Youth strike o pagsukol sa kabatan-onan ang singgit sa mga estudyante sa Ateneo de Manila University (ADMU) ug University of the Philippines (UP)-Diliman sa Quezon City aron paninglon ug tapuson ang kriminal nga pagpasagad sa rehimeng Duterte. Gibanabanang 400 ka kabatan-onan ang nagtapok atubangan sa ADMU niadtong Nobyembre 17 aron hagiton ang rehimen nga tubagon ang krisis nga gibunga sa kalamidad ug pandemya. Nagprotesta usab sila niadtong Nobyembre 20. Gipangunahan ang mga protesta sa Kabataan Partylist ug National Union of Students of the Philippines. Aduna usay mga protesta sa Bulacan ug Cebu.

Sunud-sunod nga nagpagawas og deklarasyon sa pagsukol ang mga kabatan-onan human manawagan ang mga lider-estudyante sa ADMU nga i-undang ang magpasa og mga rekisito hangtud nga dili mapalagpot si Rodrigo Duterte sa poder. Gisundan kini sa mga pamahayag sa mga estudyante sa uban pang unibersidad og academic break o temporaryong pagsuspinde sa mga online class. Pagtapos usab sa semestre ang panawagan sa mga magtutudlo sa University of the Philippines-Diliman. Nagkahiusa silang tanan nga dili makatarunganon ang pagpadayon sa klase taliwala sa mga kalamidad, kawad-on sa maayong internet ug dili haum nga gibug-aton sa mga akademikong rekisito.

Bitbit sa mga estudyante ang panawagang maghatag og pipila ka adlaw nga paghunong sa klase aron makapahulay ang mga estudyante ug makaabag ilabina sa mga naigo sa kalamidad. Upat ka unibersidad pa lang ang naghatag og usa ka semana aron makapahulay ang mga estudyante. Nagdumuli ang Commission on Higher Education nga magdeklara og academic break sa nasudnong langkob. Nagpadangat og resolusyon ang representante sa Kabataan Partylist sa kongreso aron ipatuman sa nasudnong langkob ang paghunong sa klase sulod sa pipila ka adlaw.