Komite Sentral, Partido Komunista sang Pilipinas
Hulyo 1992
Ang Pagpalapnag sang Sayup nga Linya sa Pungsudnon nga Sakop
Ang linya nga kumbinasyon sang armadong insureksyong urban kag adbenturismong militar wala nasaway, wala nasikway kag wala natadlong tigaylo naglapnag sa pungsudnon nga sakop kag nagtuga sang mga kahalitan kag pagkalutos sa rebolusyonaryo nga kahublagan sa bilog nga pungsod nga wala pa sang katupong sa nagligad.
Ang ika-9 nga plenum sang Komite Sentral sadtong 1985 nangindi sa balayon nga Pulang Erya (Paghimakas nga Militar) - Puting Erya (Paghimakas nga Pulitikal) apang wala ini natumod nga isa ka linya nga insureksyunista, wala lubos nga nagsaway sini kag wala man nag-atas sang pagtadlong sang organisasyon sang Partido sa Mindanaw. Nagpangibabaw sa minatuod ang pagkaganoy sa marantog apang mapamatud-an nga pangmadalian nga mga kadalag-an sa Mindanaw sa pihak sang napahayag nga manaiulat na makatulublag nga kadakuon sang kaswalti kag problema sa bala samtang wala pa sang lubos nga balos-salakay ang kaaway. Ang lawas kag mga bahin sini gindinala kag gintabid sang madamo nga kadre nga halin sa Mindanao ukon impluwensyado nila, bilang mga "abanse nga eksperyensya" ukon "mas maayo" nga pamaagi sang pagdala sang paghimakas. Ang mga yabi nga elemento sang sayup nga linya kag ang praktika sini, pareho sang todo-larga nga pagpakig-away partisano sa kasyudaran kag "regularisasyon" sang hangaway sang banwa ginsakdag kag ginpasulod sa programa para sa "estratehikong kontra-opensiba". Ang taktikal nga programang nakatumod sa desaysibo nga kadalag-an batok sa diktadurang US-Marcos paagi sa "estratehikong kontra-opensiba" nagsutsot man sang labi nga pagkaganyat kag paghampang sa ideya sang armadong insureksyong urban.
Halin 1986 ang pagsikway sang Partido sa kasaypanan nga boykot ay gin-gamit nga instrumento sang mga nagalibod sang linya sang armadong insureksyong urban paagi sa pagpadaku sa kasaypanan nga ini bisan pagkatapos sang pagtadlong (samtang ginapalubog naman ang mas daku nga kasaypanan kag mas temprano nga kahalitan sang mga rebolusyonaryo nga pwersa sa Mindanaw) kag pagpatuhaw nga ang pagsikway sang kasaypanan nga boykot amo ang pamatuod sang kahustohan sang linya sang armadong insureksyong urban. Sa umpisa sang paghari sang papet nga rehimeng Aquino, nagtuhaw ang nanari-sari nga pagpati nga sobra nga nagapadaku sa demokratikong ispasyo, sa makibanwa kag demokratiko nga posibilidad ni Aquino, kag sa kadalumon sang kahalitan nga gintuga sang pag-alsang Edsa sa reaksyunaryong paghari kag makinarya sang estado, kag nagduso base diri sang "seryoso nga pagkilala sa posibilidad kag paghanda para sa insureksyon". Ginplastar ang nanari-sari nga hagna nga insureksyunista pareho sang plano para sa "fast track" nga pagdaog sang rebolusyon kag paggamit sang away sa Constitutional Commission, negosasyon pangkalinungan kag iban pa para madasig nga magtuga sang panibag-o nga polarisasyon kag dalagkuan nga kumprontasyon base sa mga isyung pungsudnon kag demokratiko. Sa atubang sang mas masingki nga kalakasan kag paksyunal nga kinagubot sang mga reaksyunaryo, ang "pag-agaw sa mga oportunidad" ang nangin paborito nga postura kag bukang-bibig sang mga nagahandom sang insureksyong urban. Gani sa kada magtuhaw ang pagtilaw nga kudeta, nagaalawas ang insureksyunistang ilusyon kag ispekulasyon sang pila ka kadre kag yunit sang Partido nga nakabase sa syudad.
Kon nagakinaugalingon, ang linya sang armadong insureksyong urban mahamulag kag wala sang mahimo, apang ini' nakahalit sa Partido kag rebolusyonaryo nga kahublagan paagi sa pagbuyok sa mga kadre kag katapu sang Partido nga magpabilin sa kasyudaran samtang labi nga kinahanglan sila sa kaumhan, paagi sa pagdabok sa handum sang lampas sa ikasarang sang rebolusyonaryo nga kahublagan sa syudad kag pagsulit sa Maynila-Rizal mismo sang kalalat-an nga "pulitiko-militar" nga inagihan sa Syudad sang Davao, kag mas malala pa, paagi sa pagpakigkumbina sa mga nagasakdag sang "regularisasyong" militar.
Ang linya sang madasigay nga pagtukod sang mga kumpanya kag batalyon kag pati sang pagpadamol sa ibabaw sang mga istap militar kag pagbutong sang mga kadre palayo sa hilikuton sang pagpalapad kag pagpabakod sa kubay sang pumuluyo naglapnag sa umpisa paagi sa Pungsudnon nga Kumperensyang Militar sadtong ulihi nga bahin sang 1984, pagkatapos, sang programa sang pagkumpleto sang mga rekisitos sa SCO sang sentral nga pamunuan, kag nagpadayon sa kadugayon sa duso sang mga kumperensyang militar sang pungsudnon nga istap militar (nga ginhimo nga pangkabilugan nga kumand sadtong 1987) sang BHB. Ang mga ini naghaon sang simple nga mga basehan nga pareho sang masunod: nasakop na naton ang tanan nga estratehiko nga bahin sa banwa, bastante na ang kadamuon sang aton mga prenteng gerilya, bastante na ang kalaparon sang aton baseng masa, atbp. Gani, panahon na nga pabaskugon ang BHB sa pamaagi nga bertikal, regularisahon ini, tukuron ang organisasyon sang hangaway nga separado sa Partido, mag-ispesyalisa sa hilikuton militar kag pag-away. Halin sadtong kumperensyang militar sadtong 1984 nabalay kag naglapnag man ang pagpati nga nadeploy na ang mga estratehiko nga reserba sang kaaway; indi na niya masarangan nga dalagkuan nga magdugang sang kadamuon sang tropa; kag ang pagpabaskog niya mas sa kalidad sangsa kantidad.
Sadtong ulihi nga tunga sang 1986 kag sadtong 1987, may muklat nga pagtinguha ang Komisyon sa Mindanaw kag mga komite sang Partido sa mga rehiyon sa isla nga kontrolon kag pangibabawan ang mga makahalalit nga resulta sang Kampanyang AHOS, tadlungon ang mga kasaypanan kag liwat nga pabaskugon ang mga rebolusyonaryo nga pwersa. Apang sadtong 1987 man, labi nga nagdugang naman ang pagpalapnag sang linya nga "regularisasyon" sa pungsudnon nga sakop.
Ang pangkabilugan nga kumand sang BHB aktibo nga nagduso sang pagtukod sang mas dalagku nga pormasyon kag pagtukod sang mga istap militar. Gindala nila ang pagpati nga "nakadeploy na ang mga estratehiko nga reserba sang kaaway" kag nagaluntad ang kahimtangan para sa mga "lokal nga estratehikong kontra-opensiba". Nagmandu ang pangkabilugan nga kumand sang isa ka "pungsudnon nga koordinadong kampanya" nga nagsalig sa daku nga subsidyo halin sa ibabaw kag naggasgas sa mga yunit, sa istak sang bala kag lohistika, nagbunga sang mga banggianay kag kiskisanay sa tunga sang mga kumand sang hangaway kag mga teritoryal nga organo sang Partido, naglunsar sang mga aksyong militar nga malan ang epekto sa pulitika, kag nakapagpahayaw sa mga tauhan sang istap kag kagamitan sa radyo nga nakabase sa Metro Manila, kabaylo ang madamu-damo nga kaswalti sang kaaway kag pila ka isip sang armas nga nakumpiska.
Sa mga rehiyon sang Luson kag Kabisayaan, labi nga ginpadasig ang pagtukod sang mga kumpanya kag pagpasingki sang mga operasyong kumpanya, naglapnag ang konsepto sang pagpalupok sang mga pag-alsang mangunguma nga ginhanay nga daw isa ka kinaandan nga dagway sang pangmasang paghimakas, kag may pila ka naghanda sang mga "flash points" para sa mga pag-alsa sa tion nga may "oportunidad". Isa ka prenteng gerilya sa Naaminhan Luson ang halos lubos nga nawasak pagkatapos magtungod sang serye sang mga "insureksyunaryong aksyong masa", kampanya sang pagkumpiska sang mga propyedad sang agalon nga mayduta, deklarasyon sang implementasyon sang maksimum nga programa sang reporma sa duta kag iban pa nga aksyon nga pareho kuno sa Pag-alsa sang Anihang Taglagas (Autumn Harvest Uprising) sa Hunan kag nakatungtong sa pagpati nga luto na ang kahimtangan para sa mga "lokal nga estratehikong pagkapatas". Sa panahon nga ini, sobra nga ginpasingki ang mga operasyon sang mga armadong pagpakig-away partisano sa Metro Manila kag iban pa nga syudad, tubtob na sa lebel nga nagalapas sa ligal kag depensiba nga kinaiya sang paghimakas sa mga sentrong syudad nga ini.
Ang sentral nga pamunuan sang Partido may daku nga bahin sang responsibilidad sa mga pagkaguba sang husto nga balanse kag sa programa sang "regularisasyon" nga pangunahon nga nagtuga sang mga ini. Luwas sa responsibilidad sini sa kabilugan nga programa sang SCO, kinumpirma kag ginpalig-on sini ang madamo sa mga inisyatiba kag panan-awan halin sa mga mas manubo nga yunit nga nagaduso sang "regularisasyon". Apang tuig-tuig, gintum-ok ang pagsalig sa nagapalapad kag nagapadalum nga baseng masa. Kag halin sa pahayag sa anibersaryo sang Partido sadtong 1988, gintum-ok ang malapnagon kag maikit nga pagpakig-away gerilya nga nakasalig sa malapad kag madalum nga baseng masa, sang wala ginaserahan ang pwertahan sa pagtukod sang mga kompanyang gerilya nga masarangan isustine kag nakabit para sa hilikuton pangmasa kon indi lumabatok ukon wala sa kahanasan. Madamo ding komite sang Partido sa rehiyon ang naghapag sang mga tanong, pagdadalawang-isip kag rekonsiderasyon kaangot sang sobra nga butong kag mga target sa "regularisasyon". Gani sa pila ka kahigayunan may ginhimo nga mga pagbabawas sa isip sang mga kompanyang ginabug-os ukon indi gani may ginahimo nga mga pagbag-o sa disposisyon sang mga ini santo sa estratehiya kag mga taktika sang pagpakig-away gerilya. Sadtong temprano nga bahin sang 1989, nadesisyunan ang mga bag-o nga tum-ok kag prayoridad sa hilikuton pangmasa kag mga lokal nga pwersang gerilya kag ang pag-untat sang programa sang pagpadamo sang mga kumpanya. Kag sadtong 1990 pormal nga ginbuy-an ang programa para sa SCO. Bisanpaman, ang pangkabilugan nga kumand sang BHB sa panahon nga ini, bisan nagapahayag sang pagkilala sa absoluto nga pagpamuno sang Partido, padayon nga nagdepensa kag nagduso sang kaugalingon nga linya sang "regularisasyon" kag nagbanggi sa mga pagsaway diri sang Partido.
Daku nga kahalitan sa rebolusyonaryo nga kahublagan ang bunga sang "regularisasyon". Halin 1987 tubtob 1990, nagnubo sang halos 60 poryento ang katapuan sang mga organisasyong masa, 16 porsyento ang isip sang baryo nga sakop sang mga prenteng gerilya, 15 porsyento ang katapuan sang Partido. Bisan padayon nga nagadaku tuig-tuig ang isip sang riple sang hangaway sang banwa, ang isip sang nagadugang kada tuig mahulog sa tantos nga pareho sadtong 1976 - 1978. Labi pa, nagnubo sang 28% ang kabilugan nga isip sang tinawo sang hangaway sang banwa, sa lebel nga mas manubo pa sangsa 1985. Daku nga isip sang kadre sa lebel probinsya, prente kag distrito ang nadula kag madamo sa ila ang wala pa naislan.
Sa sulod sang baynte ka tuid, isa ka bagay nga mapabugal sang liwat nga natukod nga Partido ang ideklara tuig-tuig nga komprehensibo nga nadugangan ang pwersa sang rebolusyonaryo nga kahublagan. Mahimo sang kaaway nga magkonsentra batok sa pila ka lugar ukon rehiyon kag makapanghalit, apang ang kahublagan nagakadugang naman sang pwersa sa iban nga lugar kag sa pungsudnon nga sakop.
Sadtong 1971, ang mga pwersang rebolusyonaryo nalutos sa kalabanan sa ikaduha nga distrito sang Tarlac, sa diin nagagamit ang kaaway sang bilog nga dibisyon (Task Force Lawin), mga pwersang paramilitar (mga BSDU) kag mga "aksyong sibiko" ("civac") halin 1969 tubtob nga 1971, sa pagtinguha nga lauton ang pwersang BHB nga may 200 hangaway lang. Apang ang rebolusyonaryo nga hilikuton sa Isabela, nga ginsuguran sadtong temprano nga bahin sang 1969, nakatuga na sadto sang baseng masa nga madamo nga bes nga mas daku sangsa yara sa Tarlac.
Pagkatapos, nag-abot ang panahon nga ang mga pwersa sa Isabela naputong sang kaaway sa Forest Region halin 1972 tubtob 1976 bunga sang kadungol kag kasaypanan sa pagpabilin sang tatlo ka kumpanya kag isa ka platun sa sulod sang paglikup sang kaaway. Apang ang mga pwersang gerilya kag ang baseng masa sa iban pa nga rehiyon sang pungsod talalupangdon nga nagadaku halin 1974 kag pagkatapos. Sa kadugayon, indi lang mabawi ang teritoryo nga pangmadalian nga nabiyaan sa Tarlac, kundi pila pa ka probinsya sa Sentral Luson ang dugang nga masakop halin 1972 kag pagkatapos.
Sadto lamang 1988 nag-umpisa nga magrehistro ang Partido sang paggamay sang baseng masa sa kaumhan sa pungsudnon nga sakop. Ginapahagan-hagan naton ang aton balatyagon sa paghambalo nga indi naman tama kadaku sini kon lantawon ang pagsingki sang pag-atake sang kaaway kag sa pagkamatuod nagbaskog naman kita bangud labi kita nga napanday sa paghimakas. Bisan may natumod nga pila ka internal nga kahinaan kag kakulangan, wala naton lubos nga natasa ang mga kasaypanan sang kaugalingon natin nga kubay kag sa baylo, ang tendensya amo ang ipasibangud sa mga atake sang kaaway ang mga pagkabuhin.
Madamo sa atin ang nagsalangisag sa "gyera sang madasigay nga desisyon" kag "gradwal nga konstriksyon" sang kaaway kag nahalawhaw sa kadakuon sang mga pagsalakay sang kaaway kag malala nga epekto sang mga ini sa aton baseng masa kag armadong paghimakas. Apang ang mga ini, kon tun-an, mga daan nga tinaga kag daan nga estratehiya kag taktika sang kaaway, pareho sang dapat mabal-an sang sin-o man nga nakatuon sang mga tudlo ni Mao bahin sa inaway banwa. Matuod nga ang "gyera sang madasigay nga desisyon" kag "gradwal nga konstriksyon", nga naatubang naton halin 1987 may pila ka partikularidad pareho sang dulungan nga pagpakat sang mga dibisyon kag brigada sang kaaway sa mga pangunahon nga prenteng gerilya naton sa bilog nga pungsod, ang dugang nga determinasyon sang kaaway nga ipadayon ang lebel sang konsentrasyon sang iya tropa kag mga opensiba sa target nga mga prente sa relatibo mas malawig nga tinion, ang malaparan kag sistematiko nga pagtukod sang mga vigilante kag mga CAFGU, kag ang bentahe sang popularidad ni Aquino sadtong mga una nga tuig niya. Apang napangibabawan na naton ang amo nga sini nga estratehiya sang kaaway sang nagligad. Kag bisan subong, makabesar, mapasanto, kag amat-amat naton ini nga mapangibabawan sa kabilugan kag sa madamo nga lugar.
Nagasanto sa mga pwersa sang kaaway nga nagaaway sa gyera sang madasigay nga desisyon ukon estratehikong opensiba bangud sa ila superyoridad sa militar -- sa isip sang tropa, armas, lohistika kag kahanasan. Apang sa lebel sang taktika, sa diin gusto nila nga magdaog sa mga away, nagakapaslawan sila bangud wala sila sang suportang popular. Gani, nagadangat sila sa paggamit sang ginatawag nila nga "gradwal nga konstriksyon" ukon pagpakig-away nga "blockhouse" (mga linya sang mga kampo kag portipikasyon para kubkubon kag kontrolon ang sakop nga teritoryo), kakumbina sang mga "grupo sa ispesyal nga operasyon" (SOT), pag-organisa sang mga pwersang paramilitar kag paggamit sang isa ka paltik nga tipo sang hilikuton pangmasa.
Sa bahin sang BHB, ang husto nga sabat sa estratehikong opensiba sang mga pwersa sang kaaway amo ang estratehikong depensiba. Sa kongkreto, ginahimo naton sila nga bingol kag bulag sa malapad nga sakop paagi sa pagkuha sa partisipasyon kag pagsuporta sang pumuluyo. Sa lebel sang taktika, nagalunsar kita sang pagpakig-away gerilya paagi sa pagtipon sang superyor nga pwersa para magtungod sang mga opensibang taktikal batok sa mga yunit sang kaaway nga masarangan naton lutuson sang gulpyada. Ang mga pwersa sang kaaway pwede man nga magkonsentra diin man nga lugar kag makaagaw sa aton sang mga partikular nga sakop apang mapilitan naman sila nga maghalog sa indi hamak nga mas malapad nga sakop sa iban nga lugar. Masarangan kag dapat permi kia nga nagasakop sang teritoryo nga labi nga mas malapad sangsa sa napalibutan sang iya dalagku nga pwersa kag opensiba samtang ginakumbina naton ang mga anihilatibo kag atritibo nga taktikal nga aksyong gerilya kag mga mobilisasyong masa para awayon kag pabudlayan siya sa mga lugar nga iya ginakonsentrahan.
Ang ginahimo sang mga nagaproponer sang madasigay nga kadalag-an militar kag sang linya nga "regularisasyon" amo ang adelantado nga pagtukod sang mga daku kag indi-masustine nga yunit nga nagasuyop sang mga kadre halin sa hilikuton pangmasa kag nagabilin sang dalagku nga bahin sang mga prenteng gerilya nga wala sang epektibo nga armadong yunit sa malawig nga panahon. Bunga sini, sa sulod sang kulang sa duha ka tuig nga "pangkabilugan nga opensiba" sang kaaway, nakakihad siya sang dalagku nga bahin sang mga prenteng gerilya naton kag malapran nga nakatukod sang mga yunit paramilitar, nga sa madamo nga lugar, gamay lamang ukon halos wala sang pagpugong sang indi-konsolidado nga baseng masa kag maluya nga mga lokal nga yunit gerilya kag yunit sa hilikuton pangmasa. Ginbatyag naton ang mga atake sang kaaway sadtong 1988 kag 1989 bangud may pila ka tuig na nga ginpaluya naton ang aton nga mga pwersang lokal kag napabayaan ang hilikuton pangmasa kag konsolidasyon sa madamo nga lugar -- sang labi nga paikiton naman sang kaaway ang pagsuyod sa aton mga prente kag pang-ipit sa mga baryo kag lokalidad; luwas pa sa pagkaatrasar sang pagtuon kag paghatag sang nagakaigo nga ubay sa pungsudnon nga lebel. Kon indi naton pagtadlungon ang mga kasaypanan nga ini, mapwersa kita sang kaaway nga mag-away sa sitwasyon nga lunsay militar sa nagapadamo nga nagapadamo nga lugar kag magaagi sang mas mabug-at pa nga mga kahalitan ang mga rebolusyonaryo nga pwersa.
Halin 1990, bilang sabat sa panawagan sang sentral nga pamunuan, ang mga komite sang Partido kag kumand sang hangaway sa mga rehiyon naghatag-tum-ok sa hilikuton pangmasa, pagpugong sa pagkabuhin sang baseng masa kag pagpabaskog sa mga pwersa sa mga lokalidad. Madamo sa mga kumpanya ang gintalana sa hilikuton masa, sa pagpalapad, pagbawi kag konsolidasyon sang baseng masa kag madasig nga nabatyagan ang positibo nga epekto sa amat-amat nga pagpangibabaw sa tendensya nga paatras sadtong mas nauna nga mga tuid. Bisanman, nagasugod pa lamang kag daku pa ang dapat himuon sa pagpangibabaw sa mga malain nga epekto sang sayup nga linya kag pagbawi sa malig-on, tayuyon kag komprehensibo nga pagsulong. Una sa tanan, kinahanglan nga lubos nga sawayon, isikway kag tadlungon ang sayup nga linya kag maghimud-os sa malapnagon kag maikit nga pagpakig-away gerilya samtang ginapalapad kag ginapabakud ang baseng masa paagi sa husto nga disposisyon sang mga kadre kag pwersang gerilya.
Ang adelantado nga pagtukod sang indi-masusustine nga kumpanya kag batalyon nag-anak sang iban pa nga tendensya kag mga aksyon nga adbenturistang militar, pareho sang hilig sa pagbira sa mga matig-a nga pusisyon sang kaaway; mga opensibang taktikal nga padasu-daso ang pagkaplano kag masyado nga malawig, nagagasto sang sobra nga madamo nga bala kag nagabunga sang madamo nga kaswalti; kag mga aksyong militar nga indi lubos nga ginakonsiderar ang laban-laban kag posible nga mga negatibong epekto sa pagtukod sang baseng masa, kaayuhan sang masa kag iban pa nga mga implikasyong pulitikal.
Sa kubay sang madamo nga kadre, labina sa mga rehiyon kag mga organo nga malapit nga nakahibalo sa matag-adlaw nga hilikuton sa kubay sang masa kag paghulag sang mga yunit sang hangaway, mabaskog ang pagpati nga ang adelantado nga pagtukod sang dalagku nga pormasyon indi magabunga sang madasigay nga kadalag-an militar kundi sang pagkalubong sa mga kakinahanglanon nga lohistikal, pagkahamulag sa masa kag pagkapasibo, mga pagkalutos kag iban pa nga dagway sang kahalitan.
Isa ka halimbawa ang eksperyensya sa Samar. Sadtong temprano nga bahin sang mga tuig nga 1980, nag-ula didto ang kaaway sang siyam ka batalyon. Ang BHB wala sang matawag nga batalyon sadto, apang sa proseso sang pagpakig-away gerilya, nagdaku ang BHB kag ang mga pwersang rebolusyonaryo. Sa nagligad nga masobra apat ka tuid, sa diin ang kaaway may tatlo ukon apat ka batalyon sa isla kag ang BHB may kaugalingon na nga batalyon, nag-angkon sang pila ka wala pa sang katupong nga kahalitan sa bilog nga Partido, hangaway sang banwa kag baseng masa. Ang "batalyon" nahigot sa mga palas-anon nga lohistikal kag ang mga tropa kag istap sini nabuhinan sang 50 porsyento sadtong 1990 halin sa 500 hangaway nga putuk-putukan sang pwersa sini. Ang istap sang batalyon nagbug-os sang daku nga porsyento sang kabilugan nga isip sang mga Pulang hangaway. Talalupangdon ang nangin pagnipis kag pagbuhaghag sang baseng masa sa daku nga bahin sang isla.
Ang lain-lain nga departamento kag uslob sang istap nag-agaw sang mga kadre kag rekurso halin sa hilikuton pangmasa. Bisan ang pila sa mga ini, pareho sang istap sa treyning, ordnans kag medikal sa pila ka lebel, kinahanglan kag nakaamot sang daku sa pagpauswag sang hangaway kag teknik sang hangaway, may gintukod nga indi kinahanglanon nga uslob sang istap kag mga yunit sang istap nga wala pa sa panahon ukon indi gani nagahimo sang mga katungdanan nga ginatungdan na ukon mas kumbinyente nga tungdan pa sang iban nga yunit sang Partido ukon mga organisasyon masa. Antes pa sini, sa kadam-an sang mga rehiyon, may nauna na nga serye sang pagnipis kag pagnubo sang kalidad sang kadre kag armadong pwersa nga nakatalana sa mga lokalidad. Una anay ang mga redispusisyon sang mga kadre kag tinawo para sa pagpalapad kag pagbulig sa mga nagakaulihin nga prenteng gerilya ukon rehiyon. Sumunod ang mga promosyon sang mga kadre para sa pagtukod kag pagpabaskog sang mga komite sang Partido sa mga distrito kag mas mataas pa nga lebel. Sumunod pa ang pagtukod sang mga lubos nga yunit gerilyang naghatag-tum-ok sa hilikuton militar kag nagbuhin sang pagpartisipar sa hilikuton pangmasa kag mga hilikuton lokal. Kag kadungan, may malala nga kapabayaan sa teoretikal nga edukasyon kag kahanasan sang mga kadre.
Ang kabilugan nga resulta amo ang pagkabuhin sang baseng masa. Kag ang kasunod amo ang pagtuhaw sang tendensya nga mangita sang suporta sa lohistika halin sa ibabaw kag sa gwa, kon ang suplay sang pagkaon kag ang kontribusyon halin sa masa kag buwis halin sa mga lokal nga negosyante kag agalon nga mayduta indi bastante sa mga kinahanglanon sang mga kumpanya kag batalyon. Mabaskog man ang tentasyon nga gamiton ang armas sa pagpangalap sang pinansya paagi sa mga pamaagi nga gangster nga may malain nga epekto sa pulitika kag nagatuga sang malala nga disoryentasyon sa ideolohika kag pulitika sa kubay sang mga upisyal kag hangaway.
Pareho sang dapat, ang pila ka kumpanya kag batalyon nagapartisipar sa hilikuton pangmasa kag sa produksyon sa tion nga masarangan. Apang nagareklamo ang mga Pulang hangaway kon ngaa sila magapabilin sa dalagku nga konsentrado nga pormasyon bisan indi na sila nagapakig-away sa kaaway sang pareho kasunson sadtong daan nila nga ginapatihan. Apang, syempre, mas malala pa ang matabo sa ila sa pagpakig-away sa tion nga nagpakig-away sila sang mas masami nga wala sang baseng masa kag kuluhaan sang suportang materyal. May ara man nga yara sa pormasyong kumpanya nga ginagamit nga rason ang mismong kadakuon sang ila pormasyon para maglikaw sa hilikuton pangmasa kag produksyon ukon pagbulig sa masa, sa diin kinahanglanon nga magbulublag sila sa mas gagmay nga yunit. Ginasiling nila nga kinahanglan nga alerto sila permi kag mag-ispesyalisa sa pag-away, pareho sang isa ka pirmihan nga hangaway, bangud basi maabutan sila sang kaaway nga wala sang ihibalo sa tion nga nakalapta.
Bangud sa mga problema sa pagrekrut nga dala sang nagapagamay nga baseng masa, madamo nga kompanya ang nagdangat sa pagrekrut sang mga lumpen kag iban pa nga elemento nga wala nag-agi sa edukasyon kag pagpanday sa mga organisasyon masa. Sa madamo nga erya may ara pa gani sang hungod nga pagpanubo sang mga talaksan sa pagrekrut sa mga kumpanya agud mapun-an ang mataas nga tantos sang pagbaylo sang mga hangaway. Ini, dugang pa ang kapabayaan sa internal nga edukasyon pulitikal kag pagkahamulag sa hilikuton pangmasa kag produksyon, ang nagdangat sa pagnubo sang pangpulitika nga kalidad kag disiplina sang hangaway sang banwa. Sa kubay sang mga upisyal kag hangaway, nagluya nga nagluya ang mga daan nga kahanasan kag kinaalam sa hilikuton pangmasa, amo man ang maayo nga mga aktitud nga nagauswag kag kinahanglan sa pagpakig-integrar sa masa. Naglapnag kag naglala ang mga problema sa kagaspangan, kakulangan sa disiplina, mga binatasan nga lumpen, arogansya kag komandismo. Masami, masambit sang mga taga-baryo ang ginatawag nga unang henerasyon sang BHB sa mga iskwad kag platun bilang mga tunay nga BHB samtang ang madamo sa mga nagsunod pa labina sini nga nagligad nga pila ka tuid bilang paltik bangud wala nagapartisipar sa hilikuton pangmasa kag produksyon, wala nagabulig sa pumuluyo kag baraghal maghulag. Ang "regularisasyon" nagakahulugan sang pagkahamulag sa masa.
May panahon nga ginapabugal naton na may ara kita pila ka dosena nga kumpanya kag pila ka batalyon. Apang tuman ka nubo sang isip sang mga opensibang kumpanya-kadaku kon ikumparar sa isip sang kumpanya. Dapat tampad nga atubangon naton ang mga palamangkutanon kon ngaa ang mas dalagku apang mas indi madamo nga yunit militar nagbunga sang mas gamay nga opensibang taktikal, mas madamo pa nga napaslaw nga opensibang taktikal kag paggamay sang armadong pwersa, partikular sa tinawo.
