Gidumog sa 900 ka sundalo sa 82nd IB, 51st IB, 58th IB, 1st Special Forces Battalion ug Scout Rangers ang mga barangay sa utlanan sa Talakag, Bukidnon ug Tagoloan II, Lanao del Sur niadtong Oktubre 15-21.

Miatake sa mga barangay sa San Rafael, Lemonsudan ug Kibulag sa Talakag niadtong Oktubre 15 ang mga sundalo sakay sa lima ka trak ug duha ka armored personnel carrier (APC). Nagpwesto usab og duha ka kanyon sa lugar. Pagkaugma sa Tagoloan II, 16 ka trak sa militar ang midumog sa Barangay Pinilayan, wala pay labot ang tigduha usab nga APC ug kanyon. Nadugangan pa kini og upat ka trak sa sundalo ug walo ka trak sa suplay sa misunod adlaw.

Human ang usa ka semana, tulo ka semana usab nga ginautingkay sa 5th IB ang mga baryo sa Maguing, Lanao del Sur. Walay-puas nga nagpabuto sa 60mm nga kanyon ang mga sundalo. Pugos usab nga ginapasurender ang mga residente.

Subling midagsa sa Barangay Lemonsudan ang lima ka KM35 nga trak ug 10 pa ka sakyanan sakay ang mga sundalo niadtong Oktubre 31. Nagsilbi silang pwersang pangseguridad sa pag-abot sa meyor sa Talakag ug ni Communications Sec. Martin Andanar.