Komite Sentral, Partido Komunista sang Pilipinas
Hulyo 1992
Bilang mga proletaryo nga rebolusyonaryo, nagabenepisyo kita sa dungganon nga kabang-manggad sang teorya nga Marxista-Leninista kag nagakuha gikan didto sang mga sandigan nga prinsipyo nga nagaubay sa aton rebolusyonaryo nga kawsa sa mga halintang sang bag-o nga demokratiko nga rebolusyon, sosyalistang rebolusyon kag komunismo. Dapat naton ipadayon ini, kon indi, pagaagumon naton ang gindangatan sang mga rebisyunista nga nagahari nga partido (upod ang mga sumulunod sa kampo nila) nga nagsugod nga magrebisa kag magpalayo sa mga sandigan nga rebolusyonaryo nga prinsipyo kapin tatlo ka dekada na ang nagligad kag nagdangat sa pagkawasak sini sa pila ka tuig nga nagligad.
Kon wala sang rebolusyonaryo nga teorya, indi mahimo mag-angkon sang rebolusyonaryo nga kahublagan. Kon may ara lamang kita sang malig-on nga sandigan sa ideolohiya kita mahimo nga makahimud-os sa rebolusyonaryo nga paghimakas, makasakdag sa mga kinamatarung kag interes sang pumuluyo, makapursigir sa husto nga linya kag makaagom sang labi pa nga mga kadalag-an. Kinahanglan nga seryusohon naton kon subong ang mga teoretiko nga pagtuon.
Ang mga pagtuon kag ang aktibismo pangpulitika lubos nga kinahanglan agud pukawon, organisahon kag pahulagon ang masa. Apang indi bastante ang mga ini. Indi kita dapat magpakabastante sa mga pulupanahon nga pagtuon sa pungsudnon nga sitwasyon. Indi man kita dapat magpawaslik-waslik nga dala sang mga subong nga padihot sa burgis nga mass media ukon mga pagpamilit sang mga mahuyang kag indi-masaligan nga alyado. Kinahanglan nga permi nga maathag sa aton ang aton teorya kag mga idea. Kinahanglan nga permi nga maathag sa aton ang mga interes sang proletaryado kag sang pigos nga pumuluyo sa kaugalingon naton nga banwa kag sa bug-os nga kalibutan.
Kinahanglan nga ipabilin kag labi pa nga pauswagon ang aton Marxista-Leninista nga panindugan, panan-awan kag pamaagi. Dapat permi nga paayuhon ang aton kinaalam nahanungod sa materyalista nga pilosopiya, materyalismo nga istoriko, ekonomiya pangpulitika, siyentipiko nga sosyalismo, bag-o nga demokratiko nga rebolusyon, pagtukod sang partido, inaway banwa kag pagtukod sang nagahiliugyon nga prente.
Halin sang liwat nga itukod ang Partido, ang pagtuon sa teorya may ara nga tatlo ka lebel : ang basehan nga lebel nga nakapokus sa kasaysayan, katilingban kag rebolusyon Pilipino kag mga sandigan nga dokumento naton; ang intermedyang lebel, nahanungod sa pagtuon nga may pagkumparar sang rebolusyon Pilipino sa rebolusyon Tsino kag iban pa nga rebolusyonaryo nga kahublagan, nga ginagamitan sang pito ka-libro nga seleksyon halin sa mga sinulatan ni Mao; kag ang abanse nga lebel, nahanungod sa mga sandigan nga prinsipyo sang teorya nga Marxista-Leninista, nga nagagamit sa mga mabilidhon nga sinulatan nanday Marx, Engels, Lenin, Stalin kag Mao para sa pagbasa kag pagtuon sang mga sanga kag indibidwal nga katapu sang Partido.
Apang halin ulihi nga bahin sang mga tuig nga 1970, nagpalayo na nga nagpalayo kita sa natumod nga istruktura sang edukasyon teoretikal kag nagbuhin sang atensyon nga ginatigana sa mga sinulatan ni Mao. Ang mga sinulatan nga indi pareho kabilidhon kag mas gamay ang kapuslanan sa aton rebolusyonaryo nga paghimakas ang nagkuha sang mas daku nga igtalupangod sang mga katapu sang Partido pero sa pamaagi nga tama kahapaw.
Halin ulihi nga bahin man sang mga tuig nga 1970, may malala nga kawawad-an sang mga kurso sa pagtuon kag mga materyal para sa edukasyon teoretikal sa intermedya kag abanse nga lebel. Ang mga kolektibo nga pagtuon nalimita sa basehan nga kurso kag panalagsa nga bugso sang mga kurson nga limitado ang sakop. Sadtong 1981-82 may nahimo kag napanagtag nga mga bag-o nga salhin sa Pilipino nga sandigan nga dokumento sang liwat nga pagtukod sang Partido kag iban pa nga malahalon nga basehan nga sinulatan, pero sa limitado nga isip lamang. Ang mga sinulatan sang mga dungganon nga teorista kag lider komunista nangin malaka na kag wala nagalab-ot sa kubay sang mga kinaandan nga katapu sang Partido.
Manubo nga Lebel sang Edukasyon nga Teoretikal
Indi-mahimutig nga ang resulta sang subong sini nga pagpabaya sa edukasyon teoretikal amo ang lapnagon nga manubo nga lebel sang kinaalam nga teoretikal sa kubay sang mga kadre kag katapu sang Partido. Nagapalala ang kapaslawan sa ebalwasyon sang rebolusyonaryo nga inagihan sang aton nga kaugalingon nga Partido kag pumuluyo, subong man sang mga rebolusyonaryo nga eksperyensya sa iban nga pungsod sa nagligad kag subong. Nagapalala man ang kapaslawan nga tumuron, sawayon kag pamatukan ang mga ideya kag impluwensya nga petiburgis nga nagatuhaw sa sulod kag guwa sang Partido kag nagapatalang sa mga katapu sang Partido kag sa rebolusyonaryo nga masa. Napasaka sa mga mas mataas nga katungdanan sa organisasyon ang mga kadre nga manubo ang lebel sang kinaalam nga teoretikal kag laban-laban nga makahimo sang mga seryosong paglihis kag pagsayup indi lamang sa ideolohiya kundi sa kadugayon bisan sa hilikuton sa pulitika kag organisasyon.
Tuman kadaku sang lang-at para sa pagtuhaw sa sulod sang Partido sang suhetibismo, upod ang mga huyog nga dogmatista, empirisista kag rebisyunista. Sa baylo nga kumprehensibo, bilog kag tanan-nga-bahin nga panan-awan sa mga bagay kag pag-uswag sa teorya halin sa proletaryo nga rebolusyonaryo nga panindugan, nagaluntad ang makitid, bangian kag lapta-lapta nga panan-awan sa mga ini, depende kon ano nga paglihis ang luyag sakdagon sang mga partikular nga elemento.
Halimbawa, may ara mga elemento nga sobra nga nagapadaku sa subong nga papel sang kasyudaran nga ila ginahulagan kag eklektiko nga nagakuha nga bulag sa istoriko nga konteksto sang pila ka dramatiko nga hitabo, pareho sang mga pag-alsa sa Petrograd kag Moscow, pag-alsa sang 1945 sa Byetnam, opensibang Tet sang 1968 kag katapusan nga opensiba sang 1979 sa Nicaragua-- agud magpanagil-ot sang "kaugalingon nga dinamismo sang paghimakas nga syudad " (nga bulag sa kabilugan nga estratehiya) kag magbalay sang "bag-o nga estratehiya" sang armado nga insureksyon nga urban nga dogmatiko nga ginataklob ukon ginapabunggo sa bilog nga teorya kag praktika sang inaway banwa.
Wala ginapwera sang inaway banwa ang armado nga insureksyon sa husto nga panahon, pareho sang mga malapad nga rebolusyonaryo nga pag-alsa sa madamo nga probinsya sang Pilipinas sadtong 1896-98 kag 1898-99 pagpamatok sa kolonyal nga na paghari nga Espanyol kag dason, pagpamatok sa gera nga pagpangsalakay sang US kag atong sa Sentral Luson sadtong nagahingapos ang 1944 kag temprano nga bahin sang 1945 kontra sa nagakapugday nga pwersang Hapones. Sa mansig nila panahon, ang rebolusyonaryo nga hangaway nga Pilipino kag ang Hukbalahap nagserbi nga tag-punpon sa masang organisado kag ispontanyo.
Ang madinalag-on nga insureksyon nga popular nakasandig sa disintegrasyon sang kontra-rebolusyonaryo nga hangaway kag pagluntad sang bag-o nga armado nga pwersa nga rebolusyonaryo luwas sa iban pa nga paktor. Ang pagpangindi sa kakinahanglanon sang huluhalintang nga pagsulong sang inaway banwa kag pagtukod sang hangaway sang banwa ukon indi gani paghandom nga maglaktaw sa mga kinahanglan nga halintang sang pagsulong sang inaway banwa -- sa kahimtangan nga bilog pa kag wala pa nabungkag ang pwersa sang kaaway -- indi lamang dogmatikon nga nagahimo pahinandigan sa natural nga paghandom sang dasigay nga tagumpay kundi pagdabok man sang pagkawasak sang mga rebolusyonaryo nga pwersa sa kaugalingon.
Bisan maathag nga nahibal-an ang kabilugan sang isa ka bagay ukon proseso kag bisan makita ang duha ka aspeto nga magkabanggi, may ara pa gihapon nga mga pagsayup sa pagtumod kon diin ang mga aspeto nga prinsipal kag diin ang sekundaryo sa mga partikular nga kundisyon sa isa ka natalana nga tion; ukon indi gani, pagkatapos nga matumod ang aspeto nga prinsipal, ang pagbale-wala naman sang lubos ukon sa esensya sa sekundaryo nga aspeto.
Lantawon halimbawa ang dalagan sang pamensaron nga nagdangat sa sayup nga boykot sadtong 1986. Husto ang sentro nga pamunuan nga ideklarar nga paltik ang hinali nga eleksyon nga presidensyal sang 1986 kag si Marcos magapangdaya kag magadaog sa inisipay sa COMELEC. Sa subong sadto, tubtob sa sa isa ka natalana nga grupo sang mga sirkumstansya kag sa sulod sang isa ka natalana nga panahon, maathag nga ang prinsipal nga aspeto amo ang pagpabilin ni Marcos sa gahum. "Magadaog" gid man si Marcos suno sa pag-isip sang COMELEC kag proklamasyon sang Batasang Pambansa.
Apang ang sekundaryo nga aspeto pwede nga magsaka sa pusisyon nga prinsipal, sa tion nga may pagbag-o sa mga sirkumstansya, pareho sang rebelyong militar nga ginduso sang US kag popular nga pag-alsa nga natabo bunga sang pagtabo pareho sang mga organisadong pwersa nga reaksyunaryo (upod na ang Simbahang Katoliko) kag mga pwersa nga progresibo. Nobyembre 1985 pa lamang, magulugarhum nga ang daku nga potensyal sang pagsaka sang sekundaryo nga aspeto sa pusisyon nga prinsipal.
Sa pagtratar sa mga magkabanggi nga aspeto, mahimo man nga maghalin ang pagsayup sa pagtinguha nga itingub ukon isanto ang aspeto nga prinsipal sa aspeto nga sekundaryo. Ginatalana sang materyalismo nga diyalektiko nga ang isa ka bug-os nga bagay ukon proseso mahangpan paagi sa pag-hibalo isig sa prinsipal kag sekundaryo nga mga aspeto, ukon sa isa ka masalimuot nga bagay ukon proseso, isig sa pangunahon kag sekundaryo nga mga kontradiksyon.
Halimbawa, ang isa ka linya husto, pareho sang estratehiko nga linya sang paglikup sang kasyudaran halin sa kaumhan, suno sa teorya sang inaway banwa. Ang isa pa nga linya sala, pareho sang paghandom sang lubos nga kadalag-an ukon pagpakigpartidahay sang gahum sa burgesya sa malapit nga palaabuton, nga indi obligado nga ginatukod sang huluhalintang ang hangaway sang banwa tubtob sa bastante ang kusog sini agud waskon ang makinarya nga burukratiko-militar sang reaksyunaryo nga estado sa kasyudaran. Gani ang mga kadre sang Partido, upod ang mga ara sa listahan sang mga ginapangita sang kaaway, nagpurungyot sa mga organong istap nga nakabase sa kasyudaran para sa "paghanda" sa armado nga insureksyon; kag ang hangaway sang banwa ginaduso sa adelantado kag indi-masusustinir nga pagtukod sang mas mga dalagku nga pormasyon nga pangsalakay kag mga istap militar nga sobra ang bug-at sa ibabaw.
Ang sala nga linya wala ginatumod nga sala bangud may embokada sang pagsugot sa teorya sang inaway banwa kag sa pagpamuno sang Partido kag bangud ini nagadala man sang pila ka elemento nga may pangmadalian nga idlak pareho sang mas epektibo nga mga opensiba sang mas dalagku nga mga pormasyon antes dalagkuan nga mabuhin ukon madula ang baseng masa.
Ang mga proposal nga direkta nga nagasaylo sa istratehiyang insureksyunaryo ukon nagapakagamay sa pagtukod sang base kag paghimakas nga antipyudal ginbalibaran, pero indi hugot nga ginsaway. Mas malala pa, ginpaba-yan sila nga magpabilin sa iban nga dagway, pareho sang paghandom sang desaysibo nga kadalag-an sang rebolusyon paagi sa "estratehiko nga kontra-opensiba" sa sulod sang estratehiko nga depensiba ukon indi gani, postura sang "pagsabnit sang mga oportunidad" paagi sa insureksyon nga urban kakumbinar ang mga dalagkuan nga kampanya kag operasyon sang mga pormasyon nga pangsalakay.
Sa pagkamatuod, ginasamo ang husto kag sala nga linya, bagay nga nagtugot nga makalarga ang ulihi tubtob sa mabugtaw ang Partido nga malala na ang mga kahalitan.
Ang pinakamalala nga halimbawa sang pagkapaslaw nga magkilala sa prinsipal kag sekundaryo nga mga aspeto sang isa ka bagay ukon proseso nahanungod sa Kampanyang AHOS (ang isteryang anti-impiltrador sa Mindanaw). Nagamurarat ang mga malala nga paglabag sa mga kinamatarung nga sibil, ang indi-matarung nga pagpatay sa mga kaupod kag iban pa nga indibidwal kag ang mga kadungan nga halit sa mga rebolusyonaryo nga pwersa nga himo sang kampanya nga ini. Apang may pila ka panahon nga ginkabig nga husto ang kampanya bangud kuno laban-laban nga na may nasumpo nga mga matuod nga deep penetration agents (DPA) bisan pa ginatos ang maayo nga kadre kag inosenteng tawo ang nabiktima kag napatay.
Lain-lain nga kabangdanan nga guwa sa ilig sang mga hitabo nga sakop sang responsibilidad sang Komisyon sa Mindanaw halin temprano nga bahin sang dekada 1980 tubtob sa naulihi nga bahin sang 1986 ang labi nga ginasambit, bagay nga nagapakarga sang basol sa mga pangguwa nga paktor kag nagautod sa kuneksyon sang isteryang anti-impiltrador sa mga pangsulod nga pagsayup kag kahuyangon sa ideolohiya, pulitika kag organisasyon. Ang pinakamalain nga proposal nga ginplastar sang pila ka elemento amo ang kilalahon nga isa ka rebolusyonaryo nga kadalag-an ang Kampanyang AHOS.
Ang Inaway Banwa kag ang Rebolusyon nga Duha ka-Halintang
Indi halambalanon sang arbitraryo nga luyag nga ang daku nga bahin sa istruktura sang edukasyon teoretikal dapat itigana sa pagtuon sa mga sinulatan ni Mao kag sa rebolusyon Tsino. Ginatiglawas ni Mao ang isa ka halintang sang teorya kag praktika nga nagabug-os sang malahalon nga pag-uswag sa Marxismo- Leninismo. Ang iya mga sinulatan mas madalum nga nagdul-ong sang Marxismo- Leninismo sa Sidlangan. Kag ang mga ato bunga sang mga kahimtangan nga malakolonyal kag malapyudal sa sandigan nga pareho sa Pilipinas.
Ang mga halimbawa sang inaway banwa sang Tsina kag Byetnam mas malapit nga katulad sang subong nga inaway banwa sa Pilipinas sangsa ano man nga armado nga rebolusyon sa iban nga banwa. Ginapakita sang mga halimbawa nga ini nga ang permihan nga krisis sang mga kundisyon nga malapyudal nagaserbi nga basehan sang inaway banwa kag tubtob sa subong, ang mga halimbawa nga ini ang pinakamaayo sa tanan sang ara na kag pinakasanto sa aton paghimakas.
Nakatuon kita sang mga sandigan nga prinsipyo halin sa rebolusyon Tsino kag mga sinulatan ni Mao, pareho sang ginhimo man sadto sang mga rebolusyonaryo nga Byetnames. Gindapat naton ang mga ini santo sa kaugalingon nga mga kundisyon naton, kag indi bisan san-o dogmatiko ukon mekanikal nga nagkopya sang ano man nga padron sang mga eksperyensya. Sambiton naton ang pila ka malahalon nga kinatuhay sa inagihan sang Tsina sa inaway banwa:
- Bilang dugang sa paggamit sang kaumhan agud pihak-pihakon kag paluyahon ang pwersa sang kaaway, ginagamit naton ang pulu-pulo nga kinaiya sang banwa agud labi pa nga pihakon kag paluyahon ang kaaway.
- Ang hangaway sang banwa nga Tsino naggamit sang regular nga pagpakig-away nga mahulag kag nagtukod sang mga malapad nga base sa panahon sang estratehiko depensiba. Pareho sang mga Byetnames, ang ginagamit naton gerilya nga pagpakig-away kag mga base kag sonang gerilya.
- Ginpatuman anay sa Tsina ang isa ka bilog nga halintang sang rebolusyon agraryo nga ginkaundan sang mga pag-alsa sang mangunguma kag pagkumpiska sang mga kadutaan, antes ang mas madinalag-on nga kampanya sang pagpanubo sang arkila sa duta kag pagdula sang usura sadtong tion sang paghimakas sa mga Hapones. Kita naman, nagatigayon sang ginatawag naton nga minimum nga programa sang rebolusyon agraryo antes ang maksimum.
Bangud sa mga obhetibo nga kundisyon kag mga suhetibo nga pwersa sang rebolusyon Pilipino sa subong, mahimo tigayunon ang rebolusyon nga duha ka-halintang (bag-o nga demokratiko kag sosyalista) nga una nga gin-athag ni Lenin kag ginpalawig ni Mao. Ang rebolusyon Pilipino, demudo, pareho sang rebolusyon Tsino, Byetnames, Koreano, Cubano kag iban pa nga rebolusyon nga sarang magpadayon halin sa bag-o nga demokratiko padulong sa sosyalistang halintang. Sa subong sini nga pakahulugan, ang aton nga rebolusyon ara sa lebel nga mas mataas sa mga rebolusyon nga ginbun-ag sang mas atrasado nga kolonyal kag bisan rasistang dominasyon nga pangpulitika kag ekonomiko (pareho sa daku nga bahin sang Aprika) ukon indi gani didto sa diin ang rebolusyonaryo nga pamunuan indi man determinado nga maghiwat sang rebolusyon sosyalista (pareho sa Nicaragua).
Ang pinakamalala nga tipo sang dogmatismo nga nagtuga sang pinakadaku nga kahalitan sa Partido amo ang pagtaklob sa madinalag-on nga praktika naton sa inaway banwa sang modelo nga Sandinista ukon indi gani sang pila ka aspeto ukon hitabo sa rebolusyon Byetnames nga ginhamulag sa istoriko nga konteksto agud magtulod sang insureksyunismo kag ang wala-natalupangdan nga pagbuhi liwat sa ideya sang dasigay nga kadalag-an militar ni Jose Lava agud magduso sang panan-awan nga lunsay militar kag adbenturistang militar. Ang mga ideya nga binhi sang mga ini nagsugod nga magtuhaw kag mag-impluwensya upod sa mga elemento sa sulod sang sentral nga pamunuan sadtong damlag nga bahin sang mga tuig nga 1980, nabilog bilang maathag nga linya nga insureksyunista sa Mindanaw sadtong 1983, kag naglapnag sa pungsudnon nga sakop halin tunga-tunga sang mga tuig nga 1980 sa sulod sang balayon sang programa para sa "estratehiko nga kontra-opensiba".
Sa mga dokumento sang liwat nga pagtukod sang Partido, lubos nga ginseparar ang pinakamalahalon kag pinakaesensyal nga mga datos sa kasaysayan kag mga sirkumstansya sang Pilipinas, sa banggianay sang mga sahi kag rebolusyonaryo nga kahublagan sa aton banwa. Sa patag sang ideolohiya, ang pinakatalalupangdon nga kadalag-an sang Partido amo ang pag-aplikar sang teorya nga Marxista-Leninista sa kongkreto nga kundisyon sang Pilipinas. Lakip diri ang pagtumod sa mga basehan nga kundisyon kag subong nga kinaiya sang rebolusyon Pilipino, mga motibo nga pwersa kag kaaway, estratehiya kag mga taktika, mga katungdanan kag sosyalista nga perspektiba sini.
Ginsaway sang Partido ang lain-lain nga kasaypanan nga suhetibista, bisan dogmatista, empirisista ukon rebisyunista man, kag ang "Nawala " ukon Natuo nga oportunismo, sang mga pamunuan sang una nga Partido Komunista (1930-38) kag sang partido nga pagtingob sang partido nga Sosyalista kag Komunista (1938 kag pagkatapos).
Upod sa mga suhetibista kag oportunista nga kasaypanan nga ginsaway kag ginsikway amo ang adbenturistang linya sang dasigay nga kadalag-an militar ni Jose Lava, ang pagtukod sang mga batalyon kag kumpanya sang wala ginatukod ang pundasyon sang malapad kag madalum nga baseng masa (paagi sa maukod nga hilikuton pangmasa). Sa tion nga ginakalipatan naton ang mga leksyon sa kaugalingon naton nga kasaysayan, pagasuliton kag pagasuliton naton ang mga kasaypanan.
Daw bag-o kag uso ang linya sang ispontanyong pag-alsa sang masa kag armado nga insureksyon nga urban bangud ginapabugal sini ang modelo nga Sandinista ukon indi gani ang pila ka dinalan nga ginpulot sa mga sinulatan nga Byetnames. Pero, sa pagkamatuod, ang linya nga ini isa man nga wala ginaako nga liwat nga pagpabuhi sa konsepto nga alsa-puto sang mga Sakdalista nga husto nga ginsaway kag ginsikway halin pa sadtong panahon ni Kaupod Crisanto Evangelista.
Bilang mga proletaryo nga rebolusyonaryo, kinahanglan nga makatuon kita gikan sa lain-lain nga rebolusyonaryo nga eksperyensya sa iban nga pungsod, apang kinahanglan nga makatuon man kita nga nag-usisa sa ila sigun sa ila kapuslanan nga pangkalibutan, pungsudnon nga konteksto kag pagkasanto sa kaugalingon nga paghimakas sang banwa naton. Tanda sang manubo nga paghangup nga teoretikal, suhetibismo kag oportunismo ang iranggo nga mas mapuslanon ukon mas mabilidhon ang sin-ukon man nga lider Sandinista sangsa kay Mao sa halambalanon sang pag-agaw sang gahum pangpulitika kag pagpatigayon sang rebolusyon nga pangkatilingban. Dapat naton basahon ang pagsaway sa kaugalingon sang FSLN matapos madula ini sa gahum sa sulod sang napulo ka tuig.
Kinahanglan nga lubos nga hakson naton ang kamatuoran nga indi dalaug-daugon ang imperyalismo nga US kag mga reaksyunaryo nga sahi sa Pilipinas. Ang pagrebolusyon indi lang simple nga pagpili gikan sa mga dumuluong nga modelo sang pinakamahapos nga pamaagi sang pag-agaw sa gahum. Kuntani, ang kudeta nga ginhimo sang mga progresibo nga upisyal sang hangaway sa Upper Volta (subong Burkina Faso) ang magatindog nga pinakamaayo nga modelo. Halin 1969 ginkinahanglan nga maghimud-os kita sa malawigan nga inaway banwa agud makatipon sang kusog kag makatukod sang mga organo sang gahum pangpulitika sa kaumhan. Ang pag-apura sa proseso nga sa katapusan magaagaw sa mga syudad, paagi sa ideya sang ispontanyo nga pag-alsa sang masa kag dasigay nga kadalag-an militar ang pagpapalamon sang gamay nga isda sa bagis, pagsuong sa mga kalalatnan kag kalutosan.
Halin tunga-tunga sang mga tuig nga 1970 kag pagkatapos, may ara mga kadre nga nahilig sa pagtuon sang kasaysayan nga Bolshevik kag mga sinulatan ni Lenin. Ini mismo isa ka maayo nga bagay. Mas maayo pa tani kon ginahimo ini sa sulod sang kumprehensibo nga edukasyon teoretikal naton. Apang ang pagtinguha nga iaplikar ang modelo nga Bolshevik sa rebolusyon Pilipino kag kadungan pagamayon ang kabilinggan sang mga sinulatan ni Mao Zedong-- nga labi man nga santo sa mga kundisyon sa Pilipinas-- nag-ganyat sa huyog nga naglisa sa kumprehensibo nga istruktura sang basehan, intermedya kag abanse nga lebel sang edukasyon teoretikal.
Sa kadugayon ang daw masupog nga mga estudyante ni Lenin kag sang kasaysayan nga Bolshevik sobra nga nagpokus sa isyu sang eleksyon 1978 kag 1986 kag nagkalapihak sa debate nga wala sang iban nga ginpilian kundi ang bahin sang boykot ukon indi gani partisipasyon. Bangud ang Partido ginadumilian sang kaaway nga magpartisipar, permi nga daog sa mga internal nga dibate ang bahin sang boykot. Ginpanagil-ot sang sentro sang Partido ang boykot sa pihak sang mga pagreklamo sa pormulasyon sang isyu kag mga praktikal nga suhestiyon nga nagahalin sa mga kadre sang Partido kag sang indi lubos nga ginakonsiderar ang mga positibo nga eksperyensya sa pagtratar sang Partido sa eleksyon 1969 kag 1971, subong man ang mga eksperyensya sa paghulag sa mga institusyon kag organisasyon nga reaksyunaryo, kag kon paano ginkuhaan epektibidad sang mga kaupod nga Byetnames ang mga eleksyon nga padihot sang rehimeng Saigon sadtong gyera sa Byetnam.
Sadtong ulihi nga bahin sang 1986 kag sadtong 1987, ginpalapnag ang isa ka taktikal nga kurso sa "pagpamuno pangpulitika " nga nagkonsentra sa kasaysayan kag estratehiya kag taktika nga Bolshevik kag mga sinulatan ni Lenin. Gintuyo nga tadlungon ang mga sala nga pag-aplikar sang mga prinsipyo nga estratehiko kag taktikal sang rebolusyon nga Bolshevik sa pag-alsa sang EDSA kag sa pangpulitika nga sitwasyon matapos ang EDSA. Halos kadungan, isa ka Leninistang kurso ang ginsakdag sang Komite sa Rehiyon Maynila-Rizal sa kubay sang mga nagapamuno nga kadre nila. Bangud halos wala man sang iban nga kurso nga ginhiwat, ang mga kurson nga ini nagbunga sang labi nga pagpanagil-ot sa padayon nga pagtuon sa teorya kag praktika sang inaway banwa, labi nga pag-ganyat sa oryentasyon nga makisyuda kag nagamit sang pila ka elemento nga nagalibod sang konsepto sang isureksyunismo.
Sadtong 1981 nagtuhaw sa sentral nga pamunuan mismo kag naglapnag sa pila ka bahin sang Partido ang ideya nga pareho indi santo sa Pilipinas ang modelo nga Bolshevik kag modelo nga Tsino. Labi nga ginsutsutan yadto ang huyog nga magbuhin sa pagbasa kag pagtuon sa mga sinulatan ni Mao kag naglisa sa husto nga istruktura sang edukasyon teoretikal.
Dugang nga nakaimpluwensya man ang mga atake kay Mao Zedong sa Tsina kaangot sang "daku nga lumpat pasulong" kag dungganon nga proletaryo nga rebolusyon pangkultura, subong man sang pagnubo sang militansya sang partido nga Tsino sa pangkalibutan nga kahublagan anti-imperyalista. Ini sa pihak sang indi pag-atake sang Partido Komunista nga Tsino kay Mao bangud sa mga tudlo niya tungod sa bag-o nga demoratiko nga rebolusyon kag sosyalista nga transpormasyon sang katilingban Tsino. Ang mga tudlo nga ini nagapabilin nga husto kag nagahatag-kasanag sa rebolusyonaryo nga kahublagan nga Pilipino.
Ang naupangan sang dogmatismo indi lamang ang nagasanto nga istruktura sang aton edukasyon teoretikal kundi upod ang nagakaigo nga pagtinguha nga sumahon ang aton kaugalingon nga manggaranon nga eksperyensya sa inaway banwa kag pataason ini sa lebel sang teorya. Tigaylo, mas ginakasakuan pa ang pagpangita sang isa lang nga dumuluong nga modelo ukon kabahin sato sa pagtinguha nga maendorso ang isa ka sala nga linya-- ang linya sang insureksyunismong urban-- kag itaklob ato sa aton buhi nga praktika sa inaway banwa.
Wala pa man lubos nga magdaog ang bag-o nga demokratiko nga halintang sang rebolusyon Pilipino, ang Partido makaangkon na sang madamo nga eksperyensya nga mahimo matun-an kag mapasaka sa lebel sang teorya. Nakabalay ini sang lain-lain nga porma sang pwersa nga rebolusyonaryo. Naka-establisar ini sang Pulang gahum pangpulitika sa madaku-dako na nga bahin sang teritoryo sang Pilipinas. Nakatuga ini sang mga mapuslanon nga sinulatan. Pero ang mga petiburgis nga mahilig sa uso nagakataka sa linya sang Partido kag wala sang makita nga daku nga naagom tubtob sa wala naagaw ang mga syudad.
Mangin sa subong nga halintang, ang rebolusyonaryo nga kahublagan nga Pilipino nakaabot na sa lebel nga mas mataas sa nalab-ot sang iban nga rebolusyonaryo nga kahublagan nga mas bantog sa prensang internasyunal bangud, pangunahon, sa mas atrasado nga dagway sang pagpamigos sang kaatubang nila (pareho sang direkta nga kolonyalismo kag rasismo) ukon indi gani bangud nakaagom na sang pagkilala sa mga resolusyon sang United Nations ang ila pungsudnon nga estado. Pero ato nga mga indi seryoso nga nagatuon sang teorya nagaayo sa mga kadalag-an sang rebolusyon Pilipino kag sobra nga nagapadaku sa mga dumuluong nga modelo sa simple nga basehan nga mas ginataw-an igtalupangod ang mga ini sang pangkalibutan nga masmidya kag indi sa basehan sang potensyal kag aktwal nga mga pagsulong sa banas sang rebolusyon nga duha ka-halintang.
