Komite Sentral, Partido Komunista sang Pilipinas
Hulyo 1992

Ang pinakatalalupangdon nga kadalag-an sang Partido kag sang pumuluyong Pilipino amo ang liwat nga pagpabaskog kag pagsulong sang rebolusyong Pilipino sa isa ka bag-o kag mas mataas nga lebel nga pangkasaysayan halin 1968. Mas labaw ang bag-o nga demokratikong rebolusyon sa daan nga demokratikong rebolusyon sang 1896. Ini ginapamunuan sang proletaryado paagi sa Partido kag may perspektiba nga sosyalista. Ang Partido yara sa sentro sang patag-awayan sa tunga sang rebolusyon kag kontrarebolusyon.

Ang Marxista-Leninista nga pag-analisa sang Partido sa kasaysayan kag subong nga sirkumstansya sang Pilipinas nag-angat sang lebel sang kinaalam nga teoretikal kag pulitikal, amo man sang rebolusyonaryo nga aktibidad, sang dugang nga mas mataas sa nalab-ot sadtong panahon sang 1930-38 sang daan nga Partido Komunista sang Pilipinas kag sadtong kasunod nga panahon sang daan nga gintingob nga partido sang mga partido Komunista kag Sosyalista, lakip na ang serye sang mga oportunistang Lava kag ila mga tagpanubli nga peke nga komunista.

Bunga sang maathag nga pagtumod sini sa kinaiya kag subong nga halintang sang rebolusyong Pilipino, mga motibong pwersa kag mga kaaway sini, mga katungdanan kag sosyalistang perspektiba sini, ang Partido nakatukod sa kaugalingon kag epektibo nga makagamit sa rebolusyonaryo nga armadong paghimakas kag nagahiliugyon nga prente batok sa imperyalismong US kag lokal nga mga sahing manughimulos kag makasulong sa pungsudnon-demokratiko nga rebolusyon sang pumuluyong Pilipino.

Bangud sang pagpamuno nga ginahatag sang Partido, nag-angat sang labi sang san-o man sa nagligad ang lebel sang rebolusyonaryo nga kamuklatan kag paghimakas sang pumuluyong Pilipino. Ang mga organisasyon sang sandigan nga masang anakbalhas nga mga mamumugon kag mangunguma kag sang petiburgesyang syudad nagsulong sang labi sa san-o man santo sa linya nga pungsudnon-demokratiko. Natukod ang Pulang gahum pangpulitika sa malagpad nga mga erya sa kaumhan, nga masarangan pangapinan sang Bag-ong Hangaway sang Banwa kag sang masa bisan pa ang kasyudaran yara sa idalum sa gihapon sang kontrol sang mga pwersang reaksyunaryo.

Bunga sang pagsubay kag pagpatuman sa husto nga linya pangpulitika sang Partido, nagalab-ot sa pila ka milyon ang masang nakapatapu sa mga organo sang gahum pangpulitika kag sa mga organisasyong masa pareho sa kaumhan kag kasyudaran. Ang Partido, Bag-ong Hangaway sang Banwa kag iban pa nga rebolusyonaryo nga pwersa yara sa daku nga bahin sang 65 sa 73 probinsya, sa pila ka gatos ka banwa kag pila ka libo ka baryo, kag nagaagom sang impluwensya sa bilog nga kapuluan.

Ang rebolusyonaryo nga kinaiya nga pulitikal sang armadong paghimakas (nga yara sa dagway sang inaway banwa) ginatalana sang pangkabilugan nga linya sang rebolusyong pungsudnon-demokratiko. Walay pulos ang aton nga armadong rebolusyon kon lihis sa linya nga ini. Ang hangaway sang banwa mismo isa ka organisasyon masa kag isa ka kahublagan masa. Ang armadong paghimakas sini sa kaumhan kalakip sang tunay nga reporma sa duta kag pagtukod sang baseng masa (mga organo sang gahum pangpulitika kag mga organisasyong masa).

Apang nagluntad ang mga paglihis sa aton pag-analisa sa katilingban Pilipino, sa pangkabilugan nga linya sang bag-o nga demokratikong rebolusyon kag sa estratehikong linya sang inaway banwa sa likod sang pakuno-kuno sang "pagbag-o", "pagpapino" kag "pagpasanto" sa mga ini.

Sa malawig nga panahon sang rehimeng Marcos kag pagkatapos sa panahon sang rehimeng Aquino, ang kahimtangan nga malakolonyal kag malapyudal sang katilingban Pilipino nagpabilin nga wala nagabag-o. Sa minatuod, labi pa ini nga nagdalum kag naglala. Ang ekonomyang pangkatilingban sang Pilipinas, kon ikumparar sa panahon sang liwat nga pagtukod sang Partido, labi nga nangin atrasado, agraryo, indi-industiyalisado kag malapyudal kag labi nga ginabayo sang krisis nga indi malubad-lubad. Ang sistemang pangpulitika ginakinaiyahan sang nagapalala nga kalakasan sa tunga sang mga hubon nga pulitikal kag militar sang mga manughimulos nga sahi.

Apang, may mga elemento nga muklat ukon di-muklat nga naimpluwensyahan sang imperyalistang propaganda nga ang Pilipinas naga-industriyalisa, nagauswag kag nagahimo nga urbanisado, labi na sadtong panahon ni Marcos sang ginpalapad ang mga operasyong daku nga kumprador nga pinondohan sang nagadalagku nga dumuluong nga pautang. Lakip sa mga kabangdanan nga ginsambit sang grupong Lava sa ila kolaborasyon sa rehimeng Marcos ang kuno ginahimo sini nga pag-industriyalisa sa pungsod kag kinahanglan na lang kuno nga buyukon ini halin sa neokolonyal pakadto sa pungsudnon nga banas sang industriyalisasyon.

Sa anupaman, pila ka elemento sang Partido ang daw nalatnan sang pareho sini nga klase sang mga ideya kag nagakwestyon sa panan-awan nga malakolonyal kag malapyudal ang katilingban Pilipino, labina antes mahimo sadtong 1983 ang isa ka kumprehensibo nga pagpaathag sa moda sang produksyon sa Pilipinas. Sadtong 1981, kadungan sang konsepto nga "tatlo ka estratehiko nga koordinasyon", ginsumiter sa Buro Pulitikal sang Komite Sentral ang isa ka hagna nga ikategorisa ang ekonomyang Pilipino bilang malakolonyal, malapyudal kag "mala-kapitalista". (Ginapa sang ulihi nga paglaragway nga ang Pilipinas nangin industriyalisado-kapitalista na.) Ginbalibaran ini sang Politburo pero pila sa mga nagasakdag sa hagna ang padayon nga nagpalapnag sini bisan matapos nga wala ginbaton sang sentral nga pamunuan.

Ginapanigal-ot sang hagna nga ang "urbanisasyon" sang Pilipinas naglab-ot na sa lebel nga mas mataas sa daan nga ginakaptan sa pag-analisa kag mga balasahon sang Partido. Ginasunod sini ang mga istatistisyan nga nagaisip sa bilog nga populasyon nga syudad paagi sa pagdugang sa populasyon sang Metro Manila (lakip na ang daku nga isip sang mga di-permanente nga nagapuyo didto nga mga wala sang pat-ud nga trabaho, mga estudyante kag mga pareho nila nga halin sa kaumhan sang Luson) sang populasyon sang mga syudad kag kabiserang probinsyal (nga magamay lamang ang mga sentrong komersyal) kag sang mga poblasyon sang mga munisipalidad.

Ang manipulasyon sa istatistika sang termino nga "urban" ginagamit sang pila ka elemento agud maglihis sa makasahing pag-analisa sang Partido sa katilingban Pilipino, sa pangkabilugan nga linya sang bag-o nga demokratikong rebolusyon kag sa estratehikong linya sang paglikup sang kasyudaran halin sa kaumhan. Ginapanigal-ot nila nga ang Pilipinas masobra 40 porsyento nga kasyudaran kag labi nga mas urbanisado sangsa daan nga nalab-ot sang Tsina ukon Byetnam.

Ginapanigal-ot man sang mga nasambit nga elemento nga indi na agraryo sa kalabanan ang katilingban kag ekonomyang Pilipino paagi sa pagtingob sa isa ka suma sang mga bahin sang sektor-industriya kag sektor-serbisyo sa distribusyon sang kusog-pangabudlay ukon sang mga bahin sang mga ini sa mga natuga nga produkto, bagay nga ginapatupong sa bahin sang agrikultura sa ekonomya nga wala sang pagsuma sa pagka-dependyente sa import sang mga sektor nga ini, sa pagsalig nila sa agrikultura, kag sa bahin sang agrikultura nga indi pormal nga nagalutaw sa merkado.

Ginapanigal-ot pa nila na masobra 55 porsyento sang populasyon nga rural ginabug-os sang mamumugon sa uma, nga wala sang pagtuhay sa tunga sang mga mamumugon sa uma nga nagapadalagan sang modernong makina kag sang labi nga mas madamo nga tradisyunal nga mamumugon sa uma (masobra 95 porsyento) nga mga imol nga mangunguma sa gihapon ukon indi gani direkta nga ekstensyon nila.

Sa basehan sang mapaniplang nga mga istatistika nga ini, ginaakusar ang Partido sang kasal-anan nga himu-himo lang: ang sobra nga pagtum-ok sa hilikuton sa kaumhan tubtob nga napabay-an ang hilikuton sa syudad. Ginaduso nga islan ang teorya sang inaway banwa kag hulu-halintang nga pagtukod sang hangaway sang banwa sang sala nga linya nga kumbinasyon sang armadong insureksyung urban kag "regularisasyon" ukon adelantado nga pagtukod sang mga pormasyong militar nga indi-masustine.

Halin 1980 nagtuhaw ang nanari-sari nga hagna nga nagapalapad sa sakop sang kahublagan sa syudad kag nagahigot sang dalagku kag matawo nga mga tipak sang kaumhan sa oryentasyon nga urban indi dala sang pangmadalian nga bentahe ukon kakinahanglanon sa pagtulunga sang mga hilikuton kundi bilang halambalanon sang estratehiko nga oryentasyon, kadungan, ang direkta ukon di-direkta kag hungod ukon indi-hungod nga pagduso sang nanari-sari nga ideya sang labi nga pagpadaku sa estratehiko nga kabug-aton sang kahublagan sa syudad kag insureksyunismong urban. May ara nga hagna nga direkta nga sakupon sang rehiyong Maynila-Rizal ang dalagku nga tipak sang Sentral kag Nabagatnan Luson; mga hagna nga iwarik ang kabilugan nga tum-ok sang Sentral Luson halin armadong paghimakas pakadto sa hayag nga kahublagan masa kag insureksyon; pagtulunga nga "pulang erya" - "puting erya" sa Mindanaw nga nagtalana sa ulihi sang mga kapatagan kag matawo nga mga lugar nga nakapalinot sa gagmay nga syudad kag kabiserang probinsyal kag ginpasakop sa kahublagan nga nakabase sa syudad; sang hagna nga pagtulunga nga bukid-patag nga nagatalana sang oryentasyon nga pagtukod sang base sa una kag pag-alsa sa ulihi; kag mga hagna nga himuon nga pangkabilugan nga tum-ok sa kahublagan nga mangunguma kon indi man sa bilog nga rebolusyonaryo nga paghimakas ang hayag nga kahublagan masa sa mga kapatagan nga may oryentasyon nga pakadto sa mga pag-alsang masa.

Sadtong 1987 isa ka magamay nga grupong makapilihak sa Negros ang nagtulod pa nga ang katilingban Pilipino nangin "kapitalista" na kag sa basehan nga ini upod sang iban pa, nagsakdag sang linya sang pag-ampo sa rehimeng Aquino, pag-abandona sa armadong paghimakas kag pagwarik sa parlamentaryong paghimakas.