Duha ka midya ang gipatay, upat ang giaresto ug usa ang gi-red-tag sa estado sa milabayng duha ka semana.

Gipatay sa 2nd IB ang lokal nga manunulat nga si Ronnie Villamor sa Barangay Matanglad, Masbate niadtong Nobyembre 14. Anaa siya sa lugar aron susihon ang pagpangilog og yuta sa negosyanteng si Randy Favis. Giharang siya sa usa ka tsekpoynt sa militar ug gipusil ug gipagawas nga engkwentro.

Niadtong Nobyembre 10, gipusil-patay ang manunulat ug magsisibya nga si Virgilio Maganes sa Barangay San Blas, Villasis, Pangasinan. Una na siyang gisulayan og patay sa mga pulis niadtong 2016.

Sa parehong adlaw, giaresto ug gidetine sa mga pulis sa Camarines Norte ang mga magsisibya nga silang Virgilio Avila Jr. ug Mia Concordia. Gigamit sa mga pulis ang kasong cyberlibel nga gipasaka ni Gov. Edgardo Tallado. Nakagawa sila magbayad og pyansang ₱400,000. Gikasuhan usab sa gobernador ang midya nga si Deo Trinidad.

Parehong kaso usab ang gigamit sa pag-aresto sa magsisibya nga si Jun Digamon sa Davao City niadtong Nobyembre 13 ug si Leonardo Hijara sa Surigao del Sur sa parehong semana.

Samtang, malisyosong gilambigit sa rehimen sa rebolusyonaryong kalihukan ang manunulat sa Inquirer ug direktor sa NUJP nga si Nestor Burgos Jr. niadtong Nobyembre 5. Nakabase si Burgos sa Iloilo City.

Ang Pilipinas ang ginailang ika-pitong pinakadelikadong nasud sa mga midya sa tibuok kalibutan matud sa 2020 Global Impunity Index nga gipagawas sa Committee to Protect Journalists niadtong Oktubre 28.