SA KABILA NG panggigipit ng rehimen, matagumpay na nailunsad ng mga tsuper sa Albay at Camarines Sur ang kanilang tigil-pasada noong Nobyembre 25-26. Ikinasa ang welga bilang paglaban sa iskemang “modernisasyon ng dyip” na papatay sa kabuhayan ng mga opereytor, drayber at mga manggagawa sa industriya ng dyip.

Sa unang araw, idineklara ng Condor-PISTON na 97% ng dyip sa Albay ang lumahok sa welga samantalang 85% naman sa Camarines Sur. Nakiisa din ang mga traysikel drayber sa protesta. Samantala, 90% naman sa mga tsuper ang lumahok sa ikalawang araw.

Sa tangkang pigilan ang welga, ginipit ng Land Transportation Franchising and Regulatory Board ang Sorsogon Transport Federation na magpaliwanag sa korte hinggil sa paglahok nila sa tigil-pasada noong Setyembre. Sa Catanduanes, pinuntahan ng mga ahente ng militar ang tagapangulo ng Federation of Virac Tricycle Operators and Drivers Association upang imbestigahan kung sinu-sino sa kanilang grupo ang kasapi ng PISTON.