Komite Sentral, Partido Komunista sang Pilipinas
Hulyo 1992

[NOTA: Ini ang pinal nga dokumento nga gindugangan kag gin-aprubahan sang Komite Sentral sang Partido. Ginabayluhan sini ang burador nga ginsulat ni Tsirman Armando Liwanag kag ang bersyon nga gin-amyendaran kag gin-aprubahan sang Komiteng Manugpatuman.

Ini isa ka internal nga dokumento sang Partido. Wala sang sin-ukon man nga kadre sang Partido nga makabaton sang kopya ang pwede magpadamo sini nga wala sang pag-aprubar halin sa mas mataas nga organo.

Ang dokumento nga ini dokumento sang pagsuma kag kadungan, dokumento sang kahublagan sa pagpanadlong. Gani laban ang mga pahayag nga kritikal sangsa mga deklarasyon nga nagasaludo sa mga kadalag-an sang Partido.

Ang bag-o kag wala pa nabantala nga mga datos nga ginaplastar sa dokumento nga ini indi pwede ibantala sang wala sang pahanugot kag pag-apbrubar gikan sa mas mataas nga organo sang Partido.]

Liwat naton nga palig-unon ang mga sandigan nga rebolusyonaryo nga prinsipyo sang Partido. Ang 1mga ini ang ubay nga giya sa pagtasa kag pagsaludar sa mga kadalag-an sang Partido, subong man sa pagtratar sa mga palaligban kag mga pag-atras nga waay sang katupong sa nagligad.

Ang aton nga mga prinsipyo nakasaad sa mga dokumento sang liwat nga pagtukod, pareho sang "Tadlungon ang mga Kasaypanan kag Liwat nga Tukuron ang Partido", Konstitusyon kag Programa sang Partido. Bilang mga proletaryo nga rebolusyonaryo, dapat permi nga ginatakos naton ang aton nga kaugalingon sigun sa mga prinsipyo nga ini.

Upod sa mga prinsipyo nga ini ang mga masunod : pagsunod sa teorya sang Marxismo-Leninismo, pagsikway sa moderno nga rebisyunismo, makasahi nga pag-analisar sa katilingban nga Pilipino bilang malakolonyal kag malapyudal, pangkabilugan nga linya sang bag-o nga demokratiko nga rebolusyon, nagapamuno nga papel sang proletaryado paagi sa Partido, teorya sang inaway banwa kag estratehiko nga linya sang paglikup sang kasyudaran halin sa kaumhan, nagahiliugyon nga prente santo sa rebolusyonaryo nga linya sa sahi, demokratiko sentralismo, sosyalistang perspektiba kag proletaryo nga internasyunalismo.

Sa mga nagligad nga tuig, ang daku nga mayorya sang kadre kag katapu sang Partido nag-uyat sa mga sandigan nga prinsipyo nga ini kag nag-agom sang mga dalagku nga kadalag-an sa pagsulong sang rebolusyon Pilipino. Sa malawig nga paghimakas sa pasistang diktadurang US-Marcos, ang Partido nagtungod sang pinasahi nga papel tubtob sa katapusan kag masangkad kag madaluman nga nakasulong sang rebolusyon Pilipino sa lebel nga mas mataas sangsa bisan san-ukon sa nagligad.

Sa ubay sang pangkabilugan nga linya sang Partido, husto nga mga taktika kontra sa pasistang diktadurang US-Marcos, kag polisa sa hulu-halintang, komprehensibo kag tayuyon nga pagsulong sang armado nga rebolusyon, kag paagi sa isganan nga paghimakas kag mga sakripisyo sang mga kadre kag katapu sang Partido kag sang rebolusyonaryo nga masa-- nalab-ot sang Partido, hangaway sang banwa, kahublagan pangmasa kag rebolusyonaryo nga nagahiliugyon nga prente sadtong una nga tunga sang dekada 1980 ang kasangkaron kag kabaskugon nga wala pa sang katulad sa kasaysayan sang liwat-nga-natukod nga Partido kag nakalabaw sa katag kag kabaskugon nga nalab-ot sang putuk-putukan sang armado nga rebolusyon sa pagpamuno sang daan nga partido nga gintingob.

Kadungan, may ara mga malala nga paglihis kag kasaypanan nga nagtuga sang mga malala nga kahalitan sa Partido kag rebolusyonaryo nga kahublagan pangmasa, subong man ang iban pa nga mga kasaypanan kag kakulangan bisan indi pareho kaseryoso nakatuga man sang mga kahalitan kag nangin sablag sa pagsulong sang rebolusyon. Dala sang petiburgis nga pagpadasu-daso kag suhetibismo kag sa atubang sang mapagsik nga pagsulong sang rebolusyon kag madasig nga pagluya sang pasistang diktadurang US-Marcos, nagtuhaw sa sulod sang Partido ang mga konsepto sang pagsulong nga nagalisa sa mga sandigan nga prinsipyo kag sa teorya kag linya sang inaway banwa, nagalupad palayo sa mga kongkreto nga kundisyon kag aktwal nga kusog sang mga rebolusyonaryo nga pwersa, tuman nga nagadali-dali, kag nagahandum maglaktud sa mga halintang nga kinahanglan nga agihan sa pagsulong sang rebolusyon.

Pinakamalala sa mga ini ang linya nga nagakumbinar sang paghandom sa armado nga insureksyon sa syudad kag "regularisasyon" sang hangaway, nga nagpalapnag sa kaumhan sang mga buhat nga adbenturistang militar kag panan-awan nga lunsay militar kag sa kasyudaran, sang mga ideya kag aksyon nga putsista kag nagapangalaba sa ispontanyong masa. Bunga sang obsesyon sa insureksyon nga urban kag adelantado nga pagtukod sang mga mas mataas kag indi pa masarangan isustiner nga pormasyon militar (mga kumpanya kag batalyon) kag mga istruktura nga istap nga sobra na kabug-at sa {pataason, nadingutan sang mga kadre nga kinahanglanon sang hilikuton pangmasa sa kaumhan. Ginapagwa nga ini pagsigo ukon pagpapino sa teorya kag praktika sang inaway banwa ukon indi gani isa ka superyor nga teorya ukon estratehiya. Gani, ginatublag kita subong sang pagkabuhin sang baseng masa kag kadungan nga iban pa nga mga problema, nga sa kalalaon wala pa man sang katupong sa nagligad nga inagihan sang liwat nga gintukod nga Partido.

Ang mga malala nga paglihis kag pagsayup madugay nga wala natumod, nasaway kag nakakas. Ang mga ini napabay-an nga maglapnag kag makaimpluwensya sa mga dalagku nga bahin sang organisasyon sang Partido, magtuga sang daku nga disoryentasyon kag kahalitan, nagtig-a tubtob sa direkta nga nagpangindi sa pagsaway kag pagpanadlong, kag naglab-ot na subong sa kalalaon nga nagabutang sang mismo nga kabuhi sang Partido kag rebolusyonaryo nga kahublagan pangmasa sa peligro.

Bisan man, ang husto nga linya kag mga tagsakdag sini nagapangibabaw pa gihapon sa sulod sang Partido kag may ikasarang nga padayon nga magpangibabaw sa sala nga linya. Dapat athagon nga mas mabaskog pa man kita subong sangsa sadtong 1968, 1977 ukon 1980 sa madamo nga bagay. Ang kabilugan nga pwersa sang Partido, hangaway sang banwa kag kahublagan pangmasa sa kaumhan kag kasyudaran mas ukon menos ara sa lebel sadtong 1983 ukon 1984. Sa tion nga natadlong ang mga paglihis kag pagsayup kag mas napalig-on ang pag-usoy sa husto nga banas, ang pwersa nga napundar kag uyat naton tubtob sa subong bastante agud ipadayon ang pagpabakod kag pagpauswag sa luto nga lebel sang estratehiko depensiba. Mapag-on ang basehan agud padayon nga pamunuan ang masa (muklaton, organisahon kag pahulagon sila) kag ilunsar kag iduso ang mga opensiba nga masarangan naton (mga aksyung masa kag armado nga opensibang taktikal).

Ang kaaway nagadamgo nga bugtaw sa pagpahambog nga malutos ang Partido kag pumuluyo sa 1992 kag 1993. Ang nagahari nga sistema ginabayo sang nagalala nga krisis sa pulitika kag ekonomiya. Nagapasingki ang kalakasan sa tunga sang mga paksyun pangpulitika sang mga manughimulos nga sahi. Ang indi pa industriyalisado nga ekonomiya nga malakolonyal kag malapyudal padayon nga ginahuthot sang mga lokal nga manughimulos nga sahi kag mga istablisimento kag bangko nga multinasyunal. Ang krisis nagatulod sa pagrebolusyon sang pumuluyo kag nagaserbi nga matambok nga duta para sa armado nga rebolusyon kag ligal nga kahublagan nga demokratiko.

Kinahanglan nga malig-on kita nga manindugan bilang mga proletaryo nga rebolusyonaryo, pareho sang mga Bolshevik sadtong madasig nga nagpalapad ang kapitalismo pakadto sa moderno nga imperyalismo sa panahon sang Ikaduha nga Internasyunal kag pareho man sang mga Komunista nga nagpamatok sa pasismo sa isa pa nga panahon antes, sadtong panahon kag pagkatapos sang Ikalawang Inaway Pangkalibutanon. Kinahanglan nga malig-on kita nga manindugan kag magbato subong sa isa pa ka madulum nga halintang, sa kahimtangan nga daw wala na sang may nagahangkat ukon may ikasarang nga maglutos sa kapitalismo bunga sang pagkarusdak sang Unyong Sobyet kag mga nagahari nga partido kag rehimen nga rebisyunista kag pagilis sa ila sang hayag nga makasahi nga diktadurang burgis kag mga rehimeng kapitalista.

Ang permihan nga krisis sang malakolonyal kag malapyudal nga sistema nga pangkatilingban padayon nga nagapalala kag nagatuga sang mga kundisyon para sa pagsulong sang aton nga malawigan nga armado nga rebolusyon. Ginalantaw naton ang nagapadaku na nga nagapadaku nga mga kontradiksyon sa kubay sang mga kapitalistang gahum, sa tunga nila kag sang nagadamo nga malakolonya nga lugdang sa utang, sa tunga sang mga lokal nga nagahari nga sahi kag sang ila mga dumuluong nga amo sa isa ka bahin kag sang mga pigos kag ginahimuslan nga pumuluyo kag pungsod sa pihak nga bahin, kag sa tunga sang burgesya kag proletaryado.

Tanan nga kontra-rebolusyonaryo nga kampanya sang kalakasan kag pagpaniplang mapaslawan basta ang Partido sampaton nga nagasuma sang mga inagihan, nagasaway, nagasikway kag nagapanadlong sa mga dalagku nga kasaypanan kag paglihis nga seryoso nga naghalit sa Partido kag sa rebolusyonaryo nga kahublagan pangmasa. Masarangan padayon nga pabakuron sang Partido ang kaugalingon paagi sa pagbase sa mga kadalag-an sa nagligad kag subong, paghiwat sang pagsaway kag pagsaway-sa-kaugalingon sa isa ka komprehensibo nga kahublagan sa pagpanadlong kag husto nga pagtalana sang mga bag-o nga katungdanan.

Sa atubang sang mga pag-atake sang kaaway kag sang mga paglihis kag kasaypanan nga seryoso nga nakapanghalit sa mga rebolusyonaryo nga pwersa kag sa pumuluyo, kami nagapanawagan sa tanan nga kadre kag katapu sang Partido nga palig-unon liwat ang mga sandigan nga prinsipyo, tumuron kag tadlungon ang mga mayor nga paglihis, kasaypanan kag kakulangan, kag pabakuron ang aton Partido sa ideolohiya, pulitika kag organisasyon.

Sa pihak sang dalagkuan nga pagkabuhin sa pwersa naton sa pila ka lugar may pila ka elemento nga nagapanigal-ot sa ila pagpadasu-daso. May ara naman nga nagawaslik halin sa sobra nga-wala pakadto sa natuo nga pusisyon. Tuman nga malahalon nga matumod ang mga ugat sa ideolohiya, pulitika kag organisasyon sang mga mayor nga kasaypanan kag kakulangan, mahibal-an ang mga sirkumstansya nga gintuhawan sang mga ini kag makilala ang kahalitan nga tuga nila, agud husto nga matalana ang banas sang pagsulong kag mapabakud ang Partido kag rebolusyonaryo nga kahublagan pangmasa.

Sarang magsambit sang indi maisip nga mga partikular nga kadalag-an kag mga partikular nga problema. Pero sa dokumento nga ini, nagapanguna nga katuyuan ang tumuron, sawayon kag tadlungon ang mga mayor nga paglihis, kasaypanan kag kakulangan nga may pinakadaku nga kapuslanan sa subong nga kahimtangan kag padayon nga pag-uswag sang aton Partido kag rebolusyonaryo nga kahublagan. Samtang diri masangkad nga ginarepaso kag ginatun-an ang aton nagligad nga praktika kag mga subong nga sirkumstansya, kinahanglan pa gihapon ang mga pagtasa kag pagsuma nga dapat hiwaton sa lain-lain nga sakop.

Sa kabilugan, ang Partido may bastante nga kusog kag kapagsik agud lubaron ang mga problemang madugay na nga nagaluntad kag pangibabawan ang mga kapyerdehan nga waay katupong sa nagligad. Labi pa naton nga mapabakud ang aton kaugalingon kag masulong ang rebolusyon.