sa tion nga may ara nagabilog ukon nagasugod nga makahas nga engkwentro sang mga reaksyunaryo samtang padayon ang "regularisasyon" para sa "estratehiko nga kontra-opensiba". Gani sa ikaduha nga katunga sang mga tuig 1980 ang programa sa "estratehiko nga kontra-opensiba" ang nangin dagway sang pagtingob sang sala kag husto nga linya kag nangin behikulo sa pungsudnon nga paglapnag sang linya nga kumbinasyon sang insureksyon kag "regularisasyon".
Halin 1985 daku kag direkta ang nangin papel sang programa sa "estratehiko nga kontra-opensiba" sa pagpapalaganap kag pagtulod sang "regularisasyon" sang hangaway sang banwa. Tigaylo nga "regularisasyon� nga nagaserbi sa insureksyon nga urban sang linya nga Pulang Areya- Puting Areya sang Mindanaw, ang "regularisasyon" mismo padulong sa regular nga pagpakig-away nga mahulag ang gintalana nga pokus nga ginaserbihan mangin sang mga pag-alsa. Dugang pa nga duso sa "regularisasyon" ang mga panan-awan kag pag-analisar nga ang inaway banwa halin 1983 ara na sa halintang sang "pagpasingki paagi sa pagpasaka sang lebel", "bastante ang baseng masa para sa tayuyon nga pagpasaka sang inaway", kag ang pormasyon nga kompanya na ang pangunahon ukon tipikal nga pormasyon sang hangaway sang banwa kag pangunahon nga nagadala sa bilog nga inaway halin 1985. Sa subong sini ginlansang bilang pangkabilugan nga tum-ok sang armado nga paghimakas kag pagtukod sang hangaway ang pagtukod sang mas dalagku nga mga pormasyon, "regularisasyon" sang istruktura sang kumand kag istap sa lain-lain nga lebel kag ang katungdanan sa inaway bilang prinsipal nga katungdanan sang bilog nga hangaway.
Sadtong 1987 kag 1988, may panibag-o nga sikad ang "regularisasyon" pakadto sa pagtukod sang mas dalagku pa nga nga pormasyon (mga batalyon), mga koordinado nga kampanya kag "regularisasyon" sang mga kumand sa lain-lain nga lebel, sandig sa pag-analisar nga "nakadeploy na ang mga estratehiko nga reserba sang kaaway", nagaluntad ang kahimtangan para sa mga lokal nga "estratehiko nga kontra-opensiba" kag ang yabi sa padayon nga pagsulong sang inaway kag hangaway amo ang "labi nga pagpasaka sa kalidad".
Pero wala magdugay kag nag-igo ang hampak sang "pangkabilugan nga opensiba" sang AFP kag nagbuyagyag sa mga dalagku nga bulnerabilidad sang mga prenteng gerilya labina sa baseng masa, subong man sa mga makahalalit nga epekto sang "regularisasyon" kag programa sa "estratehiko nga kontra-opensiba". Sa pihak sang mga panugod nga pagpangindi sa mga saway kag pagpanadlong sa "regularisasyon" nga gin-umpisahan sang KTKS sadtong katapusan sang 1988, naglapnag sa kaumhan halin 1990 ang pagremedyo sa mga kakulangan sa hilikuton pangmasa, paghatag-tum-ok sa mga yunit gerilya sa mga lokalidad kag amat-amat na nga paglubad sa bangian nga disposisyon sang mga kadre. Ang programa para sa "estratehiko nga konra-opensiba" ginbawi sang Buru pangpulitika sang Komite Sentral sadtong 1990 kag gin-islan sang programa nga nagatum-ok sa lapnagon kag maikit nga gerilya nga pagpakig-away.
Ang mga promotor sang armado nga insureksyon nga urban sa kadam-an nagpakabastante sa ispasyo nga insureksyunista sa sulod sang programa sa "estratehiko nga kontra-opensiba" halin 1985. Pero sadtong 1990, dala sang ideya nga nagahuman-human ang insureksyunaryo nga "tumalagsahon nga oportunidad" pagkatapos sang kudetang 1989 kag sa atubang sang krisis sa Gulpo kag paglala sang sosyo-ekonomiko nga krisis, mas agresibo sila nga nagpanigal-ot sa kaugalingon nga linya kag naglibod sang lain-lain nga pamensaron nga insureksyunista kag sang "estratehiya sang inaway kag pag-alsa nga nagalagas sang pinakamaayo nga kumbinasyon sang mga paghimakas nga pangpulitika kag pangmilitar" (waay iban kon indi ang linya nga Pulang Areya-Puting Areya sa bag-o nga pagmaskara). Ginkasa ang mga dalagku nga plano pangpulitika kag militar sa pungsudnon nga sentrong syudad nga nagatuyo nga magpalupok sang armado nga insureksyon nga urban kag madugay nga nakalikom sa ihibalo sang sentro sang Partido bangud sa maniobra sang isa ka nagapamuno nga kadre. Sa todo nga pagpakalumos sa teorya sang ispontanyong masa kag adbenturismong militar, ang mga aksyon nga "pulitiko-militar" nga gin-gamit nga "pangkalburo" sa mga pangkabilugan nga paralisasyon kag mga kumprontasyunal nga aksyon masa ginkumbinar sa mga ambisyoso nga proyekto sang pagpatampok sang NDF sa burgis nga mass media kag pagtukod sang malapad nga koalisyon nga magatindog bilang sentro nga pangpulitika sang insureksyon. Ang resulta, luwas sa daku nga gilayon nga problema sa pulitika kag seguridad, amo ang mas malala nga disoryentasyon kag paglihis sa estratehiko nga linya sang inaway banwa subong man sa makasahi nga linya sang demokratiko nga rebolusyon sang banwa.
Ang daku nga pagpabaya sa pagsunod kag pagpaathag sa mga halambalanon sa teorya kag linya kag ang madugay nga kawawad-on sang pagsuma sa mga inagihan sa pungsudnon nga lebel nagtugot sa padayon nga paglapnag kag pasulit-sulit nga pagpanggamo kag pagpang halit sang mga dalagku nga kasaypanan kag paglihis. Nagsinampaw kag naglalakot ang madamo nga halambalanon nga madugay nga wala nagakalubad, ang mga dalagku nga hitabo kag inagihan nga may lapnagon nga mga magkabanggi nga pagtan-aw kag paghangop, kag ang mga konsepto nga sala kag husto. Gani tuman kahapos bisan para sa sala nga linya nga pareho sang balayon nga Pulang Areya-Puting Areya nga nakatuga na sang daku nga kahalitan sa Mindanaw sadtong 1984 kag 1985 nga padayon nga magpostura nga superyor kag direkta nga magbanggi sa pangkabilugan nga linya kag estratehiko nga linya sang Partido.
Ang Aton Linya nga Anti-rebisyunista
Halin temprano nga bahin sang mga tuig nga 1980, ang paglihis halin sa anti-rebisyunistang linya sang Partido duso sang handom sa dasigay nga pag-abanse nga militar, mangin ini sa tipo sang dasigay nga kadalag-an militar ni Jose Lava ukon sa "estratehiko nga kontra-opensiba" sa sulod sang estratehiko nga depensiba. Pareho sang Palestine Liberation Organization (PLO) kag iban pa nga mga organisasyon sa paghilway, pwede tilawan sang Pungsudnon Demokratiko nga Prente (NDF) nga magtukod sang mainabyanon nga relasyon sa mga nagahari nga partido kag rehimeng rebisyunista sadtong damlag nga bahin sang mga tuig nga 1980. Bisan man, luyag sang pila ka elemento nga sampawan ang nauna kag nagaupang nga relasyon sa tunga sang mga hubon nga Lava kag mga nagahari nga partido nga rebisyunista kag luyag pa gani nila nga isikway sang Partido ang linya nga anti-rebisyunista agud maka-establisar sang �minag-utod� nga relasyon sa mga nasiling nga nagahari nga partido nga rebisyunista kag makakuha sang mga materyal nga ayuda.
Sadtong 1984, may ara na nga burador nga papel sa polisa sa kahimtangan nga internasyunal kag linya sa relasyon internasyunal, nga nagapasaburno sa nagahari nga hubon nga Brezhnev kag nagaatake sa Tsina sang indi naman kinahanglan, bisan nga ang Unyong Sobyet kag mga alipures sini sa hubon nga Lava mas hugot na nga nagapakighimbunanay sa pasistang rehimeng Marcos. Sadtong 1985, ang proposal nga ini ginbasa sa plenum sang Komite Sentral nga nagdesisyon nga ipaidalum ini sa padayon pa nga pagtuon.
Ano pa man, ginpalibot ini kag ginsakdag sang Departamento sa Liyasong Internasyunal, tubtob sa ginbanggi ini sadtong 1987 kag gin-islan sadtong 1988 sang isa ka bag-o nga papel sa polisa nga nagsakdag sa mga husto nga prinsipyo sa relasyon nga partido-sa-partido kag sa mga sandigan nga prinsipyo sang sosyalismo, apang nagbaton lang sa mga deklarasyon ni Gorbachov, nga may dyutay nga obserbasyon nga kritikal pero mahalong.
Gani, bisan lapaw pa sang 1989 (sang napukan ang mga rebisyunistang rehimen sa Sidlangan nga Europa) kag ika-28 Kongreso sang CPSU sadtong 1990 kag bisan lapaw pa liwat sang Agosto 1991 (sang matabo ang kudeta kag pag-iligalisa sa CPSU), may mga elemento sa sulod sang Partido nga padayon nga nagadayaw kay Gorbachov base sa simplistiko nga pamensaron nga anti-Stalinismo (nga ginapakarga kay Stalin ang responsibilidad bisan sa mga nagahari nga partido kag rehimeng rebisyunista halin 1956) kag wala nagapati nga napukan na ang mga nagahari nga partido kag rehimeng rebisyunista kag ang ila mga "napukan" nga lider (mga paltik sang lider) kag ang ila mga himata nagbinuyagyaganay na sang ila matuod nga kinaiya kag nangin mga anay-komunista kag anti-komunista na, mga negosyante nga hayag nga nagapanggatas sa mga talapuanan sang estado kag nagaangkon sa manggad nga sosyal sang proletaryado kag pumuluyo bilang ila pribado nga propryedad, kahimbon ang bulgar nga anti-komunista nga mga rehimen nga nagapamigos kag nagapanghimulos sa proletaryado kag pumuluyo kag nagapang-ipit sa mga matuod nga komunista.
Ang pagsaway kag pagsikway sa moderno nga rebisyunismo isa ka sandigan nga bahin sang pundasyon nga teoretikal kag liwat nga pagtukod sang aton Partido. Indi pwede nga ipahigad sang ano man nga nagapamuno nga organo ang mga sandigan nga dokumento sang Kongreso sang Liwat nga Pagtukod, nga wala sang isa pa ka kongreso. Kag ngaa naman may magapamensar subong nga magsikway sa pagsaway sa moderno nga rebisyunismo ukon pagbalik sang kapitalismo subong sadto nga ini ginakumpirmar kag ginapamatud-an sang direkta nga pagbalik sang kapitalismo kag makasahi nga diktadurang burgis sa Sidlangan nga Europa kag Unyong Sobyet? Indi dapat iwaslik ni ipaambit sa Partido ang kahuy-anan nga nagasanto lang nga agumon sang rebisyunista nga hubon nga Lava.
Sa sulod kag guwa sang Partido, may ara nga pila lang pero babaan nga elemento nga nagadala sang mga idea sang insureksyunismo, populismo, liberalismo, sosyal demokrasya kag mga katulad, nga naimpluwensyahan sang pagpang-into kag pagpangwasak sang hubon nga Gorbachov sa Unyong Sobyet kag nagapanghamulay, nagapangguba kag nagapang-atake sa mga sandigan nga prinsipyo sang Partido. Pareho kamalahalon sang dapat nga pagsukot naton sa mga pinakaresponsable sa ila sa pagpasidungog sadto kay Aquino bilang kampeon sang demokrasya kag pagbangon sang ekonomiya, dapat sukton sila sa padayon nga pagpasidungog kay Gorbachov bilang ideolohista sang "sosyalista nga pagpanibag-o nga kusog kag demokrasya" (sa pagkamatuod, pagbalik sang kapitalismo, makasahi nga diktadurang burgis kag disintegrasyon sang Unyon Sobyet).
Ang makagaganyat nga paglibod ni Gorbachov nagaguwa nga pangatabon lamang sa lubos nga pagsikway sa Marxismo-Leninismo kag sa bug-os nga kasaysayan nga Bolshevik; para sa kapitalista nga pagre-istruktura kag pagguba sa produksyon; agud sa pagbangon sang makasahi nga diktadurang burgis; para sa paglarga sang nasyunalismo, mga inaway nga etniko kag gyera sibil; kag para sa pagtuhaw sang lain-lain nga tipo sang sapat, upod na ang rasismo kag pasismo kag nagaduing nga kriminalidad.
Handum sang mga imperyalista kag sang mga nagayaob sa ila nga mapakahuy-an kag mademoralisa ang mga proletaryo nga rebolusyonaryo sa Pilipinas bangud sa pagpukan sang mga nagapamuno nga partido kag rehimeng rebisyunista kag padayon nga magtalikod na sa Marxismo-Leninismo kag rebolusyon Pilipino. Pabay-an nga maideklara subong sing lubos kasinaw nga ang teorya sang Marxismo-Leninismo napamatud-an nga amo ang nagakaigo nga ubay sa katumanan sang bag-o nga demokratiko nga rebolusyon kag pagkatag sang pundasyon pangpulitika kag ekonomiko sang sistema nga sosyalista.
Ang Bag-o nga Dungganon nga Hangkat
Kadungan, ginakilala sang Partido nga ang matuod nga bag-o nga dungganon nga hangkat sa Marxista-Leninista sang hilikuton nga teoretikal kag praktikal amo ang problema sang pagpamatok sa moderno nga rebisyunismo, pagbalabag sa pagbalik sang kapitalismo kag pagpadayon sang sosyalistang rebolusyon. Pinakadaku nga amot ni Mao sa teorya nga Marxista-Leninista amo ang pagkilala sa problema nga ini kag ang iya pagtinguha nga malubad ini. Ang yadto nga pagtinguha nag-agom sang temporaryo nga kadalag-an sa sulod sang pila ka tuig pero sa ulihi napaslawan. Ang Komuna sang Paris sadtong 1871 nagdaog sa isa ka malip-ot nga panahon kag napaslawan. Pero ang teorya sang proletaryo nga rebolusyon kag diktadura sang proletaryado indi nadulaan sang pulos sang pagkapaslaw sang Komuna sang Paris. Matapos ang 46 tuig, magatindog ang una nga estado nga proletaryo.
Naglab-ot sang tryenta tubtob kwarenta ka tuig ang pagtukod sang sosyalismo (proletaryo nga diktadura kag sosyalistang konstruksyon pang-ekonomiya) sa kubay sang kapin isa ka bilyon ka pumuluyo kag treynta tubtob kwarenta ka tuig liwat para sa malinong nga ebolusyon sang moderno nga rebisyunismo pakadto sa hayagan nga kapitalismo kag lubos nga pagbalik sang makasahi nga diktadurang burgis sa pila ka banwa.
Isa ka bentaha sang rebolusyonaryo nga Pilipino nga ara sa halintang pa ini sang bag-o nga demokratiko nga rebolusyon kag natan-awan na sini kon paano natukod ang sosyalismo sa iban nga lugar para lamang mapukan kag mawasak. Kita, bilang mga rebolusyonaryo nga proletaryo, may bentaha sang paggamit sa napamatud-an na nga mga Marxista-Leninista nga prinsipyo sa bag-o nga demokratiko nga rebolusyon kag sa sosyalistang rebolusyon kag konstrukyon, subong man sang pagtuon sang mga leksyon gikan sa malinong nga ebolusyon sang sosyalismo pakadto sa kapitalismo kag sa ginalauman nga indi mapauntat nga liwat nga pagpagsik sang kahublagan nga anti-imperyalista kag sosyalista. Paagi sa pagtuon sa mga positibo kag negatibo nga leksyon sa rebolusyonaryo nga kasaysayan, ang rebolusyon Pilipino magaangkon sang kahigayunan nga maka-amot sa pagtinguha nga matukod ang sosyalismo kag mapunggan ang pagbalik sang kapitalismo.
Sa subong, labi na pagkatapos sang pagkinasadya sang burgesya sa pagpukan kag disintegrasyon sang mga nagapamuno nga partido kag rehimeng rebisyunista, nasaksihan naton ang mas malala nga mga problema sang pangkalibutan nga sistema nga kapitalista. Ang mga pinakamauswag nga banwa nga kapitalista labi nga nagabanggianay samtang nagadugay sa mga halambalan sa ekonomiya, pinansya, baligyaanay kag seguridad. Samtang nagapakitid ang pangkalibutan nga merkado, ginapadasig sang mataas nga teknolohiya ang kumpas sang indi-malubad-lubad nga kapitalista nga krisis sa sobra nga produksyon. Namentinar lamang ang pangkalibutan nga merkado paagi sa mga pautang nga indi naman masarangan mabayran, bangud ang mga kliyente nga estado, nga wala sang pagpasulabi, lubong sa utang kag nagadinutdutanay sa pang-eksport nga baligyaanay. Gani, wala sang may nabilin nga surplas nga pwede makaluwas sa ila sa labi nga pagkalubong sa utang, sa baylo labi nga nagapadaku ila mga depisit sa badyet kag balaklonon.
Sa pagkamatuod, labi nga nagamasami ang pangkatilingban nga kagamo kag paglupok sang kalakasan sa bug-os nga kalibutan, sa pihak sang mga pamulung-pulong nga pangkalinungan sang "bag-o nga pangkalibutan nga areglo". Nagalupok sa Ikatatlo nga Kalibutan kag sa mga bag-o nga kliyente nga estado sang imperyalismo sa Sidlangan ang mga kagamo sa pagkaon, kudeta kag kontra-kudeta, inaway nga etniko, gyera sibil, kag nagkalain-lain nga tipo sang kalakasan. Bisan sa mga kapitalistang banwa, ang resesyon sa ekonomiya nagatuga sang disempleyo, pagbuhin sang mga probisyon sa kaayuhan nga sosyal, nagabunga sang mga sosyal nga tensyon kag nagpapalala sang rasismo kag rasista nga kalakasan kontra sa mga mamumugon halin sa Ikatatlo nga Kalibutan.
Sa husto nga tion, halin sa bag-o nga pangkalibutanon nga kagamo, magasulong ang mga kahublagan nga anti-imperyalista kag sosyalista. Sa duso sang mga sirkumstansya, ang mga Marxista-Leninista nga partido nga maka-uyat sa ila proletaryo nga rebolusyonaryo nga integridad kag magapadayon sa mga rebolusyonaryo nga paghimakas kag ang iban pa nga partido nga matukod liwat sa mga banwa sa diin nabungkag kag nagarok sang mga rebisyunista nga partido liwat nga magatindog agud magsulong sang mga rebolusyonaryo nga paghimakas sa bag-o kag mas mataas nga lebel sa teoretiko nga pag-ubay sang Marxismo-Leninismo kag sa idalum sang hayahay sang proletaryo nga internasyunalismo.
